Ejai 51
51
Tag kɨta sɔl kam Jerusalem
1Oon dɔ ndim, in ngétuɓa go denesew,
in ngésah Bɨraɓe.
Urɨn kumsɨ kɨdɔ mbalt'n
Bɨraɓe tɔsɨ tɔrrsɨ kadat,
i nɔlɨn lo kɨgir holɓet'n
Bɨraɓe ɔrrsɨ kamt.
2Urɨn kumsɨ kɨdɔ bɔwsɨ Abrahamt,
kɨ Sara kɨ ngekoojsɨ.
Lon i kɨ kɨɗanbe ɓaitɔ la m'kuna ye,
m'njang dɔa, m'ada bɨla tɔ.
3Kɨtɔ Bɨraɓe a sɔl kam Siõ,
a sɔl kam gootɓeg loa tube.
A ad dɨlalo loa tel tit ndɔɔ Eden,
ning loa kɨ tut kurum
a i tit ndɔɔ lo Bɨraɓe.
A ngahn ronel kɨ kamnda tit,
ndub kɨ pa kɨ kɔsɨ tɔ.
4Deg lom, oon dɔ ndim.
Girrdeg lom, i nelɨn mbisɨ kɨromt,
kɨta ndikun a tee koromt,
na m'a mad ɗob nyaɗa
kɨdenesew lom
kad i kunj lo deg.
5Ndɔ kug kɔrrɨm kam ɓert lom i nderbe,
kaj lom a tee hɔi,
na jim a gangta dɔ girrdegt kɨ dang dang.
Doorg a ndan kamd dɔmt,
a ɓan kul tɔg jim.
6Unɨn kumsɨ kɨ dõ dɔrãt,
oon lo kɨber dɔningt tɔ.
Kɨtɔ dɔrã a nyẽmɨr kɔ tit sahorr,
dɔning a tel kɔkɨ,
a ngisɨ tit kub be,
ngéndɨt tɔ a nujɨn ko tit ngankurg,
na kaj lom a tokɨnõt,
na denesew lom, dɔboia a goto.
7Oon dɔ ndim, in ngéger denesew,
deg kɨ ta lom i kamsɨt,
Ot ɓoolɨn nyataj lo deg.
Ot ndadɨn nõ kidt lod.
8Kɨtɔ kɨɗukɨs a sad ad goton tit kub be,
na kur a sad
tit'n a san bĩ bat ye be ho.
Ndɔ denesew lom a tokɨnõt,
kaj lom tɔ a to ngakat kɨ ngaka.
9Bɨraɓe, i tee, i tee.
Ad jii ɓai kɨ tɔg.
I tee tit'n i teen
ndɔt kɨkete nõ kam kohgt kɨmaɗi.
I ĩ hã i tɔsɨ ngetɔg al e?
I ɔsɨ dɨragõ tɔ ale?
10I ĩla ad man kɨ bahbot yii ndã,
kɨ dɔɓul mang tɔ ale?
I ĩ la i tee ɗob kam bahbot kɨwo kɨɓing
kad kɨbadɔg loi tɔint ale?
11Titbe tɔ kɨbadɔg lo Bɨraɓe tel ɗen Siõt
kɨ pa kɨ kɔsɨ tadt,
na ronel kɨ mbãkɨnõt a i dɔdt,
a ngahn kamnda kɨ ronel,
na kamkil kɨ tõ ɗusɨɗusɨ a goton kɔ.
12Ĩ mĩ, mĩ la m'sɔl kamsɨ ye.
In nõ kad i ɓool de kɨ ngekoi,
ke ngon Adam kɨ ngetɔi tit mũ be a?
13Kami oi dɔ Bɨraɓe kɨ Ngeɗai,
kɨ nge tee dɔrã ad tat
kɨ ngenda girr dɔning,
ad i ɓool kɨkanj nya ta
kɨsĩ mbã kàd udɨn,
nõ wongt lo ngeɗa nya kɨ lo ngetɔgt,
lon ndɨ ɗa lo nuja?
Wong lo ngeɗa nya kɨ lo ngetɔgt i ɗah a?
14Oo de'n gɔsa gɔkɨ,
a oi kam dangait al, a taa nyana dõ,
na a nal nyasan al tɔ.
15Kɨtɔ mĩ Bɨraɓe Luwah loi,
mbur bahbo mad hula ko huwhuw,
tɔm i Bɨraɓe Ngetɔg tube.
16M'nda tag lom tait,
na m'ut dɔi kɨ ndil jim.
M'tee dɔrã mad tat
na m'nda girr dɔning.
M'el ngendɨ Siõ m'an:
in girrdeg lom.
17I tel i tee, i tel i tee,
I ɓai dõ, Jerusalem,
in Bɨraɓe adi kop wong lon kɨ jin
ad ãi,
na ãi nya tube ad tel dɔi wãri.
18Ku ngan kɨdɨngãgt tube kɨ oojd,
kɨkɨɗa kɨ ɔrri ta ɗob goto.
Ku ngan kɨdɨngãgt tube in i tod ye,
kɨkɨɗa kɨ hɔ jii ɔrrɨn goto.
19Nyag kɨjoo 'nten son dɔit.
Nõ a nõi a?
Tel gootɓe kɨ tuj, ɓo kɨ kiyaɗɔɔ.
Nõ a sɔl kami a?
20Tɔg nganig goto,
ton kɨ dɔ tɔ ɗobgt tube
tit kal kam bandt be.
Unɨn wong lo Bɨraɓe
kɨ ndàng lo Luwah loi dɔdt.
21Kɨtɔ 'nten, oo dɔ ta 'nten,
in ĩ de kɨdangt,
kɨ ngékasɨɗa, na i kasɨnduu al.
22Titbe kel Bɨraɓe loi, Bɨraɓe Luwah loi
in ɗa kɨ deg lon dɔ tat:
M'ɔrr nyakãi kɨ tel dɔ de wãri
kam ngot, kɨ kop wong lom jiit kɔ,
nẽbe kɨnõt a ãi al ta.
23M'a m'nya ngon non
kam ji ngéɗa kumi ndot,
igɨn elɨn anan:
i ɗug kɨber kɨtakad kɨ toi.
I tel gidi tit dɔning,
tit ɗob kad deg tɔint be.
Currently Selected:
Ejai 51: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
