Ejai 43
43
Bɨraɓe kɨ kɨɗanbe la i Ngebadɔ Israelag ye
1Ĩ Jakob, tajigla,
kel Bɨraɓe ngendai
kɨ ngeɓai, ĩ Israel:
Ot ɓool, kɨta m'badɔi,
m'kuni kɨ tɔi m'an: Ĩ lom.
2Lon a ud man a ne,
m'a mĩ sei nat;
ke a i gang bah kaa
a tiw dɔi al,
ke a i ndia kam horrt kaa,
horr a õi al,
ndõhorr a ɔdi al tɔ.
3Kɨtɔ mĩ, Bɨraɓe Luwah loi,
Ngekunjɗang kɨ Nge Israel, Ngekaji.
Mad Ejipt kad i nyabadɔi,
Etiopi kɨ Seba ɔrrɨn gooti.
4Kɨtɔ ĩ taa, gati i ngãi takum'mt,
in nya kɔsɨgon, na m'tari.
Kɨtɔ 'nten mad deg m'gan gooti,
girrdeg kɨ dang dang kɨta kumkajir loi.
5Ot ɓool, kɨta mĩ sei nat,
ko loɓakàdt m'a mad koih tel kɨ ɓe,
kokudkàdt m'a m'kaw deg kɨ tit.
6M'a m'el lo kɨ dɔɔ m'an: Ad.
Na m'a m'el lo kɨ ɓodo m'an:
Ot kɔg dɔd.
Ad nganɨm kɨdɨngã ɗen ko dɔningt kɨsãi,
kɨ nganɨm kɨdẽ ko dɔngoi dɔningt tɔ.
7I ɗen kɨ dekɨɗen'n kun tɔm dɔnt,
deg tube'n m'ndad,
in m'ɓad, kɨta kɔsɨgon lom.
8Ad teen kɨ girrdeg kɨ mundo,
ĩgɨn awɨn kɨ kumd,
mboog, na awɨn kɨ mbid.
9Kɨ girrdeg tube kawɨn na kɨnat.
Kɨ girrdeg kɨ dang dang mbõn na ho.
Nõ kudt asɨ kɔr hoi nyag n'tɔi kete,
ke asɨ kɔj'j nyag kɨmaɗi a?
Ad'd ɗen kɨ ngémanajg lod
kad ɔrrɨn ta dɔdt.
Ad anan: 'Nten i rota.
10In ngémanajg lom, kel Bɨraɓe,
in, ɓerg lom kɨ m'mbedsɨ,
kad i gerɨn, na admɨn kamsɨ,
kad i gerɨn girra ad i Mĩ.
Kete nomt luwah mad kɨ ɓah goto,
ke gomt luwah mad kɨɗang goto tɔ.
11I mĩ, i mĩ la mĩ Bɨraɓe,
ngekaj kɨɗang goto, na mĩ tã.
12Mĩ la mĩ ngekelta kɨ ngekaj,
kɨ ngelamber,
lon yog goton ne dãsɨt ɓaitɔ,
in ngémanajg lom, kel Bɨraɓe.
13Mĩ Luwah, Mĩ titbe,
na ngekugkɔrr jimt goto,
m'a m'ɗa kɨla, nõ a ɔgɨm dɔ a?
14Titbe kel Bɨraɓe,
Ngebadɔsɨ, Ngekunjɗang kɨnge Israel:
I kɨtatɔsɨ la m'ndɨ m'lan
madngéta kɨdɔ Babilont ye.
M'a m'tuɓa ngekãi tube kɔ,
ad i Kaldeag tube,
ngégaburo dɔ too kɨbogt lod,
in awɨn kamt.
15Mĩ Bɨraɓe Ngekunjɗang losɨ,
Ngendah Israel, Ngar losɨ.
16Titbe kel Bɨraɓe,
nge tee ɗob kam bahbot,
nge tee ɗob dɔ mangt kɨbobo,
17kɨ ngeɓai kɨ pusɨɗɔɔ kɨ sɨndag,
koosɨ ngéɗɔɔg, kɨ kɨrãɗɔɔg,
got gog son ber nat kɨɗabe,
a asɨ ɓain al,
oin tit horr kɨ mesɨ
lambat be,
18Ot gaan dɔ nyagt kɨ tɔin kete.
Ot gan kamsɨ dɔ nyagt kɨ kaglot
kɨmaɗi nu.
19Oon m'ndɨ m'ɗa nya kɨkij.
Nya'n non ndɨ ɗa lo tee tajigla,
oon ale?
à m'a m'ɗa ɗob kam dɨlalot,
kɨ bahg kam lot kɨ mangah.
20Dãg kɨmut a ɔsɨn gonɨm,
talbisɨg kɨ bulumg tɔ
kɨta mad man tee kam lot kɨ mangah,
kɨ bahg kam dɨlalot
kad kɨmbedg lom ãin.
21Deg'n m'ɓad kɨtɔm mĩ kɨɓe
a lan mber ndubɨm
22Na ĩ Jakob, i ko kɨdɔmt al,
ĩ Israel, roi oi siw romt.
23I ɗe romt kɨ batg loi
kɨta kadkari kɨlahorrt al,
ke ɔsɨgonɨm kɨ kadkari kɨjakɔ al.
Mad i ɗa ɓer kɨ kadkari kɨlakad al,
ke kad i ngah nya kɨkootmbĩ al, mad roi oi siw.
24I ndugo nya kɨkootmbĩ
kɨ nar loi adɨm al,
ke ad kamm ndan
kɨ mbool kadkari kɨjakɔ al.
Na adɨm m'ɗa ɓer kɨ majalg loi,
i telɨm ɓert.
25I mĩ, mĩ la m'bɔrr tɔidɔtag loi kɔ,
kɨtatɔm mĩ kɨɓe,
mad kamm gah dɔ majalgt loi gog al.
26I tɔsɨ hangal i ndɔl dɔt,
ad j'aw nat lo gangtat.
Ĩ kɨdɔi, elta ɔrrɨn ta dɔit.
27Bɔwi kɨdasa ɗa majal,
ngémbeltag loi tɔin dɔ ta lom,
28Kɨtɔ 'nten mad kɨbog kɨ lo
kɨjaɓat't telɨn kɨyerr,
na m'la Jakob kɨ nujkɔt,
Israel tɔ kad i nya kɨkid.
Currently Selected:
Ejai 43: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
