Jeremi 22
22
1Titbe takel Bɨraɓe: Aw kuj kon ɓet lo ngar kɨ Juda, nu la a i elta 'nten, an: 2Oon dɔ ta lo Bɨraɓe, ĩ ngar kɨ Juda ngendɨ dɔ pong kõɓet lo Dabid, ĩn kɨ ngekɨlaɓer loi kɨ deg loi ĩgɨn andɨn kɨ tabitgt'n ɗan. 3Titbe takel Bɨraɓe; i gangɨn ta kɨ goɗobat kɨ kɨdene, i ajɨn de'n deg dan kuma ndo ji ngeɗatakõt. Ot dan kum mbah ndo ke ngonhal, ke nge ngawkoi, ot kũ mosɨ de kɨ kanj taakò lot'n ɗan, 4kɨta ĩla i ɗan kɨgo tat 'nten a ne, ngarg ngendɨ dɔ pong kõɓet lo Dabid a andɨn tabit kuj kõɓet'n ɗan, a alɨn pusɨg kɨ sɨndag, ĩn kɨ ngékɨlaɓerg lod kɨ deg lod. 5Na ĩla i ndigɨn koo dɔ ta 'nten al a ne, m'nda yo kɨdɔmt.
Titbe la i takel Bɨraɓe ye.
Kɨ kuj'n ɗan tel gotɓe. 6Titbe takel Bɨraɓe dɔ ngékɨɓet lo ngar kɨ Juda:
M'oo kúg kɨ Galaad majɨn ngãi
tit tasom mbalbo kɨ Libã romt,
Ta 'nten i ta kɨ rota,
m'a m'teli tit dɨlalo,
ɓebo kɨ de gotot.
7M'a m'kun ngenuj nya kad ndoorɨn,
dekɨɗen kudt aw kɨ nyakat lon,
a gangɨn kag sedɨrg loi kɨmaj tɔi,
a ũnd horro.
8Girrdeg ngãibe a tɔin kad ɓebot'n ɗan, a elɨna anan: Kɨtɔɗi Bɨraɓe ɗa nya kɨ titbe kɨ ɓe kɨbobe'n ɗan a? 9Na a turɨn anan: Kɨtɔ nyan kunkɔ lo Bɨraɓe lod, ɔsɨn dɔd ber nõ yogt, ɗan ɓer lod.
Ta kɨdɔ Salumt
10Ĩn deg kɨ Judat ot nõn
de'n oi ye, ad i ngar Josias
ot hɔn ndɔ kɨtɔa.
I nõn ngãi kɨta de'n ndɨ aw
kɨta de ndɨ awa ne a tel ɗe al,
a oo dɔning koojɨn gog al tɔ.
11Kɨtɔ titbe takel Bɨraɓe dɔ Salum ngon Josias, ngar kɨ Juda, in õbe got Josiast kɨ bɔwa na tee lot'n ɗan ko: A tel kɨ lot'n ɗan gog al ta.
12A oi dɔningt'n awɨn sia ber tit
na a oo dɔning'n ɗan gog al ta.
13Beto loi ĩ ngar Joakim
i ndɨ nda kuj kõɓe loi
dɔ nyaɗat kɨgoot al,
i ndɨ ɗa kuj kõɓe loi
kɨkanj tel roi go nyaɗat kɨ denesew
a i ɗa loi ad ngal puwuw kɨ dõ
kɨ kanj kookumtondo lo deg
ad deg ɗan kɨla adi'n kari
na ĩ ad'd nyabaji lod al.
14Na i gaa kamit an:
M'a m'ɗa kuj kõɓe mad kɨbo,
m'a m'ɗa kama mad tat
m'a m'ɗa burrolog tit,
m'a m'ut gida kɨ kag sedɨr,
m'a m'ɗa gida kɨ nduba.
15Kɨtɔ kĩ ngar la i ndɨ ɔjɨn oon roi tit kag sedɨr yo?
Bɔwi sanya ho, ãi man tit deg tube
Gangta dɔ degt kɨgoɗobat
gangta kɨ kɨdene ad maj urra.
16Naj dɔ deg kɨ ngéndog kɨ danggtg
go ɗobat na i kɨ ronel.
Bɨraɓe el an:
De'n ndɨ ɗa nya kɨ goɗobat titbe a ne,
ndɨ ɔj kad germ jeje ye.
17Na ĩ kumi kɨ ngarkami ndain kumndàt
ad i ndɨ ũ mosɨ deg kɔ kɨkanj ta
i ndɨ ɗa nya kɨlo ngetɔgt,
i ndɨ da kum deg ndo.
18Kɨtɔ 'nten, ta'n Bɨraɓe el dɔ Jojakimt ngon Josias, ngar kɨ Judat laten:
Lon a oi ye, a nõin al,
deg a ɔsɨn pa nõ hɔndo dɔ yoit al
de kɨ a el anan:
Beto lo ngonkom,
beto lo kõnanɨm.
De kɨ a nõi goto
de kɨ el anan:
Beto lo ngeem,
be to lo ngar loj.
19A duwɨna tit korro be,
a ndɔrɨn nina kɨtɨga
a lan nina gid ɓet kɨ Jerusalem.
20Jerusalem i ɓai aw Libã, i ko.
Un ndii kɨ dõ, kon dɔ dɔning Basant.
I ko dɔ mbalbo Abarimt
kɨta nujɨn ngetari tube.
21M'eli ta kaglot'n maj urrɨn,
na i el an: M'a m'oo dɔ al.
'Nten i kɨlaɗai kɨ basait nu
i oo dɔ ndim al.
22Ngengomdɔd tube a ĩn nyasa lo nél
Deg'n i gana sed
dɔ majalt kɨɗa a goton
na a awɨn sed ɓeɓert.
Kamla a ĩn kɨ rosɔl kɨ rokoi siw
kɨtɔ majal loi tube'n i ɗa.
23Tajigla ĩn ngendɨ Libãt,
ĩgɨn ɗan kuj dɔ kag sedɨrgt
tit ngo yel be,
titbãi a i ton ɗusɨɗusɨ
lon kamkɔl a tee dɔit
tit'n tokooj a hurɨn dekɨdẽ
yedeng ye be.
24Tit'n m'ndɨn kɨ dɔm dõ.
Titbe la i takel Bɨraɓe ye.
Ke Jekonia ngon Jojakim, ngar kɨ Juda, i ngon ninga kɨ jikõmt kaa, m'a m'ɔrra kɔ. 25M'a m'lai ji degt kɨ ngesah tɔli kɨ deg'n i ɓoold, ad i Nebukadnesar ngar kɨ Babilon kɨ ji Kaldeagt. 26M'a m'lai kɔ, ĩn kɨ kõi kɨ ngekooj, kam dɔningt mad kɨɗang, lot'n oojsɨn tit al. Lot'n non la a oint ye. 27Dɔning'n ɗan, a geen ngãi kad n'telɨn kɨ tit gog, na a ngahn lo tel al. 28Jekonia'n ɗan i jo kɨkid, i jo kɨ tɔɔ a? I nya'n deg oon kara al a? Kɨtɔɗi land ne ko ĩ kɨ ngakan kam dɔningt'n gerɨn al a?
29Ah dɔning. Dɔning, dɔning. Oo dɔ ta lo Bɨraɓe. 30Titbe takel Bɨraɓe: I ndang tɔ de'n ɗan maktubt, tit de'n ngana goto tit de'n maj a urra dɔ ndogt loa al kɨta koah kɨkɨɗa kɨmaj a urra kad ndɨ dɔ pong kõɓet lo Dabid kɨ õɓe dɔ Judat goto.
Currently Selected:
Jeremi 22: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
