Ejai 66
66
Takɨgang lo Bɨraɓe kɨ majkurr loa kɨ a ɗe dɔ Jerusalemt
1Titbe kel Bɨraɓe:
Dɔrã i pong kõɓe lom,
dɔning i komber nda njam,
kuj kɨ ɗi a i ɗan admɨn,
ke lokɨɗah a i lo taam kò a?
2Nyag'n non tube jim ɗad,
in lom, nyag'n non tube,
kel Bɨraɓe.
Oon, m'a m'ur kumm kɨ dɔat,
de kɨ ngendo kɨ ndɨnga ndo kam ndilɨnt,
na roa ndad kɨta ɓool ta lom.
3De'n tɔl bɔw mang,
a tɔl de,
de'n la bat kadkari kɨjakɔ a ne,
i tit ngetɔl bisɨ,
de la kadkari,
na i mosɨ boor,
de la horr nduj mbikam,
na i kɨta ɗan yo.
Deg'n non kɔtɨn ɗob lod kɨ kɔsɨ dɔd,
na ngahn ronel kam kɨlaɗadt kɨyerr.
4Mĩ tɔ m'a mad kamkɔl
kɨ dang dang so dɔdt,
na m'a mad nyag kɨkootɓool
teen dɔdt,
kɨta m'kund, na de mad kɨ tur goto,
m'elta, na oon dɔ al,
ɗan nya kɨmajal takum'mt,
kɔtɨn nya kɨ nelɨm al.
5Oon dɔ ta lo Bɨraɓe,
in kɨ rosɨ kɨ ndad kɨta ɓool kɨ i
ɓoolɨn ta loa:
Ngankõsɨ ngékɔsɨ ta lasɨn kɔ
kɨta tɔm anan:
kɨ Bɨraɓe ɔj'j kunjɨn kɨɗangeɗeng
kamla j'a j'oo ronel losɨ.
Na deg'n non a in kɨ rosɔl.
6Kah kɨse kɨ
ɓai kam ɓebot,
ndi ta mad tee
ko kam kuj ndub Luwaht.
I ndi Bɨraɓe la ndɨ baji
madngétantg ye.
7Kete nõ to koojt, ooj.
Kete lon tokooj ɗaa al ɓaitɔ,
ooj ngon kɨdɨngã.
8Nõ oo dɔ ta kɨ titbe a?
Nõ oo nyag kɨ titbe a?
A oojɨn dɔning mad ndɔt kɨkɨɗa a?
A oojɨn girrdeg kooj kɨ nja kɨɗa a?
Kɨtɔ ɓebo Siõ tõ kooj,
tentenbe ooj ngang.
9M'a mad kaglo kooj loa ɗe,
na m'a m'ada ooj al a? Kel Bɨraɓe.
Mĩ'n m'ada ooj ye,
m'a m'ɔga kooj a? Kel Luwah loi.
10I ɗan ronel nat kɨ Jerusalem,
na i ɗan kamnda kɨtaa,
in tube kɨ i tarɨna.
I ɗan ronel kɨ kamnda nat sia,
ĩn tube kɨ i hɔn ndɔa,
11kɨtakad ilɨn mbaa
i ndanɨn kɨ mba sɔlkam loa,
kɨtakad ãin ngãi.
Na i ɗan ronel
dɔ sɔlkamt loa kɨ ɗoosɨ lo tap.
12Kɨtɔ titbe kel Bɨraɓe:
Oon, m'a mad lapia aw dɔat
tit man bah be,
na nyamajg lo girrdeg kɨ dang dang tɔ
tit man bah kɨ õ tɔi dɔ kongɨr be.
A ilɨn mbaa, a usɨsɨ kadɨnt,
na a lasɨ dɔ bɨngɨnt.
13Tit de kɨ kõa a sɔl kama,
titbe tɔ la m'a m'sɔlɨn kamsɨ ye,
na a sɔl kamsɨ Jerusalemt.
14A oon, a in kɨ ronel kamsɨt,
kɨngasɨ a
i tit mũ kɨmbool be,
na tɔg ji Bɨraɓe a ad i gerɨna kɨtakul ɓerg lon,
wong a ɗaa dɔ madngétaat.
15Kɨtɔ oon. Bɨraɓe a ɗe kam horrt,
pusɨɗɔɔg loa tɔ titɨn kɨ nélbarwãi,
wong loa tɨngabil,
na nyandàng loa i nat kɨ ndõhorr.
16Bɨraɓe a gangta kɨtakul horr,
kɨtakul kiyaɗɔɔ lon la
a gangɨn ta dɔ degt tube ye,
kɨtɔlg lo Bɨraɓe a ĩn ngãibe tɔ.
17Ĩgɨn ndɨ telɨn rod kɨjaɓat't,
ndɨ arɨn rod,
awɨn go ɓakumta yo mad kam ndɔɔgt,
kad san dã boor, kɨ nyag kɨyerr, kɨ yegg.
A nujɨn kɔ ta kɨɗabe, kel Bɨraɓe.
18M'ger kɨlaɗad kɨ tagahd.
Kaglo ndɨ ɗe kɨta kaw girrdeg tube
kɨ taɓeg kɨ dang dang kɨnat,
a ɗe oon kunjɨm kɨɗangeɗeng.
19M'a m'nda nyakɔj mad kudt.
Na m'a m'la ndegd kɨ ajɨn
kɨ ro girrdegt kɨ dang dang,
ad i Tarsis, kɨ Pul, kɨ Lud,
ngékur kɨrã dɔ gãt,
kɨ Tubal kɨ Jaban,
kɨ doorg kɨsãisãi,
ĩgɨn oon kah tɔm kɨ ko al,
ke oon kunjɨm kɨɗangeɗeng nja kɨɗa al.
A lan mber tɔm kɨ
ku girrdegt kɨ dang dang.
20A ɗen kɨ ngankõsɨ ku girrdegt
kɨ dang dang tube,
kadkarit kɨ la kad Bɨraɓe.
A ɗen dɔ sɨndagt, kɨ pusɨg,
kɨ tipoig, kɨ dɔ korrogt kɨ dɔ lukumgt
mbã kɨ dɔ mbalbot lom kɨjaɓat kɨ
Jerusalem kel Bɨraɓe,
tit'n Israelag a ɗen ne kɨ
kadkari nduj
kam jot kɨkar nyang
kuju lo Bɨraɓe ye be.
21Mĩ tɔ m'a m'ɔrr kɨmadg dandt
kad in ngéjamosɨ kadkarig, kɨ Lebiag,
kel Bɨraɓe.
22Kɨtɔ tit in dɔrã kɨkij
kɨ dɔning kɨkij kɨ m'a m'ɗa
a ton kɨnomt godt, kel Bɨraɓe,
titbe tɔ kohsɨ kɨ tɔsɨ
a ton mbãkɨnõt.
23Kij nah kɨ kij nah mad,
ndɔ taakò kɨ ndɔ taakò mad,
deg tube a ɗe ɔsɨn dɔd ber nomt,
kel Bɨraɓe.
24Lon a teen kɨtɨga,
a oon nin deg kɨ taamɨn ɗɔɔ,
kɨded a oin al,
horr lod a oi al tɔ.
Deg tube a unɨn kumd kɔ dɔdt
kɨta in kɨyerr.
Currently Selected:
Ejai 66: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
