Jeremi Takɨdɔt
Takɨdɔt
Jeremi tel ngekelta kɨ ta Luwaht kam ɓet kɨ Jerusalem ɓalt kɨ 626 kete nõ kooj Jeju Krist't. Kaglot'n Josia i ngar kɨ Juda, Jeremi elta kɨ ta Luwaht asɨ ɓal 40.
Go koi ngar Josia ɓalt kɨ 609, kõɓe kɨ Judat i kam kaglot kɨ ngang ngãi. Ngarg kɨ kɨbog kɨ Judat gerɨn titbãi kad ɔrrɨn nõ deg al. Deg madg gaan kad n'awɨn kɨ ro Ejipt't kad Ejipt la ɗe ɗa sed ye. Deg'n non ĩn ngãi, kɨmadg gaan kad i soot kad'n lan dɔd girr kõɓet kɨ Babilont. Jeremi i ku degt'n non.
Kɨtɔ Jeremi ɔrr girr tuj kɨbo'n ndɨ ɗe dɔ ngan kɨ Judat kɨta nya ɗad kɨro'n goto nõ Luwaht. Luwah eld kad kõ tee dɔdt, nya kɨ to a ɗad na maj kad ndigɨn kõɓe lo deg kɨ Babilont'n ɓet a õnɓe dɔdt ho, kaw'n ɓet a awɨn ɓer Babilont ho. Na deg kɨ Juda ndigɨn dɔt kad nyag lod tube tujɨn, a ngahn ɗob kad hɔn nooj kɨ kij kɨ Luwah.
Maktub'n Jeremi lan ad deg'n awɨn ɓer Babilon (Jer 29:1-32) eld kad lan nooj nat kɨ Luwah kam kunkɔt kɨ kij'n Luwah ndɨ un sed, (Jer 31:31-34; 32:40-41) elj tit bãi kun kɔn non a ton mbɨna deg kɨ Judat kɨ Luwah.
Kad deg gerɨn girr ta'n eld ye, Jeremi ɔjd nyakɔjg: Jeremi ad ngaland ndaɓon ndum mbukɨ, na un ad oon, ɔjɨnd kad gerɨn kad girrdeg kɨ Juda a ndumɨn lut (Jer 13:1-27). Jeremi ndah kú tɔɔ kɔsɨ kɔsɨ. Da nya 'nten kad deg kɨ Judat gerɨn ne kad ndɔ madt Luwah a ɗɔɔ madngétadg tetd ɗelɗel (Jer 19:1-15). Jeremi aw ndugo ndɔɔ, ɗa titbe kad n'ɔjɨn deg kɨ Juda kad gerɨn ndɔ mad Bɨraɓe a badɔd a ug ɔrrd kam ɓert kad telɨn ɗen dɔningt lod gog (Jer 32:1-44).
Nyag kɨ ngang ngang'n tee dɔ Jeremit kɨ ngekelta kɨ ta Luwaht, Jeremi hɔ tɔgɨn ba kam kɨlat'n Luwah la kam jiat. Nyag'n j'a kɨ ngah kam maktubt lo ngekelta kɨ ta Luwaht Jeremi laten: Ɗob nina kɨdasa, maktub elta dɔ kunt'n Luwah kun Jeremi kad ɗa kɨlaɓer. Jer 2:1—24:10, tag kɨ kamt sumba dɔ degt kɨ Israelt kɨ deg kɨ Juda. Na elta dɔ kotn Jeremi ko kɨ nõ Luwaht (Jer 11:18—12:6; 15:10-21; 17:14-18; 18:18-23; 20:7-18). Kam nyag in ɗan nya ye, Jeremi kɨ kɨɗan be, ngah kõ ngãi kɨta nya'n ɗa girrdeg loa.
Ɓai dɔ Jer 25:1-38 i tag tube'n ngekelta kɨ ta Luwaht el nõ la ndan dɔat nat ye. Ɓai dɔ Jer 26:1—45:5 elta dɔ nyagt kɨ ndaa tot kam ndɨt kɨ dɔ dõ lo Jeremi. De'n ndang tag 'nten, maj a ne i Baruk ngedang maktub lo Jeremi. Jer 36:1—45:5 ye ɔrr hoitag kɨ ɔj dɔ mbɨna Jeremi kɨ ngar Joakim kɨ Sedekias'n majal, kɨta pa ndia lod i kɨgo ndigt lo Luwah al. I titbe la ngarg kɨjoo nõ ndan rod nat kɨ deg'n ndigɨn tel kɨ ro Ejipt't kad'n ɗa nyan kɨ kokõ kɨ Jeremi ngekelta kɨ ta Luwaht. Be kaa ne, Jeremi nya ɗa kɨro nõ Luwaht al.
Ɓai dɔ Jer 46:1—51:64 elta dɔ tat kɨ gang lo Luwah dɔ girrdegt kɨ dang dang. Ɓai dɔ Jer 52:1-34, Jeremi ɔrr girr nyag'n ɗa nya lon mbahg ɗe taan ɓebo kɨ Jerusalem.
Tit maktubg lo Ngarg, maktub lo Jeremi tɔltan kɨ ta'n a ad kam kɨsokɨber ho, nyandah kamdɔt lo deg kɨ Judat ho. Kɨtɔ ngar kɨ Babilont ɔrr Joakim kɔ kam dangait, Joakin kete i ngar dɔ Judat, na lon ngar kɨ Babilont ɔrra dangait ye, ɗa sia maj ngãi (oo 2 Ngar 25:27-30).
Currently Selected:
Jeremi Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.