Jeremi 13
13
Terrtag dɔ kub dɔ ɓot
1Titbe la Bɨraɓe elɨm an: Aw, i ndugo kub lẽ dɔɓo, i dɔn ɓoi, na ot la kam mant. 2M'ndugo kub'n non go tat lo Bɨraɓe, m'dɔn ɓom.
3Bɨraɓe tel elɨm ta ɓaitɔ an: 4Un ngaland dɔɓoi kɨ i ndugo nõ. I dɔn ɓoi, i ɓai dõ, aw bah Eprat't i yaro ngaland dɔɓo kam bulombalt 5a ne, m'aw, m'yaro ngaland dɔɓo'n non ta bah Eprat't, tit'n Bɨraɓe ndamɨn mbera. 6Ndɔg ngãi tɔin, kamla Bɨraɓe elɨm an: I ɓai, aw ta bah Eprat't, lot'n i yaro ngaland dɔɓo'n m'adi i yaro ta bah Epat't nõ, m'ndɨjei kad i un gog? 7Kamla m'aw ta bah Eprat't, m'urr ɓe, na m'ɔrr ngaland dɔɓo'n m'yaro ye kɨ tɨga. Taa ne, m'oo kad ngaland dɔɓo lom ye ndum mbukɨ, gang mbitmbit, i nya kɨ tuj.
8Kamla Bɨraɓe elɨm ta an: 9Titbe takel Bɨraɓe: Titbe tɔ la m'a m'nujɨn dɔngang lo Juda kɨ dɔngang kɨbo lo Jerusalem. 10Girrdeg kɨ ngéɗamajal'n mbet koo dɔ ta lom, na ndulo go tagah kɨ ngarkamɨnt koon, na aw go luwahg kɨɗang kad ɗa ɓer lod kɨ ɔsɨ dõ ber nõdt. A tel tit ngaland dɔɓo 'nten in ndum mbukɨ ad tuj nõ. 11Bɨraɓe el an: Tit'n de a dɔn ngaland ɓont ye, titbe tɔ la m'ɗa kad ngékɨɓe lo Israel kɨ ngékɨɓe lo Juda tube m'a tĩnyan nat kɨ kõɓe kɨ Israel kɨ Juda ye be. Kɨtɔkad ĩn girrdeg lom, kɨ telɨn nya tɔko lom, kɨ nyanduba lom, na oon dɔ ta lom al.
Bɨraɓe a gangta dɔ degt lon
12A i eld ta 'nten. Titbe takel Bɨraɓe Luwah lo Israel: Jog tube ɗand kad utɨn man nduut ad ɗoosɨ. Na ĩla turɨn anan: Kɨ ger ta kad jog tube ɗand kad utɨn man nduut. 13Kamla a i eld an: Titbe la i takel Bɨraɓe ye: Oon, m'a mad kasɨ ɗa ngendɨ dɔningt'n ɗan tube, ngarg ngendɨ dɔ pong kõɓe lo Dabid, kɨ ngéjanyamosɨ kɨ ngékelta kɨta Luwaht kɨ ngendɨ ɓebo kɨ Jerusalemt tube. 14M'a tɨnda tetd ɗelɗel, ad i bɔwg a ndoorɨn ngang, ngang tɔ a ndoorɨn bɔwdg.
Titbe la i takel Bɨraɓe ye.
M'a m'oo kumtondo lod al, m'a m'ɔjd kamkẽ al tɔ. Nya mad kɨ a ɔgɨm dɔ nujd goto.
Dɔngang kɨ rosɔl lo Jerusalem
15Oon dɔ,
i nelɨn mbisɨ,
ot ɗan dɔngang kɨta Bɨraɓe ndɨ elsɨ ta.
16Ɔsɨn gon Bɨraɓe Luwah losɨ
kete kad ad til diwɨn al ɓaitɔ,
kete lon i gan njasɨ
dɔ mbalgt kɨ til diw dɔt
lon i ndi ngon kunjt,
kad Bɨraɓe tel ndil koi lot kɨdiw kirir.
17Ĩla i oon dɔ al a ne,
m'a m'nõ gid tilt kɨta dɔngang losɨ,
man nõ a ɗe kummt ngãi
kɨta a awɨn kɨ ɓut batg
lo Bɨraɓe ɓert.
Bɨraɓe ug el ngékɨɓe lo ngar
18Bɨraɓe elta kɨ ngar kɨ kõ ngar an:
I ndɨn dɔningt kari
kɨta jɔg kɔsɨgon losɨ
in i nyapare losɨ so kɔ dɔsɨt.
19Ɓebog losɨ kɨ lo kɨjikõ
tad i kɨkut mbukɨ
de mad kɨ asɨ tee tabita goto,
Judag tube awɨn ɓert,
awɨn sed ɓert kɨtaagbe.
20Jerusalem un kumi kɨ dõ,
oon madngétaig ndɨ ɗen ko kɨdɔɔ,
ɓut nyakulg'n lan jiit ye i ɗah a?
Ɓut nyakul'n tel nya kɔsɨgon loi i ɗah a?
21A i el an ɗi a?
Ĩla kete i ndood kamla telɨn girr tɔgdt.
Kamkil a ɗai tit'n tokooj ton dekɨdẽ be
22Ĩla i el kamit an:
kɨtɔɗi nyag 'nten ɗen dɔmt a?
Ye maj kad i ger maj I kɨta ɗagootal loi
la mad roi ilɨn yolel ye,
mad ndain ne mbukɨmbukɨ tɔ ye.
23De kɨ Etiopi asɨ mbel ndar ron kil a?
Ke dã kag a mbel ndangɨn a?
I root al
Titbe tɔ ĩn deg ngéɗamajal ye
A asɨn ɗa maj al bat
24M'a m'tɨnda m'tĩd kɨ log tube
tit'n nél a tɨnda tĩ tisa kɨ dɨlalot ye be.
25Bɨraɓe el an:
Oon nya 'nten la a tee dɔ Judat ye,
gaj loi'n m'ɔj m'adi,
Kɨtɔ kami oi dɔmt
na i ɓakul yog kɨngom.
26Mĩ kɨdɔm m'a m'un
ta kub loi kɨ dõ
kad takumit to tɨga do
kɨtakad deg oon roi
kɨ kil yolel, ad roi sɔli.
27M'oo kayag loi kɨgo dãrot'n i ɗa
m'oo nyaɗaig kɨyerr kɨrosɔl'n i ɗa
kɨ yog'n i hile dɔ doorlogt
kɨ kam ndɔɔgt.
Beto loi Jerusalem.
Kɨtɔ i ndig kar dɔ yerrt'n i ɗa al
'Nten a to titbe al.
Currently Selected:
Jeremi 13: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
