Ejai 63
63
Ndɔ ndangɨra lo Bɨraɓe
1De'n ɗan i nõ ɓai dɔning Edom,
ndɨ ɓai ko ɓebo Bosrat
kɨ kubg lon kɨkɨre pirɨr a?
Ɔj ron kam kubg kɨmajmaj,
ngendia kɨ tɔgɨn ngãi i nõ a?
I mĩ, ngekel kan, denesew a tetɗɔɔ,
mĩ ngetɔg kaj.
2Kɨtɔɗi kubg loi ĩn kɨkɨre pirɨr,
na kubg loi ĩn tit kub
lo ngéɓa kand nduu be a?
3Mĩ kɨ kɨɗambe la m'ɓa kand nduu,
ku girrdegt kɨ dang dang,
de kɨɗa kɨ i sem goto.
Ad m'ɓad girr njamt kɨ wong lom,
m'ɓa dɔd mbujmbuj kam wongt lom kɨtɔlsɔkɨr,
na mand tal dɔ kubt lom,
ad kub lom tube tel kɨyerr.
4Kɨtɔ m'nda kammt kad i ndɔ
ndangɨra,
na ɓal badɔ deg lom ɗe woi.
5M'nɔl lo, na de kɨ ngeɗasem goto
yam biw kɨta de mad kɨ ngedĩm goto.
Na tɔgjɨm mĩ kɨɓe la
m'tet'n ɗɔɔ ye,
na wong lom kɨtɔlsɔkɨr adɨm tɔg tɔ.
6M'ɓa dɔ girrdeg kɨ dang dang
mbujmbuj kam wongt lom,
na wong lom kɨtɔlsɔkɨr ɗad kasɨt,
m'ũ mosɨd ningt.
Ɗamaj lo Bɨraɓe kɨ ro Israelagt
7M'a m'ɔrr hoi nyaɗa Bɨraɓe kɨ lo kamkẽt,
kɨ kɨlaɗa Bɨraɓe kɨ asɨ kad deg
ndubɨna ne,
kɨgo nyagt tube kɨ Bɨraɓe ɗa adj,
kɨ ɗamaj lon kɨbobe
kɨ ro ngékɨɓet lo Israel,
in ɗa kɨgo kõkamt lon,
kɨ kamkẽ lon kɨngãi.
8El an: Rota deg'n non in lom,
in ngang kɨ a ɗan nya kɨ lo
ndokumt al,
na Bɨraɓe i ngekajd.
9Kam dayogt lod tube, i de ke ngekɨla mad,
na ĩ kɨ dɔn ajd,
kam tart loa kɨ kookumtondo loa, ĩ kɨɓe ajd,
und kɨ dõ, tod kam ndɔgt kɨmaɗi
10Titbe kaa ne, adɨn kamkil Ndila
kɨkunjɗang,
in kɨɓe tɔ tel madngétad, ɗɔɔ sed.
11Kamla deg loa gan kamd
dɔ ndɔgt kɨmaɗi lo Moij.
Nge tee sed kam bahbot kɨtɨga
nat kɨ ngéngom ɓut deg loa ye,
i ɗah a?
In nda Ndilɨn kɨkunjɗang kamat
i ɗah a?
12In ndia dɔ jikõ Moijt,
ɔrr deg ta ɗob kɨ tɔg jin kɨngãi,
in gang man dene nõdt
kad tɔa kon kɨ mbãkɨnõt,
13in gang sed ɓul bah
tit sɨnda kam dɨlalot,
kɨkanj kad gan njad gigt.
14Ndil Bɨraɓe ad'd taan kò,
tit nyakulg kɨ ɗisɨn kɨ hollot.
Titbe la ɔrrɨn nõ deg loi
kad i ngahn tɔko.
Kɔ kɨta kookumtondo kɨ ɗa sed
15In i ndɨ dõ, i nɔl lo kɨber.
I ndɨ londɨt kɨkunjɗang kɨmaj
tɔitɔi, oo lo.
Tĩrokat loi kɨ tɔg loi,
kõkam kɨ kookumtondo loi, in ɗah a?
16Kɨtɔ bɔwjg, i ĩ
Abraham gerj al,
na Israel gerj al kaa ne,
ĩ Bɨraɓe, ĩ Bɔwj.
Tɔi i Ngebadɔj kohgt kɨmaɗi
mbã ɓone.
17Bɨraɓe, kɨtɔɗi i nyàj
ad kɨ ndom ɗobg loi,
na ad kamj kongkong,
kad kɨ ɓoolɨn al a?
I tel kɨrojt kɨta ɓerg loi,
kɨ girrdeg nyakagɓe loi.
18Girrdeg loi kɨjaɓat
ndɨn lot loi kɨjaɓat kaglo tẽbe,
na madngétaj ɓan dɔa kɨ njad.
19Jĩ kɨ tel tit deg kɨ õɓe dɔdt
maɗi al,
ĩgɨn kunɨn tɔi dɔdt al tɔ.
Aa. Ni i til dɔrã,
na i ɗisɨ a ne,
mbalbog a yeen nõit.
Currently Selected:
Ejai 63: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
