Jeremi 17
17
Judag ĩn ngeɗayo
1Majal lo Juda i kɨndang
hand in taa i mbal diamãt,
kɨndang dɔ bar ngarkamd kɨ kɨdɔ gaj
dɨngɨrt lod.
2Tit in bɔw ndɨ gan dɔ
nganɨnt ye, ĩn to ndɨ gan dɔ dɨngɨr
kadkarigt kɨ kɨdɔ ɓakumta yo
Asrartegt lod girr kag kɨmbool kɨɗen
kɨ doorlog kɨ dõ.
3Mbalbo lom in ɗa dɨlalot,
m'a m'lai ji ngetirrnyat nat kɨ
nyamajg loi kɨ nyangahg loi tube dɔ
logt kɨ dõ kɨtɔ majal loi
kam dɔningt kɨtaagbe.
4I tuj nyakagɓe loi in m'adi
kɨta ɗagootal loi na m'a m'adi ɗa kɨla
ber lo madngétai kam dɔningt kɨ i
ger al kɨta i sɔkɨ wong lom kɨtɨngabil
na a oon kɨndɔgndɔg
5Titbe kel Bɨraɓe: Ndɔl i dɔ det'n
ndɨ ɓakul de,
in ndah kamɨn dɔ dãrot, in ngar
kama nyã Bɨraɓe kɔ.
6I tit de kɨdangt kam dɨlalot,
a oo majkurr'n a ɗe al.
Ndɨ kam dɨlalot, lot kɨtut kurum,
dɔning kat in de gotot.
7Ngeronel la i de'n ndɨ ɓakul Bɨraɓe ye,
nya ndahkamdɔt loa i Bɨraɓe.
8I tit kag kɨ hɔ ta mant be,
ad ngɨra aw kɨ lo nũ mant,
a ɓool lo kɨtɨnga in ndɨ ɗe al,
mbia to mbool,
kam ɓalt'n ndɨ hɔ la kaa,
ɓool a ɗaa al,
nya ta kand al.
9Ngarkam de i ngegool tɔi ndeg
nyag tube?
Majal ngãi, nõ asɨ gera a?
10Mĩ Bɨraɓe, m'nan ngarkam m'oo,
m'ndio kam de
kad m'ba dekɨɗen kɨgo nyaɗaat, kɨ
go kand kɨlaɗaat.
11Tit kere in to dɔ kawt kɨ la al,
titbe tɔ de'n ngah nyamajg kɨlo ndokumt,
kam ndogt loa ye nyamajg'n non a tɔin kɔ
dɔboi de'n non i ɓood.
12Pong kɔsɨgon kɨtɔi kɨ dõ
loyaɓoodat nu
i loyaro loj.
13Ah Bɨraɓe,
ĩ nya ndahkamdɔt lo Israel,
tube'n nyain kɔ a ĩn kɨ rosɔl.
Ĩgɨn mbetɨn a ndangɨn tɔd dɔningt ne
kɨta mbetɨn Bɨraɓe kɔ
ĩn ĩ lo ɓa man kumkajir.
14I yootɨm Bɨraɓe, na m'a mĩ kɨyoot,
ajɨm na m'a mĩ kɨkaj
kɨta ĩla in nyandub lom ye.
15Oo, ndɨ elɨn anan:
Ta lo Bɨraɓe i ɗah a?
Ad ɗe tajigla.
16Na mĩ, m'tel rom goit, m'mbet
kul nyakulg al,
i ger, m'ndig ndɔ kɨmajal al,
nya kɨ tee tamt ye to kɨtɨga takumit
17Ot kad i tel nya
kɨkootɓool romt,
in loyaro lom dɔ ndɔ kamkɔlt.
18Ad ngedarom ndo ĩn kɨ rosɔl
na kad mĩ kɨ rosɔl al
ad rod ndad na kɨ rom ndad al.
Ad ndɔ kamkil ɗe dɔdt, i nujd kɨ
nuj dɔnat joo.
Ta kɨdɔ ndɔ taakòt.
19Titbe la Bɨraɓe elɨm an: Aw, i ɗa tabit't lo deg, lo in ngarg kɨ Juda a andɨn ne ho, a teen ne ho nõ, kɨ tabitg tube kɨ Jerusalem. 20A i eld an: Oon dɔ ta lo Bɨraɓe ĩn ngarg kɨ Juda kɨ Judag tube kɨ ngéndɨ Jerusalem tube, ngekand tabitgt'n ɗan. 21Titbe kel Bɨraɓe: Oon go rosɨ maj, ot ton nya dɔ ndɔ taakòt, ot kandɨn kɨ nya tabitgt kɨ Jerusalem. 22Ot kunɨn nya to kam kujgt losɨ teen ne kɨ tɨga dɔ ndɔ taakòt, ot ɗan kɨla mad na i ngomɨn ndɔ taakò kɨjaɓat tit'n m'ndan mbera bɔwsɨg. 23Na oon dɔ al, nelɨn mbid al, ngɨran god na ɓeta n'oon dɔ ndim kad n'taan ne takɔj. 24Na ĩla i oon dɔ ndim maj.
Titbe la i takel Bɨraɓe ye.
Na andɨn kɨ nyato tabitg kɨ ɓebo'n ɗà dɔ ndɔ taakòt al, i ngomɨn go ndɔ taakò ad i kɨjaɓat, i ɗan kɨla mad ndɔt'n non al a ne? 25Kamla ngarg kɨ mbaiɓeg a andɨn tabitg kɨ ɓebot'n ɗan kad ndɨn dɔ pong kõɓet lo Dabid, a alɨn pusɨg kɨ sɨndag, ĩn kɨ mbaiɓeg lod, deg kɨ Juda kɨ ngéndɨ Jerusalem, na deg a ndin ɓebot'n ɗan mbãkɨnõt. 26A ɗen ko kam ɓebogt kɨ Juda kɨ log kɨ gugɨn dɔ Jerusalem kɨ dɔning Benjami kɨ hollog kɨ mbalbo kɨ ko jikõ kad ɗen kɨ kadkari kɨlahorrt kɨ kadkari kɨjakɔ kɨ kadkari nduj kɨ nõkag kɨkootmbĩ kad lan kadkarig, ndubɨn ne Bɨraɓe kam kujt loa. 27Na ĩla i oon dɔ ta lom kɨ m'ndasɨ mbera al, i ngomɨn ndɔ taakò kɨjaɓat al, i ton nya andɨn ne tabit kand Jerusalem kɨ ndɔ taakò a ne, m'a m'la horr tabit kand ɓebot kad horr oon kuj kõɓeg kɨ Jerusalem na horr a oi.
Currently Selected:
Jeremi 17: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
