Jeremi 15
15
Kari na takɨgang a ɗe
1Kamla Bɨraɓe elɨm an:
Ke Moij kɨ Samuel ɗan nomt kaa,
m'a m'ɔj kamkẽ deg'n ɗan al. I
tuɓad ko sãi takum'mt ad awɨn.
2Ĩla ndɨjen anan: J'a j'aw ɗah a?
A i turd an: Titbe takel Bɨraɓe:
Ĩgɨn mbool dã kɨ yokoosɨ a ne,
yokoosɨ a tɔld,
Ĩgɨn mbool dã kɨta koi nyakat
a ne, a tɔlɨnd kɨ nyakat;
Ĩgɨn mbool dã kɨta ɓoo, ɓooa õd,
ĩgɨn mbool dã kɨta ɗa ɓer,
a awɨn sed ɓert.
3M'a m'la kɨ nyatuj so kɨdɔdt;
nyakat kad tɔld,
bisɨg kad dõd, yelg kɨ dõ
kɨ dãg kɨ dɔningt kad sand
kɨ nujɨnd kɔ.
4M'a m'teld nyakootɓool kɨro
kõɓegt tube kɨdɔningt kɨta Manase
ngon Ejekias, ngar kɨ Juda, kɨ
majal tube'n ɗa Jerusalem.
5Nõ ta a õ kama kɨtatɔi,
in Jerusalem a?
Nõ a nõ kɨtatɔi a?
Nõ a aw ndɨje ta lapia loi a?
6I nyam kɔ.
Titbe la i takel Bɨraɓe ye.
I tel gog,
kamla m'nda jim dɔit, m'nuji,
kɔr asɨm nak dɔ kookumtondot loi.
7M'tod kɨ nya to nya ta tabitgt
m'tɨnda m'tĩd kɨ kam dɔningt,
mad deg lom nalɨn ngang,
m'nujd kɔ
kɨta nyan ɗobg lod kɨmajal kɔ al.
8Ngéngawkoig lod a ĩn ngãibe
tit ngár kɨ bahbot,
m'ɗe kɨ ngénuj nya
dɔ kõ ngangt kɨ basa dan kada.
Mad kamkɔl kɨ ɓool kɨbobe
so dɔdt kanangbe.
9Ngekooj ngang tanãimɨta ye,
roa lo haw
kàd loa ud kete lon lo unj ɓaitɔ,
rosɔl ɗaa ad la dɔn ber
na ndeg ngana kɨnãi,
m'a m'lad ta nyakat't lo madngétad,
Titbe la i takel Bɨraɓe ye.
10Ah kõm, be to lom kɨta i oojɨm
de kɨ ngegak kɨ kɔl kɨro ngéndɨ dɔningt tube.
Mad de nya kɨlo tɨnat al, m'ta nya lo de kɨlo tĩnat al tɔ
titbe kaa ĩn tube ndan ndɔl dɔmt.
11Bɨraɓe el an: Rota,
a i ngah ronel ndɔ mad.
Rota m'a m'ɔsɨ madngétai
kad ɗe nõit,
kɔ kɨ rotĩn kaglo majalt,
kaglo kamkɔlt.
12Hand a asɨ tet hand
kɨ ningakasɨ lo ngéɗɔɔ kɨ jigelt a?
13Nyamajg loi kɨ nyag loi
kɨ gatd i ngãi m'a mad deg nya
tetɗɔɔ kɨta majalg loi tube
kam dɔningt kɨtaagbe.
14M'a m'telsɨ ɓergt lo madngétasɨg
kam dɔningt'n i gerɨn al
kɨta wong lom kɨtɨngabil
õsɨ tit horr be.
Juda i tit jo kɨ tɔɔ
15Ah Bɨraɓe, i ger.
I gah dɔmt, i ɗe oom
na i nda ngɨra dɔ ngedarom ndo,
ot kɔrrɨm kɔ,
in ngendɨ ba dɔ wongt,
i ger, m'ire rom njirir
dɔ rosɔlt kɨtatɔi.
16M'taa tag loi,
m'sa balang,
ta loi adɨm ronel kɨ kamnda
ngar kamɨnt,
kɨta kunɨn tɔi dɔmt,
Bɨraɓe Luwah Ngekoosɨg.
17M'ndɨ lo kawnat lo ngekɔldeg al
na ɓeta m'ɗa ronel
na kɨtakul tɔgi la m'ndɨn kɨ kɨɗam ye
kɨta i ad wong ɗoosɨ kamm.
18Kɨtɔɗi daiyo lom ndɨ aw kɨkete kete a?
Kɨtɔɗi dó lom to ngãi
na ndig yoot al a?
In tit'n man bah in gool lo kari,
tit man kɨ yii ndan be a?
19Kɨtɔ 'nten, titbe takel Bɨraɓe:
Ĩla i tel kɨromt a ne,
m'a m'tel sei kam kɨlaɓert lom,
ĩla i ɔrr nin nya kɨ kara tot
kɨ nya'n ndaa goto a ne,
a ĩn tit tam be.
I ta lod kad telɨn kɨroit,
na ĩ, a i tel kɨrodt al.
20M'a m'adi ɗà nõ degt'n ɗan tit ndog
ningakasɨ kɨngang be.
A ɗɔɔn na a tetɨn ɗɔɔ al kɨta m'a
mĩ sei nat
kad m'aji kɨ m'ug m'ɔrri,
Titbe takel Bɨraɓe.
21M'a m'ug m'ɔrri ji ngeɗamajalt
m'a m'badɔi ji degt kɨ ngeɗatakõ.
Currently Selected:
Jeremi 15: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
