Jeremi 19
19
Juda i tit jo kɨ tɔ
1Titbe Bɨraɓe el Jeremi an: Aw, i ndugo jo ro ngeɓajot na oi kɨbog lo deg kɨ kɨbog lo ngejanyamosɨ nat sei. 2Aw hollot lo ngon Hinom in i nderbe kɨ tabit lo Ngeɓajog. Nu la a i la mber ta kɨ m'a m'eli. 3A i el an: Oon dɔ ta lo Bɨraɓe ĩn ngarg kɨ Juda kɨ ngéndɨ Jerusalem. Titbe takel Bɨraɓe Ngekoosɨg, Luwah lo Israel, Oon, m'a mad nyakɨto so dɔ lot'n ɗan, de kɨ ɗen in mbia oo dɔ a ne, ndila a tee saw. 4Kɨtɔ nyàmɨn kɔ, yerrɨn kɨ lon ɗan, lan kadkari nya kɨkootmbĩ adɨn luwahg kɨɗang ĩgɨn bɔwdg ke ngarg kɨ Juda gerɨn al adɨm mosɨ deg kɨ kanj ta dɔdt ɗoosɨ lon ɗan. 5Ɗan log kɨ dõ adɨn yo Baal kɨ n'lan ngandg kadkari kɨlahorrt n'adɨn Baal, nya'n m'ndad mbera al ho, m'eld taa al ho, m'ga kamm dɔt al tɔ. 6Kɨtɔ 'nten, oon, ndɔg ndɨ ɗen nõ.
Titbe la i takel Bɨraɓe ye.
A kunɨn tɔ lon ɗan Topet ke hollo lo ngon Hinom gog al ta, na a kunɨna hollo tɔl deg. 7M'a m'nuj takɔj lo deg kɨ Juda kɨ deg kɨ Jerusalem kɔ, m'a m'ad'd son ta nyakat't nõ madngétadgt kɨ ji degt ĩgɨn ndɨ sahn ɗob tɔld nõ, m'a mad nind tel nyasa yelg kɨ dõ kɨ dãg kɨ dɔningt. 8M'a mad ɓebo'n ɗan tel nya kɨtuj kɨ nya godɔt, deg tube nge tɔi lot'n non, a yad biw, a kɔrɨn ngol dɔt kɨta tuj kɨ tee dɔat. 9M'a m'ad'd san dã ngandg kɨdɨngã kɨ kɨdẽ na dekɨɗen kudt a sa dã madɓen kam jarongot kɨ kamkɔl, nya'n madngétad kɨ deg ĩngɨn ndɨ sahn tɔld a ɗen ne dɔdt. 10Kamla a i to jo'n non ta kum degt ĩgɨn awɨn nat sei? 11A i eld an: Titbe takel Bɨraɓe Ngekoosɨg; Titbe la m'a m'ton deg'n ɗan kɨ ɓebo'n ɗan kosɨkosɨ tit deg a ton ne jo lo ngeɓajo na de a asɨ ɗaa gog al. A duwɨn nin ngékoig kam Topet't kɨta lo mad kɨta dub nin goto. 12Titbe tɔ la m'a m'ɗan kɨ ɓebo'n ɗan kɨ ngendɨt.
Titbe la i takel Bɨraɓe ye.
M'a mad ɓebo tel tit'n Topet. 13Kujg kɨ Jerusalem kɨ kujg lo ngarg kɨ Juda a telɨn kɨyerr tit lo kɨ Topet be, ad i kujg tube ĩn lan nya kɨkootmbĩ adɨn koosɨg kɨdɔrãt tube dɔt, na mbelɨn kadkari nyakãi adɨn yog.
14Kamla Jeremi ɓai Topet't, lo in Bɨraɓe laat kad elta kɨtant, tel ɗa kam natlot nõ kujt lo Bɨraɓe, el deg tube an: 15Titbe takel Bɨraɓe Ngekoosɨg. Luwah lo Israel: Oon, m'a mad kamkɔl ɗe dɔ ɓebot'n ɗan kɨ ɓeg loa tube, ad i kamkɔl'n m'eltaa kɨta ngɨran god na ndigɨn koo dɔ tag lom al.
Currently Selected:
Jeremi 19: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
