Jeremi 12
12
Jeremi elta kɨ Bɨraɓe, Bɨraɓe tura
1Bɨraɓe ĩ kɨdenesew,
gootal kad m'maj sei ta
titbe kaa,
m'ndig keli ta dɔ ta kɨgangt loi.
Kɨtɔɗi maj urr deg ngeɗamajal
dɔ ɗobt lod a?
Kɨtɔɗi ngéndokum deg ndin
kɨ kam kɨsokɨber a?
2I hɔd tit kag be ad ngɨrad ho ning maj
tɔg 'nten kɨ kand'd, kunɨn tɔi kɨ tad
na ngarkamd i sãi sei.
3Ĩn Bɨraɓe, i germ i oom,
i ndio ngarkam in i nat sei
I ɔrrd tit batg ĩn awɨn sed
kɨ lo tɔldt be
na i ndad tadang kɨta ndɔ tɔl.
4Mbã ndɔ bãi dɔning
a i kam ho ndot a?
Mbã ndɔ ɗi mũ kɨ kam gawgt tube
a tutɨn a?
Kɨtɔ majalkɨɗa lo deg ngendɨt la
ad dãg kɨ yelg tube nujɨn,
kɨta deg elɨn anan: A oo dɔboij
5Ĩla i ãi ngod nat kɨ ngenyag ad
ndain dɨlalot a ne,
titbãi a i asɨ kãi ngod nat kɨ
ngesɨndag a?
Ĩla i tee so kam dɔningt kɨ sɔl lom a ne,
titbãi a i asɨ ndɨ kɨdɔ dõ kam
kut kɨkad bah Jurdẽt a?
6Kɨtɔ ngankõi kɨ ngékɨɓe lo bɔwi ɗan sei nyaɗa kɨlo ndokumt, kunɨn goi kɨ ndid kɨbo. Ot kad rota ta lod, ke elɨn tag kɨmajmaj.
Bɨraɓe a nya kuj ndub Luwah lon kɨ girrdeg
7M'mbet kuj lom m'nya nya
nduba lom kɔ tɔ,
m'la ngetar lom ji madngétaagt.
8Nyanduba lom i tit tubo kam kut,
ko kɨ ndin ndoormɨn kɨta 'nten
m'ɔsan ta.
9Nyanduba lom i tit yel kɨ ngelaɓal
dang dang a?
Yelg kɨ ngesadã
lan na gugɨn dɔa a?
Awɨn, i kawɨn dãg kɨmut tube
ad ɗen san dan.
10Koosɨ ngékulnyag
nujɨn ndɔɔ nduu lom,
ɓan ndɔɔ lom mbujmbuj kɨ njad,
telɨn ndɔɔ ronel lom
gotlo kɨ de gotot.
11Telɨna gotlo kɨ lo hɔ ndo
lo kɨ nomt tel lo kɨtuj
dɔning tube ndɨnga ndo,
na ngekookumtondo loa goto.
12Ngenuj log i kɨ kɨdɔ doorlogt
ĩ kɨ kam mũ tube tɔ
kɨta kasgar lo Bɨraɓe ndɨ sa dɔning.
Dongoia kɨmad mbã kɨ kɨmadt,
de kɨɗa kɨ ndɨ kɨ lapia goto.
13Duwɨn nyako, na tetɨn kong,
ɔrrɨn rɔkɨ kanj ngah nya.
Ĩn kɨ rosɔl kɨta nya'n tetɨn
kɨta wong lo Bɨraɓe kɨtɨngabil.
14Titbe takel Bɨraɓe dɔ madɓemgt
tube kɨmajal ĩgɨn ndig ndan jid do
nyakagɓet ĩn mad deg lom Israel:
Oon, m'a m'ɔid kam dɔningt lod na
m'a m'ɔrr ngekɨɓe lo Juda kudt kɔ.
15Na go kɔrdt kɨ m'a m'ɔrrd ye, m'a
m'tel m'oo kumtondo lod gog, m'a
m'tel sed kad dekɨɗen ndɨ dɔ nya
kagɓet lon, dekɨɗen kam dɔningt lon.
16Ĩla ndoon ɗob nyaɗa lo deg lom,
ĩla ndan yo kam tɔmt anan: Bɨraɓe
ndɨ kɨ dɔa dõ, tit'n ndoon ne deg
lom ad ndan yo kɨ to Baal, a ne, kam
la a ndin kɨ lapia ku degt lom ye.
17Na ĩla oon dɔ al a ne, m'a m'ret
girrdeg'n non rup, m'a m'nuja ko,
takel Bɨraɓe.
Currently Selected:
Jeremi 12: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
