Jeremi 24
24
Kand mbaiɓood kɨmaj kɨ kɨmajal
1A Goot'n Nebukadnesar, ngar kɨ Babilon, ɗe Jerusalem hɔ Jekonia ngon Jojakim, ngar kɨ Juda, kɨ mbaiɓeg kɨ Juda, hɔ ngejakag kɨ kɔdg, aw sed ɓert Babilon, Bɨraɓe ɔjɨm keh joo kɨɗoosɨ kɨ kand mbaiɓood na ĩn kɨnda nõ kujt lo Bɨraɓe. 2Keh kɨkɨɗa ɗoosɨ kɨ kand mbaiɓood kɨmaj ngãi tit kand mbaiɓood kɨdasa, na keh kɨmad ɗoosɨ kɨ kand mbaiɓood kɨmajal kɨ ndum in de asɨ sa al kɨtɔ majal loa kɨngãi. 3Bɨraɓe elɨm an: Jeremi, i oo ɗi a? M'tur m'an: Kand mbaiɓood. Kand mbaiɓood kɨmaj dum, kɨ kand mbaiɓood kɨmajal ngãi in de a sa al kɨtɔ majal loa.
4Ta lo Bɨraɓe'n elɨm an: 5Tit'n i ɔrrɨn kand mbaiɓood kɨmaj dum tadang ye, titbe tɔ m'a m'ɔrr deg kɨ Juda ĩgɨn awɨn sed ɓert ĩgɨn m'lad kɔ kam lot'n ɗan kam dɔningt lo Kaldeag kɨta kɔjd kamkẽ. 6M'a m'nda kumm godt maj, m'a m'ɔrrd m'ɗe sed kam dɔningt'n ɗan, m'a m'ad'd ndin londɨdt gog na m'a m'nujd al, m'a m'hɔ njad ningt, m'a m'ɔrrd ko gog al. 7M'a m'ad'd ngarkam kad gerɨn ne mĩ Bɨraɓe. A ĩn deg lom, m'a mĩ Luwah lod, a telɨn romt kɨ ngar kamd kɨtaagbe. 8Ɔi kand mbaiɓood kɨ de asɨ sa al, kɨtɔ majal loa, takel Bɨraɓe, titbe tɔ la m'a mad Sedekias, ngar kɨ Juda, kɨ mbaiɓeg loa kɨ ndeg ngéndɨ Jerusalem ĩgɨn nãin dɔningt'n ɗan kɨ ĩgɨn ndɨn dɔning Ejipt't, 9m'a m'teld nya kɨya kɨro kõɓegt tube kɨdɔningt kad ĩn nya kid kɨ nya godɔt kɨ nyataj kɨ nya kɨndɔl kam logt tube ĩn m'a m'tuɓad kɨ tit. 10M'a m'la kiyaɗɔɔ dandt kɨ ɓo kɨ yokoosɨ mbã kad goton dɔningt'n m'ad'd kɨ bɔwdg.
Currently Selected:
Jeremi 24: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
