Jeremi 23
23
Ndeg Israel kɨ ngar lod kɨjeje
1Beto lo ngéngombatg ĩgɨn tɨndan ɓut batg tĩd, tujɨnd ko lo kulnyagt lom.
Titbe la i takel Bɨraɓe ye.
2Kɨtɔ 'nten, titbe takel Bɨraɓe Luwah lo Israel ɔjɨn dɔ ngéngombatg ĩgɨn ndɨ ulɨn deg lom: I tɨndan batg lom tĩd, i tuɓand kɔ, i oon god al. Oon, m'a m'nda m'ɔjsɨ kɨta kɨlaɗasɨ kɨmajal.
Titbe la i takel Bɨraɓe ye.
3Kamla m'a m'kaw ndeg batg lom kɨnãi, kɨ dɔningg tube ĩn m'tuɓad tit. M'a m'tel sed kɨ lo kuldt gog, a oojɨn na, a bɨlan kɨdɔtdɔt. 4M'a m'nda ngéngombatg dɔdt ĩgɨn a ulɨnd, a ɓoolɨn al, a ndadɨn al tɔ, kɨkɨɗa kudt kɨ a nãi kɔ goto.
Titbe la i takel Bɨraɓe ye.
5Oon, ndog a ɗen nõ.
Titbe la i takel Bɨraɓe ye.
Lon m'a mad Dabid ooj ngon kɨdɨngã kɨdenesew,
a i ngar kɨ ngekõ ɓe kɨgo terrt kɨ takɨgang kɨgoɗobat kam dɔningt.
6Kaglot loa Juda a aj,
na Israel a ndɨ kɨ lapia.
Tɔ'n a kunɨna ne laten: Bɨraɓe i denesew loj.
7Kɨtɔ 'nten, oo, ndɔg ndɨ ɗen nõ. Titbe la i takel Bɨraɓe ye.
Lon deg a elɨn anan: Bɨraɓe ndɨ kɨ dɔn dõ, a elɨn be al. Bɨraɓe kɨ nge tee kɨ Israelag ko kam dɔning Ejipt't, 8na a elɨn anan: Bɨraɓe ndɨ kɨ dɔ dõ, ĩ kɨ nge tee kɨ nganka ngékɨɓe lo Israel ko kam dɔningt kɨjigel kɨ dɔning kɨɗen in tuɓadt kamla a ndɨ kam dɔningt lod kɨdɔd.
Ngekelta kɨngom kɨkanj ɓool Luwah
9Ta kɨdɔ ngekelta kɨta Luwaht taa;
Kamm gang ngalang dɔt,
kɨngamg san jekjek.
Mĩ tit de kɨ kasɨ ɗaa,
tit de'n kasɨnduu tɔi tɔga be
kɨta Bɨraɓe kɨ kɨta tag loa kɨ kunjɗang.
10Kɨtɔ dɔning ɗoosɨ
kɨ ngeɗakaya
dɔning ndɨ hɔndo kɨta ndɔl,
lo nyakulg kɨmut tut kurum,
deg ãin ngod kɨta ɗa majal,
tɔgd i kɨta ɗagootal koon.
11Ngekelta kɨta Luwaht
kɨ ngejanyamosɨ
ɗan nya kɨgo lo Luwaht al mbã
kam kujt lom
m'ngaa majal lod.
Titbe la i takel Bɨraɓe ye.
12Kɨtɔ 'nten ɗob lod a i tit hɔrhɔt
kam lo kɨdiwt, a ɔsɨ land kamt
kɨta m'a mad nyakɨto so dɔdt
kam ɓalt kɨ m'a m'nda m'ɔjd.
Titbe la i takel Bɨraɓe ye.
13M'oo nya kɨɓod ku ngekelta
kɨta Luwaht kɨ Samari,
elɨn ta nyakookamndilt kam to Baalt,
adɨn Israelag son mut.
14Ku ngekelta kɨta Luwaht kɨ Jerusalem
m'oo nyag kɨyerr ngãibe, ɗan ngaw ho sahn dekɨdẽ ho,
ndian kɨ takɨbal tadt
ndɨ adɨn ji ngéɗamajalg ngang,
ad kɨkɨɗa kɨ tel
nyàgo majal lon kɔ goto.
Kokɨromt m'ood
ĩn tube tit'n Sodom
ngendɨt tit'n kɨ Gomor be.
15Bɨraɓe Ngekoosɨg elta titbe dɔ
ngekelta kɨta Luwaht:
Oo, m'a mad
nya kɨkatbang tit kag
mband be kɨta sa
m'a m'ad'd ãin man
in kĩ tɔl deg i kamt,
kɨta i kɨta ngekelta
kɨta Luwaht kɨ Jerusalem la
adɨn nyaɗa kɨgoot al
tĩn kɨ dɔning kɨtaagbe ye.
16Titbe takel Bɨraɓe Ngekoosɨg:
Ot kon dɔ ta lo ngekelta kɨta
Luwaht ĩgɨn elɨn ta nyakookamndilt.
Ndɨ elsɨn ta kɨpãbe, elɨn nya
kookamndilt kɨ ngarkamdt,
i ta'n tee ta Bɨraɓet al.
17Elɨn ngekid ta lo Bɨraɓe
kɨndɔgbe anan:
A i ngahn lapia.
Kɨ deg tube'n ndulon go ta
kɨ ngarkamdt kɨ kõgkong, anan:
Nya mad kɨmajal a ɗasɨ al.
18Nõ ndɨ lo kɔjtat lo Bɨraɓe
kad oo, ke oo dɔ ta loa a?
Nõ nel mbin kɨdɔ tat loa kad oo dɔ a?
19Oo nél barwãi lo Bɨraɓe,
wong loa kɨtɔlsɔkɨr ndu
nel mal a so dɔ ngéɗamajalgt.
20Wong lo Bɨraɓe a duba al mbã
kad tɔlkon kɔjtaɗa kɨ kamɨnt.
A gerɨn gira maj kaglo kɨdɔboit.
21Ngekelta kɨta Luwaht'n ɗan,
mĩ Luwah, m'lad al,
na ãin ngɔd; m'eld ta al,
be kaa elɨn ta kɨtit ta kɨtamt be.
22Ĩla ndin lo kɔjtat lom a ne, ni adɨn
deg lom oon dɔ ta lom,
kad nyan go ɗob kɨmajal lod kɔ
kɨ kɨlaɗad kɨmajal.
23Mĩ Luwah kɨnderbe ale?
Takel Bɨraɓe,
mĩ Luwah kɨsãi tɔ ho ale?
24De asɨ yaron kɨkanj kad m'ooa a?
Titbe la i takel Bɨraɓe ye.
M'ɗoosɨ dɔrã kɨ dɔning ale?
Titbe la i takel Bɨraɓe ye.
25M'oo dɔ nya'n ngekelta kɨngom elɨn kam tɔmt anan:
M'nii, m'nii.
26Mbã ndɔ ɗi ngékeltag
a i nya takelta kɨta kɨ ngom a?
Ĩgɨn elɨn takɨbal kam tɔmt, elɨn ta
kɨngom kɨ ngarkamdt kɨdɔd.
27Deg'n ɗan ɔjɨn dɔdt kɨ n'adɨn kam deg
lom oi dɔ tɔmt kɨtakul nig lod in
dekɨɗen kudt ndɨ ɔrr hoia madɓen
tit'n kam bɔwdg oi dɔ tɔmt,
awɨn go yo Baalt.
28Ad ngekoonya kamndilt ɔrr girr nii lon,
na de'n aw kɨ ta lom kɨrota a ne, ada el.
Ɗi nda mũ nat kɨ nyako a?
Titbe la i takel Bɨraɓe ye.
29Ta lom i tit horr be ale?
Titbe la i takel Bɨraɓe ye.
Tit marto kɨ ngeto mbal kɔsɨkɔsɨ ale?
30Kɨtɔ 'nten Titbe la i takel Bɨraɓe ye. Oo m'ɔsɨ ta ngekelta kɨtamt.
Titbe la i takel Bɨraɓe ye.
Ĩgɨn ɓoogɨn tag, dekɨɗen kudt ro madɓent. 31Oo, m'ɔsɨ ta ngekelta kɨtamt ĩgɨn elɨn ta lod kɨdɔd, anan: Bɨraɓe el titbe. 32Oo, m'ɔs ta ngekel ni kɨngom.
Titbe la i takel Bɨraɓe ye.
Ĩgɨn elɨn taa adɨn deg lom son mut kɨtakul ta kɨ bal lod kɨ tag lod kɨbobo na mĩ, m'lad al, m'ndad mber al. A ɗan nya mad kɨ kara tot kɨta deg'n ɗan al.
Titbe la i takel Bɨraɓe ye.
Takel Bɨraɓe kɨ ɔi dɨrɨr
33Ĩla kɨkɨɗa ku degt'n ɗan ke ngekelta kɨta Luwaht, ke ngejanya mosɨ, ndɨjei an: Takel Bɨraɓe kɨ ɔi dɨrɨr i ɗi a? A i turd an: Takel Bɨraɓe kɨ ɔi dɨrɨr laten: M'a m'lasɨ kɔ.
34Na ngekelta kɨta Luwaht ke ngejanyamosɨ, ke kɨkɨɗa ku degt'n ɗan in ndɨ el an: Takel Bɨraɓe kɨ ɔi dɨrɨr. M'a m'gangta dɔat ĩn kɨ ngékɨɓe loa. 35Titbe la dekɨɗen a el madɓen, dekɨɗen a el ngonkõn to an: Bɨraɓe turta ɗi a? Bɨraɓe an ɗi a? 36Ot kelɨn ta dɔ takel Bɨraɓet kɨ ɔi dɨrɨr gog kɨta takel dekɨɗen kɨ ɔi dɨrɨr i ta loa kɨkɔsɨdɔa. I tujɨn ta lo Luwah Ngekumkajɨr, Bɨraɓe Ngekoosɨg, Luwah loj. 37Titbe la a i ndɨjen ngekelta kɨta Luwaht an: Ta ɗi Bɨraɓe turi a? Ke ta ɗi Bɨraɓe el a? 38Ĩla i elɨn anan: Takel Bɨraɓe kɨ ɔi dɨrɨr. Titbe takel Bɨraɓe: Kɨtɔ i elɨn ta 'nten anan: Takel Bɨraɓe kɨ ɔi dɨrɨr. Na m'la kɨla kɨrosɨt m'an: Ot kelɨn kan, Takel Bɨraɓe kɨ ɔi dɨrɨr. 39Kɨtɔ 'nten kamm a oi dɔsɨt na m'a m'lasɨ kɔ kɨ ɓebo ĩn m'adsɨ kɨ bɔwsɨg, m'a m'lasɨ sãi ko takum'mt. 40M'a m'nda rosɔl dɔsit kɨ kid kɨ tokɨnõt in kam deg a oi do al bat.
Currently Selected:
Jeremi 23: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
