Jeremi 11
11
Juda gang kunkɔ kɨ Bɨraɓe
1Ta'n tee kokɨro Bɨraɓet, ɗe ro Jeremit an: 2Oo dɔ tag lo kunkɔ 'nten na el deg kɨ Juda kɨ ngéndɨ Jerusalem. 3A i eld an: Titbe takel Bɨraɓe Luwah lo Israel; ndɔl i dɔ det'n oo dɔ tag lo kunkɔ 'nten al, 4in m'nda mbera bɔwsɨg dɔ ndɔt'n m'teen sed kam dɔning Ejipt't kam horr pur handt, m'an: Oon dɔ ndim, i ɗan nyag tube ĩn m'ndasɨ mbera, kamla a ĩn deg lom na m'a mĩ Luwah losɨ ye. 5Na m'a m'tɔl kon kunkɔ kɨ yokɨnda in m'un mad bɔwsɨg kɨ m'ad'd dɔning'n mba kɨ tej nunt, tit'n i ndɨ oon ne ɓola. Kamla m'turta m'an: An Bɨraɓe. 6Bɨraɓe elɨm an: I la mber ta 'nten kam ɓebogt kɨ Juda kɨ ɗobg kɨ Jerusalem an: Oon dɔ tag lo kunkɔ 'nten na i hɔ ɗan goot. 7M'ug m'el bɔwsɨg ndɔ m'teen sed dɔning Ejipt't kɨtɨga maɗi mbã ɓola m'eld ta kɨdɔtdɔt kanj nya ta m'an: Oon dɔ ndim. 8Na oon dɔ al, nelɨn mbid al tɔ, dekɨɗen kudt ndulo go ngar kamɨn kɨmajal, kamla m'tɔl kon ta kunkɔ 'nten tube kɨdɔdt in m'ndad mbera kad ɗan got na ngomɨn go al. 9Bɨraɓe elɨm an: Ta kɨlaɓer i ku degt kɨ Juda kɨ ngéndɨ Jerusalem. 10Telɨn kɨgog dɔ ɗagootal lo kadig ĩgɨn mbetɨn koo dɔ tag lom na ndu lon go Luwahg kɨɗang, ɗan ɓer lod. Ngékɨɓe lo Israel kɨ ngékɨɓe lo Juda gangɨn kunkɔ lom in m'un kɨ bɔwdg. 11Kɨtɔ 'nten, titbe takel Bɨraɓe: Oo, m'a mad nyakɨto so dɔdt in a asɨn tet al. Ke a kon kɨdɔmt ka a, m'a m'oo do ko lod al. 12Kamla ɓebog kɨ Juda kɨ ngéndɨ Jerusalem a awɨn kon kɨ do luwahgt ĩn lan kadkarig kɨkootmbĩ adɨnd na asɨn kajd do kaglo kamkɔlt lod al. 13Kɨtɔ luwahg loi bɨlan ngãibe tit ɓebog kɨ Juda. Tit'n ɗobg kam Jerusalemt kɔrd i ngãi ye, titbe tɔ kor dɨngɨrg ĩgɨn i ɗan adɨn yog, dɨngɨrg kɨta la'n nyag kɨkootmbĩ kad Baal. 14Na in Jeremi, ot kelta kɨta deg'n ɗan, ot ko kɨ rotĩ ke kel sem ta kɨta m'a m'oo dɔ ta lod al lon kon kɨdɔmt kɨta tuj kɨ ngahd. 15Ɗi ngetar lom a ɗa kam kujt lom a? Ĩ ɗa majal ngãi. Kunkɔ kɨ yokɨnda loi ye asɨn kɔrrta kɨ gang dɔit a? Lon i ɗa majal kamla i ɗa ronel a? 16Kag olib kɨmbool in tɔa ko kɨtɔ maj lo kanda, 'nten i tɔ'n Bɨraɓe adi na kɨ kah kɨ ko ngãibe a la horr dɔ kagt'n non kɨ dɔjiag ad horr õa mugɨj. 17Bɨraɓe Ngekoosɨg'n hɔi tit kag be ndɨ kun nya kɨnuj kɨdɔit kɨta majalkɨɗa lo ngékɨɓe lo Israel kɨ ngékɨɓe lo Juda ĩn sɔkɨn wong loa kɨtɨngabil kɨtakul nyag kɨ kootmbĩ ĩn lan adɨn yo Baal.
Nooj Jeremi ndoorɨn na
18Bɨraɓe tee dɔ ta 'nten adɨm m'ger, kamla i ɔjɨm kɨlaɗad kɨmajal. 19Na mĩ, m'ɗa tit kõ bat in sɔl dõ lom lon ɔrrɨna kɨ lojakɔt. Mĩ dai dɔ takɔjdt kɨmajal'n ɔjɨn ndoormɨm ne, anan: Ad kɨ nuj kag nat kɨ kanda, ad kɨ gaa ko dɔningt lo ngékumkajɨrg kad deg gan kamd dɔ toat gog al. 20Na Bɨraɓe Ngekoosɨg, i ngegangta kɨdenesew, in ndio kam deg kɨ ngarkamd. Ad m'oo ndangɨra loi dɔdt kɨta i ɗi la m'nya ta lom jiit ye. 21Kɨtɔ 'nten, titbe takel Bɨraɓe do degt kɨ Anatot ĩgɨn ndɨ sahn tɔli na elɨn anan: Ot kelta kɨta Luwaht kam tɔ Bɨraɓet kɨtakad i oi jijt al. 22Kɨtɔ 'nten, titbe takel Bɨraɓe Ngekoosɨg: Oo, m'a m'nda m'ɔjd. Basag a oin ta kiyaɗɔɔt, ngandg kɨdɨngã kɨ kɨdẽ a oin koi ɓo. 23De kɨɗa kudt'n a tee ãi goto kɨta m'a m'ɗe kɨ tuj dɔ degt kɨ Anatot ɓalt'n m'a m'nda m'ɔjd.
Currently Selected:
Jeremi 11: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
