Jeremi 21
21
Jeremi el Sedekias ta lo Luwah
1'Nten i ta'n tee kokɨro Bɨraɓet. Ɗe ro Jeremit lon ngar Sedekias la Pasur ngon Malkija kɨ Soponi ngon Maaseja ngejanyamosɨ roat kɨ elɨna anan:
2I kɔ Bɨraɓe kɨtatɔj kɨta Nebukadnesar ngar kɨ Babilon ndɨ ɗe ro dɔjt. Maj a ne, Bɨraɓe a ɗa sej kɨlaɗan kɨ yaya kad Nebukadnesar ɔr ron ko rojt.
3Jeremi turd an: A i elɨn Sedesias titbe, 4Titbe takel Bɨraɓe Luwah lo Israel: M'a mad nyaɗɔɔ kɨjisɨt kɨ i ndɨ ɗɔɔn ne kɨ ngar kɨ Babilon kɨ Kaldeag ĩgɨn gugɨn dɔsɨ gid ndogbɔrrt kɨ ngang, nyarog 'nten m'a m'tel m'kawd tube kɨ dan ɓebot'n ɗan. 5Kamla m'a m'rosɨ kɨ ji kɨkun kɨ dõ kɨ tɔg, ji kɨngang kɨ wong kɨ wong kɨ tɔlsɔkɨr kɨ wong kɨngãi. 6M'a m'nda ngendɨ ɓebot'n ɗan, deg kɨ dãg, a oin kɨta yokoosɨ kɨbobe. 7Goot gog, kel Bɨraɓe, m'a m'la Sedesias ngar kɨ Juda nat kɨ ɓerg loa kɨ ngendɨ ɓebot'n ɗan ĩgɨn ten ta yo koosɨt, ta nyakat't kɨ bo, ji Nebukadnesar ngar kɨ Babilon kɨ ji madngétadg kɨ deg ĩgɨn ndɨ sahn tɔld. Nebukadnesar a tɔld kɨ kiyaɗɔɔ a ɔrrd kɔ al, a oo kumtondo lod al, ta a oon kama kɨtad al tɔ.
8A i el deg'n ɗan an: Titbe kel Bɨraɓe; Oon m'a m'la ɗob kaj kɨ ɗob koi nõsɨt. 9Ndeg deg kɨnãi kam ɓebot'n ɗan a oin koi nyakat kɨ bo kɨ yokoosɨ na de in tee aw ro Kaldeagt ĩgɨn gugɨn dɔsɨ kɨ ɗɔɔ a ne, a aj. Kumkajir loa a i tit nyatetɗɔɔ loa be. 10Kɨtɔ m'nda kammt kad m'ɗa majal kɨ ɓebo'n ɗan na i maj kɨɗa al.
Titbe la i takel Bɨraɓe ye.
A lan ɓebo'n ɗan ji ngart kɨ Babilon kad laa horr. 11A i el ngekɨɓe lo ngar kɨ Juda an:
Oon dɔ ta lo Bɨraɓe.
12Ĩ ngékɨɓe lo Dabid,
titbe takel Bɨraɓe:
I gangɨn ta kɨdenesew kɨsĩ ritit,
ajɨn ĩgɨn dan kumd ndo
ji ngeɗatakõt
na ɓeta wong lom ndu bip
tit horr in oon,
tit horr kɨ dum tɔl,
kɨta kɨlaɗasɨ kɨ majal.
13Oon, mĩ m'ɔsɨsi ta,
ĩn ngendɨ hollot
kɨ ngendɨ dɔ mbalt kɨ dɨlambot.
Titbe la i takel Bɨraɓe ye.
Ĩn ngekel kan:
Nõ a ɗe ɗɔɔ sej a?
Nõ asɨ ɗe kam londɨjt a?
14M'a m'ɔjsɨ kuma kɨgo kɨlaɗasɨt,
kel Bɨraɓe.
M'a m'la horr dɔ kut losɨ kad õ
nyag tube kɨ gug dɔa.
Ta kɨdɔ ngékɨɓet lo ngar.
Currently Selected:
Jeremi 21: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
