Ejai 60
60
Tɔko kɨ a ɗe dɔ Jerusalemt
1I ɓai dõ, unj kɨta kunj loi ɗe.
Kunj Bɨraɓe kɨɗangeɗeng unj dɔit.
2Oo til a ut dɔning,
til diw kirir, a ut dɔ girrdeg kɨ dang dang,
na Bɨraɓe a ɓai dɔit dõ.
A oon kunja kɨɗangeɗeng dɔit.
3Girrdeg kɨ dang dang a ɗen kam kunjit,
na ngarg a ɗen kam nyẽr kunjit.
4Un kumi kɨ dõ i nɔlɨn lo gug dɔi.
A kawɨn na tube ɗen roit.
Ngani kɨdɨngãg a ɗen ko sãi,
a ton ngani kɨdẽ jidt ɗen sed.
5Kamla a oo, na a i unj ɗang,
ronel a tɔsɨ kami mbukɨmbukɨ,
kɨta nyag kɨ ton mbuj kɨ tond dɔ bahbot a telɨn loi,
nyamajg lo girrdeg kɨ dang dang a ɗen roit tɔ.
6Lukum koosɨg a utɨn dɔning loi
kɨ lukumg kɨ Madiã kɨ Epa.
Ngé kɨ Saba tube a ɗen,
a ton lɔr kɨ nduj kam kɨ kootmbĩ,
a lan mber kɨlaɗa Bɨraɓe
kɨ asɨ kad deg ndubɨna ne.
7Ɓut nyakulg lo Kedarg tube a kawɨn na roit,
bal batg lo Nebajotg a ĩn nya ɗa kɨla loi,
a awɨn ne dɔ dɨngɨrt lom kad i nya kɨ m'ndig dɔt,
m'a m'la kɔsɨgon dɔ kuj kɔsɨgont lom.
8Ĩgɨn awɨn be tit kilndii ke tit derr
kɨ ɗen ta kuj ndɨdt ye, in nõg a?
9Kɨtɔ doorg a ndan kamd dɔmt,
na toog kɨ ɓebo Tarsis in kete nõdt.
A ɗen kɨ ngani ko sãi,
kɨ larjã kɨ lɔr lod,
kɨta tɔ Bɨraɓe Luwah loi
kɨ Ngekunjɗang kɨ nge Israel kɨ ngekɔsɨgoni.
10Mbahg a ɗan ndogbɔrrg loi gog,
ngarg lod a ɗan kɨlaɓer adɨn
kɨta m'ndai kɨ wong lom,
na kɨgo ndigt lom la m'oon kumtondo loi ye.
11Tabitg loi a ɗan tag kɨndɔgndɔg,
a utɨn kàda ke ndɔ al,
kɨtakad andɨn goit kɨ nyamajg
lo girrdeg kɨ dang dang
nat kɨ ngarg lod.
12Kɨtɔ girrdeg ke kõɓe
kɨ a ɗan kɨlaɓer adɨn al a ne, a nujɨna
a nujɨn girrdeg kɨdangdang'n non kɔ.
13Nyatɔko lo dɔning Libã a ɗe ɓe loi,
ad i kag sipres, kɨ kag yida,
kɨ kag warɨm nat tube,
kad ɗan ne lo lom kɨjaɓat;
m'a mad lo nda njam i lo kɨmaj dum.
14Ngang lo deg'n ɗan sei
nya kɨ lo ngetɔgt,
a lan dɔd ber nõit,
na ngékidg tube
a ɔsɨn dɔd ber njait
A kunɨn ɓebo lo Bɨraɓe,
Siõ lo Ngekunjɗang lo Israel.
15Ke neni ĩn nya kɨ la kɔ kɨ kɔsɨta,
na de tee roit al kaa,
m'a m'teli nya kɨmajkoo dum mbãkɨnõt,
kɨ nyaronel kɨ ro ngakat kɨ ngaka.
16A il mba girrdeg kɨ dang dang;
a i taa nyamajg lo ngarg titbe tɔ.
A i ger mĩ Bɨraɓe Ngekaj,
kɨ Ngebadɔi, Ngetɔg lo Jakob.
17M'a mad lɔr ɗe gagoot ningakasɨ,
m'a mad larjã ɗe gagoot hand,
kɨ ningakasɨ ga goot kag,
kɨ hand gagoot mbalg.
M'a mad lapia i ngekõɓe,
na ngegangta i denesew.
18A oon dɔ ta lo nyaɗa kɨ lo ngetɔgt
kam dɔningt loi gog al,
ke tel gootɓe, ke nuj kam dɔningt loi.
A i ndah tɔ ndogbɔrrg loi kaj,
na tabitg loi tɔd i Ndub tɔ ho.
19Kàd a i kunj loi lokɨkàda gog al ta,
nah a ndah dɔit gog al tɔ,
na Bɨraɓe a i kunj loi kɨ mbãkɨnõt,
Luwah loi a i nyatɔko loi.
20Kàd loi a ud gog al ta,
nah loi a diw til gog al tɔ,
kɨta Bɨraɓe a i kunj loi mbãkɨnõt,
na ndɔ hɔndo loi a tɨga.
21Deg loi tube a ĩn deg kɨdenesew,
dɔning a i lod mbãkɨnõt.
In non la i dɔj kag kɨ m'hɔa ye,
i kɨlaɗa jim kad m'ngan tɔko.
22De kɨdu a tel kɨdub,
na kɨdu tɔi a i girrdeg kɨ dum dakɔrd.
Mĩ Bɨraɓe, m'a mad ɗa nya 'nten
Kanag kɨ dɔkag loa.
Currently Selected:
Ejai 60: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
