Jeremi 14
14
1Ta lo Bɨraɓe in ɗe ro Jeremit
kaglot'n ndɨ hɔ la.
2Juda ndɨ hɔndo,
ɓebog loa telɨn gootɓe,
kamkil ɗad, tetɨnd kɨber.
Ndi nõ lo ɓebo Jerusalem aw dõ.
3Deg kɨbobo lan ɓerg lod kad
ɔdɨn man,
Awɨn ta bulomant, na ngahn man al
ad telɨn kɨ jog lod kari, in kɨ rosɔl,
lan dɔd ber, utɨn takumd.
4Dɔning riya kɨta ndii kɨ ed al,
ngéndɔɔg lan dɔd ber kɨ rosɔl,
utɨn takumd.
5Ke wal kɨmut in ooj ngon
kaa,
tĩ nyàa ko kɨta mũ kɨmbool goto.
6Korrog kɨmut ɗan dɔ door lot,
ɗa tan ko tit talg be,
kumd il kɨta mũ goto.
7Ke ɗagootalg ndɨ un dɔj kaa ne,
ah Bɨraɓe, aj'j kɨtatɔi.
Nyaɗa kɨgoot al loj i ngãibe,
kɨ ɗa majal, kɨ ndoorɨn.
8In nya ndahkamdɔt lo Israel,
Ngekaja dɔ ndɔ kamkɔlt.
Kɨtɔɗi in tit mbah be
kam dɔningt 'nten,
tit ngetɔi kɨ njan dõ in ɗe ɓi ko
ndɔt koon a?
9Kɨtɔɗi i ɗa tit de kɨ ta yaa biw a?
Tit gõɗɔɔ in tɔga asɨ ɗa sej al be
Be kaa, in danjt Bɨraɓe,
ndɨ kunɨn tɔi dɔjt, ot nyàj kɔ.
10Titbe kel Bɨraɓe dɔ degt'n ɗan:
Ndigɨn kaw kɨ log papa,
nu ho, ne ho,
njad ho lo ningt al, kɨta 'nten
Bɨraɓe hɔd kɨront al,
ndɨ gah dɔ ɗagootal lod tajigla
na a nda ɔjd kɨta majalkɨɗa lod.
11Bɨraɓe elɨm an: Ot ko majkurr
kɨta deg'n ɗan.
12Kegɨn rod nyasa
kaa m'a m'oo dɔ lod al,
ke adɨn kad
kari kɨlahorrt kɨ kadkari nduj kaa,
m'a m'oo majd al.
Kɨkiaɗɔɔ la m'a m'tɔld
kɔ kɨ nyakat kɨ ɓo kɨ yokoosɨ.
Elɨn Judag takɨbal
13Kamla m'tur m'an: Ah Bɨraɓe
Luwah, ngekelta kɨtait elɨnd anan:
A oon nyakat al, ɓo a õsɨ al tɔ kɨta
Luwah a adsɨ lapia kɨjeje
kam lot 'nten.
14Na Bɨraɓe elɨm an: Ngekelta kɨtamt elɨn ta kɨngom kam tɔmt, Mĩ, m'lad al, m'ndad mber al m'eld ta al tɔ. Oon nya kɨngom kam ndilt, ndɔ'n ndil kari kɨndang. Ndo kum kɨ ngarkamdt la ndɔ'n ne ndil ye, 15kɨta 'nten, titbe takel Bɨraɓe dɔ ngekelta kɨtant ĩgɨn elɨn ta kam tɔnt, na nii'n lad al, ĩgɨn elɨn anan: Kam dɔningt'n ɗan nyakat ke ɓo a gotot, Ngendɔndil'n non a nujɨn ta nyakat't kɨ ɓo tu, 16Deg ĩn ndɔ'n ndil titbe ad'd ye, nind a to dɔ ɗobgt kɨ Jerusalem kɨta ɓo kɨ nyakat, de mad kɨ a dub nind goto, ĩn kɨ nẽdg kɨ ngandg kɨdɨngã kɨ kɨdẽ, Majal lod kɨ ɗan m'a m'ũ dɔdt gog. 17Eld ta 'nten an:
Nõ ɗe kummt ndɔ ho,
kada ho, kanj nya ta
kɨta ngomand, ɓebo lo deg lom
in ndana ngãibe kɨ dobai kɨ to ngãi.
18Ĩla m'aw kam ndɔgt a ne,
m'ngaa nin deg kɨ nyakat tɔld.
Lon m'aw kam ɓebot a ne,
m'ngaa deg'n ɓoo õd,
kɨta ngekelta kɨta Luwaht
kɨ ngejanyamosɨ tu
awɨn kam dɔningt kanj ger
lon ndɨ awɨnt
19I mbet Juda kɨrotagt a?
Ɓebo Siõ tel nya kɨyerr kɨroit a?
Kɨtɔɗi i ndaj kɨ dó kɨkanj yootj.
Kɨ nda kamj dɔ lapiat na lapia goto,
kaglo yoot a ne, na oo, rondad,
20Bɨraɓe, kɨ ger majal loj
kɨ ɗagootal lo bɔwjg
kɨta, jin, kɨ ɗa majal kɨ ndoorɨn.
21Ot tel gidi kad'j kɨtatɔi,
ot kad pong tɔko loi
tel nya kɨ rosɔl,
i ga dɔt na ot gang kunkɔ loi in un sej.
22Ku yogt kɨpãbe lo girrdeg kɨ
dang dang ye,
kɨmad aw kɨ tɔg kad ndii ed a?
Dɔrã a ad man ndii a?
In Bɨraɓe Luwah loj ale?
Kɨ nda kamj dɔit kɨta ĩla
i ɗa nyag 'nten tube ye.
Currently Selected:
Jeremi 14: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
