Jeremi 1
1
Luwah kun Jeremi kɨta kɨla
1Tag lo Jeremi ngon Hilkɨja, kɨkɨɗa ku ngejanyamosɨt ĩgɨn ndin Anatot kam dɔning Benjamit.
2Ta lo Bɨraɓe ɗe ro Jeremit kaglot lo Josias ngon Amon, ngar kɨ Juda kam ɓalt kɨkɨlah gidaimɨta lo kõɓe loa. 3Ela ta ɓaitɔ kaglot lo Jojakim ngon Josias, ngar kɨ Juda. Elata ɓaitɔ kam naht kɨmi lo ɓal kɨkɨlah gidaikɨɗa lo Sedekias ngon Josias, ngar kɨ Juda kam ɓalt'n non la ngéndɨ Jerusalem awɨn ɓert. 4Ta lo Bɨraɓe ɗe romt an:
5M'geri kete lon
m'ɓain kam kõit al ɓaitɔ,
lon i teen kam kõit kɨtɨga al ɓaitɔ,
m'ndai kɔtkokɨɗa
kad ĩ ngekelta
kɨtamt kɨ ro girrdegt.
6M'tur m'an:
Ah Bɨraɓe Luwah,
m'ger kelta al kɨta mĩ ngon ɓaitɔ.
7Na Bɨraɓe turɨm an:
Ot kel kan, mĩ ngon
na a aw kɨ log tube'n
m'a m'lait
a eld ta tube'n
m'ndai mbera.
8Ot ɓoold
na mĩ nat sei kad m'aji,
Titbe la i ta'n Bɨraɓe elɨm.
9Kamla la jin ɔdɨn tam,
el an:
Oo, m'nda ta lom tait.
10Oo, ɓone m'adi tɔg dɔ girrdegt
kɨ kõɓeg kad
i retd ruprup, i tɔd kɔsɨkɔsɨ,
kad i nujd, i tɔsɨ i tɨlad,
kad i ndad gog, i hɔd ningt.
11Ta lo Bɨraɓe elɨm an: Jeremi, oo ɗi a? M'tur m'an: M'oo dɔj kag amand. 12Kamla Bɨraɓe elɨm an: Oo maj, kɨta m'ndɨ m'ngom go ta lom kɨ tɔl kõna.
13Ta lo Bɨraɓe ɗe romt kɨkõjoo an: Oo ɗi a? M'tur m'an. M'oo jo mad ndɨ leg na jo'n non tel kɨ ɓodo.
14Bɨraɓe elɨm an:
Ko ɓodo la nyakɨto a ɓait,
so dɔ ngéndɨ dɔningt'n ɗan tube ye.
15Oo m'a m'kun girrdeg
kɨ kõɓeg kɨ dang dang kɨ ɓodo,
kel Bɨraɓe.
A ɗen,
ngar dekɨɗen a nda pong kõɓe lon
ta tabitgt kɨ Jerusalem.
A gugɨn dɔ ndogbɔrrgt loa,
gug dɔ kɨ kɨnõ ɓebogt
kɨ Juda tube.
16M'a m'elta dɔ tat kɨngang lom
kɨ dɔdt kɨtɔ majal lod
kɨta nyàmɨn kɔ,
lan horr nyag
kɨkootmbĩ adɨn yog,
ɔsɨn dɔd ber nõ kɨlaɗa jidt.
17I ɓai dõ i dɔɓoi
na eld tag tube'n m'ndai mbera.
Ot ɓool na ɓeta a ne,
m'adi ndahd nõdt.
18Oo, ɓone m'ndai tit ɓebo kɨngang
dɔ dɔningt kɨtaagbe tit pilie hand,
tit ndogbɔrr ningakasɨ,
nõ ngargt kɨ Juda
kɨ mbaiɓeg loa,
kɨ ngéjanyamosɨ loa,
kɨ ngéndɨ
dɔningt'n non ho.
19A ɗɔɔin na a tetɨn ɗɔɔ al,
kɨta m'a mĩ sei nat kad m'aji,
kel Bɨraɓe kɨ Ngetɔg tube.
Currently Selected:
Jeremi 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
