Jeremi 16
16
Jeremi a ta dekɨdẽ al kɨta kaglo kamkil
1Ta lo Bɨraɓe'n elɨmt an: 2A i ta dekɨdẽ al na ɓeta oojɨn ngan kɨdɨngã ke kɨdẽ kam lot'n ɗan. 3Kɨtɔ titbe takel Bɨraɓe dɔ ngan kɨ dɨngãgt kɨ kɨdẽg ĩgɨn oojɨnd nẽbe kɨ dɔ kondigt ngekoojd kɨ kɨdɔ bɔwdgt ngékoojd kam dɔningt 'nten. 4A oin koi kɨmajal, a nõnd al ho, a dubɨnd al tɔ ho. A ton tit ɓirɓit kɨdɔningt, a tɔlɨnd kɨ nyakat kɨ bo kɨ kõ, nind a i nyasa lo yelg kɨ dõ kɨ dãg kɨmut. 5Titbe takel Bɨraɓe: Ot kaw kam kuj hɔn ndot, ot non ot ɗa kamkil nat sed kɨta m'un lapia lom ro degt'n ɗan ko.
Titbe la i takel Bɨraɓe ye.
Kamkẽ lom kɨ kookumtondo lom. 6Deg kɨbo kɨ kɨdu a oin kam dɔningt'n ɗan na de a dubd al, a nõd al tɔ. A jan rod kɨtatɔd al, a ngɨsen dɔd al tɔ.
7De a sanya lo nõ hɔndot kad sɔlɨn kam de dɔ koit al, a adɨnd kop sɔlkam kɨta bɔw ke kɨta kõ al tɔ. 8Ot kand kam kuj mburnamt kad i ndɨ nat sed, sa ho, ãi ho, 9kɨta titbe takel Bɨraɓe Ngekoosɨg Luwah lo Israel: Oo, kam lot'n ɗan kɨtakumsɨt, kam ndogt losɨ, m'a mad ndɨ ko ro nel kɨ kamnda lo ngetaa dekɨdẽkɨj ke ndɨ ko ronel lo ngetangawkij goto. 10Lon i ɔr hoita 'nten tube ro degt'n ɗan a ne, a ndɨjein anan: Kɨtɔɗi Bɨraɓe la kɨ nyakɨto kɨbobe 'nten kɨ dɔjt a? Ɗagootal loj i ɗi a? Majal kɨ ɗi kɨ ɗa ndoorɨn Bɨraɓe Luwah a? 11Kamla a i turd an: Bɔwsɨg nyàmɨn kɔ.
Titbe la i takel Bɨraɓe ye.
Na awɨn go yogt. Ɗan ɓer lod, ɔsɨn dɔd ber nõdt. Nya mĩ ko na ngomɨn go mberkɨnda lom al. 12Na ĩng, i ɗan majal tɔi kɨ lo bɔwsɨg ɓaitɔ, dekɨɗen kusɨt aw go tagahnt kɨmajal kɨ kamɨnt kad oo dɔ ta lom al. 13M'a m'lasɨ ko kam dɔningt 'nten, m'a m'lasɨ kam dɔningt kɨ ĩn, ke bɔwsɨg, gerɨn al. Nu la a i ɗa ɓerlo yog tit, ndɔ ho, kada ho, kɨta m'a m'ɔjsɨ kamkẽ al bat. 14Kɨtɔ 'nten, oo, ndɔg ndɨ ɗen nõ.
Titbe la i takel Bɨraɓe ye.
Lon deg a elɨn anan: Bɨraɓe ndɨ kɨ dɔ dõ, a elɨn be al, Bɨraɓe kɨ nge tee kɨ Israelag ko kam dɔning Ejipt't. 15Na deg a elɨn anan: Bɨraɓe ndɨ kɨ dɔn dõ, ĩn kɨ nge tee kɨ Israelag ko kam dɔningt kɨjigel kɨ dɔning kɨɗen in tuɓadt. M'a m'tel sed gog kam dɔningt lod in mad bɔwdg. 16Oo, m'ndɨ m'la kɨ koosɨ nawg, kel Bɨraɓe, kad hɔsɨn tit kanjg be. Goot gog m'a m'la kɨ koosɨ ngendõg kad awɨn dõ dɔ mbalbogt tube kɨ doorlog tube kɨ bulombalg kad hɔnd. 17Kɨtɔ kumm ndɨ oo kɨlaɗadg tube, ĩn kɨyarɔ ta kummt al, ɗagootal lod to tɨga wang takum'mt. 18Dasabang m'a m'ɓad kɨta ɗagootal lod kɨ majal lod dɔnat joo kɨta yerrɨn kɨ dɔning lom na ɗoosɨn nyanduba lom kɨ nin yog lod kɨ nyag kɨyerr lod. 19Bɨraɓe i tɔgɨm, i ngeɗasem, I loyaro lom dɔ ndɔ kamkɔlt. Girrdeg kɨ dang dang a ɗen ko dɔngoi dɔningt kɨroit, a elɨn anan: Rota, bɔwjg õn nduba takɨbal, yog kɨpãbe ĩgɨn asɨn nya mad al. 20De a ɗa yog kɨkɔsɨdɔn na ĩn yog al a? 21Kɨtɔ 'nten, oo, m'a m'ad'd gerɨn nja kɨɗa ɓaitɔ, m'a m'ad'd gerɨn tɔgɨm kɨ ngangɨm na a gerɨn ta kad tɔm i Bɨraɓe.
Currently Selected:
Jeremi 16: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
