Jeremi 18
18
Terrtag dɔ ngeɓajot
1Ta lo Bɨraɓe'n el Jeremit, el an: 2I ɓai dõ, aw ɓe lo ngeɓajo. Nu la m'a m'adi i oo dɔ ta lom tit ye. 3M'ɓai m'aw ɓe lo ngeɓajo na oo, ndɨ ɓa jo, 4na jo'n ndɨ ɓaa ye nuj jiat, ad tel ɓa jo kɨɗang tit'n kama ndig. 5Kamla ta lo Bɨraɓe ɗe romt an: 6Ah, ĩn ngékɨɓe lo Israel, m'asɨ ɗasɨ tit'n ngeɓajo ɗan ye ale? Takel Bɨraɓe. Oon, ĩn kam jim tit'n jo ĩn kam ji ngeɓajot ye be, titbe tɔ la ngékɨɓe lo Israel ĩn kam jimt. 7Ĩla kaglo mad m'elta kɨ girrdeg ke kõɓe mad kad m'neta ruprup kɨ tɔa kɔsɨkɔsɨ kɨ nuja, 8na ĩla girrdeg'n m'elta loa nõ tel nyàgo majal oon a ne, m'a m'nyago majal'n m'ɔj kammt kɨ m'ɗa sia tɔ ho. 9Ĩla kaglo mad m'elta kɨ girrdeg ke kõɓe mad kad m'ɗaa kɨ dõ kɨ m'hɔa tit kag be 10na ĩla girrdeg'n non ɗa nya kɨmajal takum'mt, oo dɔ ta lom al ho a ne, m'a m'nya ta ɗamaj kɨ m'ɔj kad m'ɗa sia nõ ho. 11Tajigla i el deg kɨ Juda kɨ ngéndɨ Jerusalem an: Titbe takel Bɨraɓe: Oon, m'ndɨ m'ɗa go nya kɨmajal kad ɗe dɔsɨt, m'ɔj ta ndoorsɨ na i telɨn, ad dekɨɗen kusɨt nya ɗob lon kɨmajal kɔ, i ɗan ɗobg losɨ kɨ kɨlaɗasɨ kɨ kij gog. 12Na elɨn anan: Kari kɨndang, j'a kɨ ndulo go tagahj, j'a kɨ ɗa kɨgo takɔjt loj, de kɨɗen kuujt kɨgo kamat kɨ kõgkong, kɨ majal. 13Kɨtɔ 'nten, titbe takel Bɨraɓe: I ndɨjen ku girrdegt ke nõ oo dɔ nya kɨ titbe a? Ngomand Israel ɗa nya kɨyerr ngãi. 14Neij kɨ dɔning Libã a goto tasom mbalbot a?
Ke i oo an: Man kɨsɔl in ndɨ nun,
ɗe ko sãi ye, a yii a?
15Na deg lom,
kamd oi dɔmt
lan horr nõkag kɨkootmbĩ
adɨn yog kɨpãbe
ad ĩn kɨbeg gan njad gigt,
nyan ɗob lod kɨmaɗi,
ton ɗob, unɨn ɗob kɨ dang dang
na ɗob kɨjeje al.
16Ad dɔning lod tel nya kɨtuj
kɨ nyagadɔt mbãkɨnõt,
tube ĩgɨn tɔin lot'n non
a yad biw ad bin dɔd.
17M'a m'tɨnda m'tĩd
kɨ log tube nõ madngétadt
tit nél kɨ ɓai ko loɓakàdt,
m'a m'tel gidɨm m'ad'd
na m'a m'ad'd oon takum'm al
m'a m'ood kam ndɔ kamkɔlt.
Deg sahn tɔl Jeremi, ad Jeremi elta kɨ Luwah
18Deg elɨn anan: I ɗen, ad kɨ lan ta ber ndoorɨn Jeremi kɨta mberkɨnda a tuj ro ngejanyamosɨt al, ke takɔj kɨta ngeterrt, ke ta kɨta ngekelta kɨta Luwaht. I ɗen ad kɨ ndana kɨ ndonj, ot kad kɨ turɨn go ta loa. 19NA ĩ Bɨraɓe,
i nel mbi oo dɔ ta lom
na oo dɔ ndi ngendoorɨm.
20A telɨn kɨ majal gan ne got maj a?
Kɨta urɨn ɓe kɨtakad nujɨmɨn tit.
I gah dɔt tit'n m'ɗan nõit,
m'el sei ta kɨmaj kɨtatɔd
kad i un wong loi dɔdt kɔ.
21Kɨtɔ 'nten i la ngandg ta ɓot,
i ũd ta nyakat't,
ad nẽdg nalɨn ngang,
ad telɨn ngengawkoig,
ad ngawdg oin,
ad kiyaɗɔɔ tɔl basag lod lotot.
22Ad deg oon dɔ ndi nõ
kam kujt lod
lon a i ɗe kɨ ɓut ngéɗɔɔ
kɨdɔdt kanangbe
kɨta urɨn ɓe kad m'sot,
yan gum kɨta hɔn njam.
23In Bɨraɓe, i ger ta lod kɨ lan ber
kɨta tɔlmɨn nõ ɓet.
Ot nyàgo ɗagootal lod,
ot bɔr majal lod kɔ nõit.
Ad tɔsɨ tɨland nõit,
i ɗa sed nyakɨto
dɔ ndɔ wongt loi.
Currently Selected:
Jeremi 18: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
