Ejai 40
40
Bɨraɓe elta sɔlɨn kam deg lon
1Titbe la i takel Bɨraɓe Luwah losɨ:
I sɔlɨn kam deg lom, i sɔlɨn kamd.
2Elɨn ɓebo Jerusalem ta kɨsɔl,
na elɨna ta kɨ ndisɨ kɨbo,
kad kaglo ɗa ɓer loa tɨga,
ɗagootal loa i kɨ nyàgo kɔ,
ada ba gira majalg loa kɨtaagbe
ko ro Bɨraɓet, majalg loa tube i kɨ nyàgo kɔ.
3Ndi mad ko an:
I ɗan go ɗob lo Bɨraɓe kam dɨlalot.
I ɗan go ɗob kɨbo kam mut,
ad ɗa kɨɗing sew kɨta Luwah loj.
4A utɨn hollo kɨɗen ad ɗoosɨ,
mbalbo kɨɗen, kɨ door kɨɗen a gand kɨber,
a sɨran dɔ gotlog adɨn asɨna Jerɨr,
kɨ log kɨ tɔrr huthut adɨn õ tõri.
5Kunj Bɨraɓe kɨɗangeɗeng a i kɨ tee dɔ,
dekɨɗen a ooa ta kɨɗabe.
'Nten la i ta'n Bɨraɓe el ye.
6Ndi mad el an: I la mber.
Ndi mad an: Ka m'la mber ɗi a?
Elɨm kad m'el titbe:
Deg tube in tit mũ be,
majkood tube tit hut mũ kɨ gawt be.
7Mũ tut, huta tɔ ndulo,
lon Bɨraɓe to ko'n pu kɨdɔt.
Rota, deg in tit mũ kɨ tɔga goto be.
8Mũ tut, huta ndulo,
na Ta lo Luwah loj a tokɨnõt.
Hoita kɨmaj kɨta deg
9Na ĩ taa, al dɔ mbalbot kɨ ngal,
Siõ, i la mber hoita kɨmaj.
Un ndii kɨ dõ kɨ tɔgi,
ĩ ɓebo Jerusalem ngelamber hoita kɨmaj.
Un ndii kɨ dõ, ot ɓool nya mad.
El ɓebog kɨ dɔning Judat an:
Oon Luwah losɨ.
10Oon. Bɨraɓe Luwah ndɨ ɗe kɨ tɔg,
a õɓe kɨ tɔg jin.
Oon. Nyabaji loa i jiat,
kand kɨlaɗa loa i nõat.
11A ul ɓut deg lon tit ngekul batg be,
a ɔi ngan batg jint,
a tod kadɨnt,
a ɔrr ta ɗob ngé kɨ ɗa ilɨn mba jan jan.
Nya mad kɨ taan na kɨ Luwah lo Israel goto
12Nõ mbɔj mang kɨ dajint,
na ɔj tat dɔrã kɨ dajin a?
Nõ ɔi buning tube kam ngotɔrnyat,
na mbɔj kɔi mbalbog
kam nya kɔjkɔinyat,
kɨ doorlog tɔ kam nya mbɔj kɔinyat a?
13Nõ mbɔj Ndil Bɨraɓe,
Nõ i ngekɔjta kɨ ngendooa nyat tɔ a?
14Nõ oon na sia dɔ tat kad ta nyandoo loa,
ke nõ ndooa ɗob ɗa nya denesew a?
Nõ ndooa terr
ke ɔja goosɨ ger girr nya a?
15Oon, girrdeg kɨ dang dang
titɨn kɨ man kɨ so ɗeng nja kɨɗabe
kam ngo kɔd mant be,
tit kɨ bu kɨ toletlet
dɔ nyakɔjkɔi nyat be.
Oon, doorg ĩn tit kɨ bu kɨ ɓai tui.
16Ke kagg kɨ dɔning Libã in ngãi kaa,
asɨn ɗa horr dɨngɨr kadkarit al.
Dãg loa kɨngãi asɨn kadkari kɨlahorrt al tɔ.
17Girrdeg tube in tit nyag kɨgoto be nõat.
Bɨraɓe ood tit nya kɨkari pãbe.
18Nõ asɨ kad i ɔjɨn na ne kɨ Luwah a?
Ke ɓakumta ɗi a i ɔjɨn na ne a?
19Kɔd pel ninga a ɗa ɓakumta yo,
kɔd pel lɔr tɔ a ut dɔa kɨ lɔr,
na lẽ larjã, a ɗa kɨlaningag kɨtaa.
20De kɨ ngendo kɨ asɨ kad la kadkari,
a kɔt kag mad kɨ a ndusɨ al,
a sah ngegoosɨ kad tɔsa ɓakumta yo
kad kag kɨ tɔsɨ nõ ngang, na ɗa dõ kɨ kɨɗan.
21I gerɨn ale? Oon dɔ ale?
Elɨn loyaɓoodat nu ale?
I gerɨn ngeɗa dɔningt ale?
22Bɨraɓe dõ dɔ gor ngendɨ dõ dɔ dɔningt,
i ngéndɨ dõ dɔgor dɔningt,
na ngéndɨt dɔningt titɨn kɨ kɨbetg.
Ĩ kɨ nge tee dɔrã ad tat tit pal kub,
teea ad tat pilpil,
tit kujkub kɨta ndɨ girrt be.
23In ad ngarg telɨn nya kɨkari,
na ad ngégangtag kɨ dɔningt telɨn nya kɨpãbe.
24Tit kagg, a hɔnd kaglo tẽbe, a dubɨnd kaglo tẽ,
ngɨrad aw ningt ngãi al ɓaitɔ.
Lon a to ko'n pu kɨdɔdt ye, a ndulon,
na nélbarwãi ɔid kɔ tit tisa be.
25Nõ asɨ kad ɔjmɨn ne,
kad m'taana sia a? Kel
Ngekunjɗang.
26Unɨn kumsɨ kɨ dõ na oon.
Nõ ndah nyag 'nten,
ke nõ ad koosɨg teen kɨgo kɔrrdt a?
Kund tube kɨ tɔd,
kɨta tɔg loa kɨngãi,
kɨ ngang loa kɨbobe,
kɨkɨɗa kaa nãi al.
27Jakob, kɨtɔɗi elɨn ta 'nten a?
Israel, kɨtɔɗi i el titbe an:
Ɗob lom i kɨyadɔ kɨ ro Bɨraɓet,
na Luwah tur go ta lom al?
28I gerɨn ale? Oon dɔ ale?
Bɨraɓe i Luwah Ngendɨ kɨ nõt,
Ngendah dɔning kɨ dɔngoiag tu.
Bɨraɓe ɔr al ho, roa oi yelel al ho tɔ.
Terr loa dum nder girra.
29Bɨraɓe ndɨ ad tɔg de'n kɔr ɗaa,
ndɨ ad tɔg de'n tɔga goto.
30Kɔr a ɗa ngan kɨdɔdug, ad rod a oi yelel,
basa deg kaa gig a gad ad son tɔ ho.
31Na deg'n ndɨ ndan kamd dɔ Bɨraɓet ye,
a ngahn tɔg kɨkij gog.
A ɓain tit'n yel kuro a ɓain be,
a ãin ngɔd, na a ɔrrɨn al,
a ndian kɨ njad, na rod a oi yelel al.
Currently Selected:
Ejai 40: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
