Jeremi 2
2
Israelag nyan ɗob lo Bɨraɓe
1Bɨraɓe elɨm an: Aw, i la mber ta 'nten kɨ mbi degt kɨ Jerusalem an:
2Kamm ga dɔ kamkẽt loi kɨ maɗi
lon ĩn kɨdui ɓaitɔ, i tarɨm
lon m'hɔn dɔi ye, i geem ngãi.
I ndulon gom kam dɨlambot,
dɔningt kɨ nyako gotot.
3Israel i kɨjaɓat kɨta Bɨraɓe,
i kandnya loa kɨdasa,
deg tube'n tɔn koah a ne,
takɨgang i dɔdt a ngahn kõ,
kel Bɨraɓe.
4Oon dɔ ta lo Bɨraɓe
in ngékɨɓe lo Jakob tube,
girrkooj ngékɨɓe lo Israel.
5Bɨraɓe el an:
Ɗagootal kɨ titbãi
bɔwsɨg ngahn kammt
kad tɔrrɨn ne rod kɔ romt
awɨn go nyagt kɨpãbe
kad telɨn nya kɨpãbe ho a?
6Elɨn anan:
Bɨraɓe kɨ nge tee sej dɔning Ejipt't ye
i ɗah al a?
Ngekɔrrj ta ɗob kam dɨlalot,
kam dɔningt kɨ tut kurum,
kɨ holɓeg ngãi, dɔning kɨ man gotot
dɔning kɨ diw dĩ,
dɔning kɨ de nda gang al,
de ndɨt al tɔ ho.
7M'ɗe sesɨ kam dɔning majkurrt
kad i san kanda,
kɨ nyag loa kɨ majmaj,
na lon i ɗent woi, i yerrɨn kɨ dɔning lom,
adɨn nyakagɓe lom tel kɨyerr tɔ.
8Ngéjanyamosɨ elɨn anan: Bɨraɓe i ɗa al a?
Ngéndoodeg mberkɨnda germɨn al.
Ngéngombatg tɔin dɔ tag lom,
ngékelta kɨtamt ndɔ'n ndil kam tɔ Baalt,
awɨn go nyagt kɨ majd goto.
9Kɨtɔ 'nten m'a m'kɔl sei dɔ tat ɓaitɔ,
m'a m'kɔl kɨ ngan ngansɨg.
Kel Bɨraɓe.
10Awɨn dɔ doorgt kɨ Kɨtim,
i nɔlɨn. I lan ngombangkɨla Kedar,
i nɔl, oon maj, deg'n non kɨlaɗad tit losɨ a?
11Girrdeg madg ĩn nõ
mbelɨn luwahg lod a?
Na luwahg'n non ĩn luwahg kɨjeje al.
Na deg lom mbelɨn tɔko lod
kɨ nya kɨ maja goto.
12Ah dɔrãg, adɨn kɨngasa gasɨ,
adɨn rosɨ ndad kɨ ɓool kɨtɔlsɔkɨr.
Kel Bɨraɓe.
13Kɨtɔ deg lom ɗan majal joo
nyàmɨn kɔ
mĩ loɓa man kumkajir,
na ɓah'n jo man kɨ to kɨta rod
ĩgɨn a ngomɨn man al.
14Israel i ɓer kɨ ndugona
a ke i ngon kɨkooj ɓe a?
Kɨtɔɗi tirɨna pur tit'n nyatetɗɔɔ be
15Bal tubog lan ndid kon ne kɨdɔat,
nujɨn dɔning loa, adɨna tel kam mũ.
Lan horr ɓebog loa, ad ngendɨt goton.
16Kɨ tɔi 'nten, deg kɨ Nop kɨ deg
kɨ Takpanes tɔn kadɔi.
17Nyag 'nten tube teen dɔit
kɨta i nyàgo Bɨraɓe Luwah loi
lon ndɨ ɔrri ta ɗob kam ɗobt kɨmaj ale?
18Tajigla,
kɨtɔɗi i un ɗob kaw Ejipt't
kɨta kãi man bah Nil a?
Kɨtɔɗi i aw Asiri
Kɨtɔ kãi man bah Eprat a?
19Majal loi a nda ɔji,
telrogotat al loi a ɔji kuma.
Asɨ kad i ger na i oo to,
i nya kɨ majal kɨ kɨkatbang
kad i nyàgo Bɨraɓe Luwah loi
na i ɓoolm al bat,
kel Bɨraɓe Luwah Ngekoosɨg ye.
20Maɗi nu i tet jug kɨ kɔit,
i gang kɨla dɔi kɔ. I el an:
M'a m'ɗa ɓer loi gog al ta.
Na dɔ door lot kɨ dõ kɨɗen
kɨ girr kag kɨmbool kɨɗen
i la dɔi ber tit kaya dekɨdẽ be.
21Mĩ m'hɔi tit dĩ nduu kɨmaj ngãi,
tit kumnya kɨmaj.
Titbãi i mbel,
i tel tit dĩ nduu kɨ mut be a?
22Ke neni i tugo roi kɨ sabõ kɨmaj,
ke i tugo roi kɨ sabõkat ngãibe kaa ne,
ɗagootal loi to tɨga wang nomt.
Kel Bɨraɓe Luwah ye.
23Kɨtɔɗi i el an:
Mĩ kɨyerr al m'ndulo go Baal al a?
I nɔl bangnjai kam hollot oo,
na i ger nya kɨ i ɗa.
Ĩ lukum kɨ ngenda kɨ log papa
24kõ korro kɨmut in londia
i kam dɨlalot koon.
Ɔrr see bɔw ko ro kam nélt
kɨta nyura ndɨ õa.
Nõ ɔga tɔlkon nyurkõ loa a?
Ngesah goa tube,
kɔr a ɗad al a ngahna kari kaglot loa.
25I ngom njai maj
na ɓeta i ndia njai kari,
ot kad kɨndaman tut kɔi,
na i el an:
à ã, kari kɨndang
kɨta m'ndig yog kɨmbah,
m'a m'aw godt.
26Tit ngeɓoog in roa sɔla
lon hɔna dɔ ɓoogt,
titbe tɔ la rosɔl a ɗan ngekɨɓe lo Israel,
ĩn kɨ ngarg lod kɨ mbaiɓeg lod,
ngejanyamosɨ lod
kɨ ngekelta kɨ ta Luwaht lod.
27Ĩgɨn elɨn kag anan:
Ĩ bɔwj. Elɨn mbal anan:
ĩla ooj'j. Turɨn gid'd admɨn
na takumd al.
Na lon kamkɔl ɗad,
a kon anan: I ɓai aj'j.
28Yog loi kɨ i ɗad kɨta roi ye,
ĩn ɗah a?
Ad ɓai ajsɨn
kaglo kamkɔlt loi.
Ah Juda, yog loi i in ngãi
tit ɓebog loi ho.
29Kɨtɔɗi i ndɨ gakmɨn nea?
Ĩn tube, i taamɨn ɗɔɔ.
Titbe la i takel Bɨraɓe ye.
30M'nda m'ɔj ngansɨg na i kari kɨndang,
turɨn go ndakɔj al.
Kiyaɗɔɔ losɨ tɔl ngekelta kɨta Luwaht
tit tubo kɨ ngenuj nya be.
31Ah ngaka deg kɨ ɓone,
oon dɔ ta lo Bɨraɓe maj.
M'tel dɨlalo kɨta Israelt a?
A ke ɓe lo til
Kɨtɔ ɗi deg lom elɨn ne anan:
Jĩ deg kɨ taa nyã dõ
j'a kɨ tel kɨroit gog al a?
32Kam ngomand
a oi dɔ nya pare ron e?
Ke dekɨdẽ ngetangawkij,
kama a oi dɔ kub tana loa a?
Na deg lom, kamd oi dɔm
ndɔg ngãibe, de asɨ da kɔra al.
33Rota i ger go ɗobg ngãibe
kɨta sahn go ngéndigi,
mbã i ndoo dekɨdẽg
ngeɗamaj al ɗobg loi.
34Titbe ta kub loi
Ngah mosɨ de kɨdangt
kɨ de ta lod goto ta kubtloi,
De'n i hɔd dɔ ɓoogt al.
35Titbe kaa el an:
M'ɗa majal al.
Rota wong loa goto dɔmt.
Lon i el ye titbe
Oo, m'a m'aw sei
lo takɨgangt kɨta el an:
M'ɗa majal al.
36Kɨtɔɗi i ndian
kɨ log kad i mbelɨn ɗob loi a?
A i ngah rosɔl Ejipt't
tit'n i ngahn rosɔl Asirit ye be ho?
37Lot'n non a i tee kɨ ji kɨkũ dɔit,
kɨta Bɨraɓe mbet deg'n i ɓakuld.
A i ngah majkurr rodt al.
Currently Selected:
Jeremi 2: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
