Ejai 34
34
Bɨraɓe gangta dɔ girrdegt kɨ dang dang kɨdɔ Edomt
1I ndɔt'n in girrdeg kɨ dang dang kad oon dɔ,
in girrdeg kɨ dang dang i nelɨn mbisɨ.
Dɔning kɨ nyag kɨ ɓant, oon dɔ.
Dunia kɨ nyag tube kɨ kamt.
2Kɨtɔ Bɨraɓe ɓawong
dɔ girrdegt kɨ dang dang tube,
wong loa kɨtɔlsɔkɨr
i dɔ koosɨgt lod tube tɔ.
Gangta nujkɔ dɔdt,
nyad kɨta tɔl kɔ.
3A ũ kɨtalg lod kɨtɨga,
koot nind a su lui kɨ dõ,
mosɨd a nũ tit ngan bahg dɔ mbalbogt.
4Koosɨg tube kɨ dɔrãt a yimrɨn,
a ɓirin dɔrã tit maktub be.
Koosɨ ngéɗɔɔg tube a tuson,
tit mbi nduu kɨ ɗa urr,
tit mbi mbaiɓood kɨ
ɗa tuso ningt be ho.
5Kɨtɔ kiyaɗɔɔ lom
tel tit de kɨ kasɨ ɗaa be kam dɔrãt dõ.
Oon. A so dɔ dɔning Edomt,
kɨ dɔ degt'n m'gang ta nujkɔ dɔdt.
6Kɨyaɗɔɔ lo Bɨraɓe ɗɔɔsɨ kɨ mosɨ,
mbool dã ut dɔa,
mosɨ ngan batg kɨ bĩãg,
kɨ yib munjodun bal batg.
Kɨtɔ Bɨraɓe jakɔ kadkari lon
kam ɓebot kɨ Bosra,
na tɔl deg ngãibe kam dɔning Edomt.
7Dɔgg ngan mangg
kɨ bɔw mangg son sed nat.
Dɔning lod ãi mosɨ ndan, ad ɗaa
mbool dã ut dɔ buning lod tɔ.
8Kɨtɔ i ndɔ ndangɨra lo Bɨraɓe,
i ɓal ndangɨra kɨta ɓebo Siõ.
9Man bahg kɨ dɔning Edomt a telɨn gudrõ,
buning loa a tel supɨr,
na dɔning loa a tel gudrõ kɨ kõ horr.
10Ndɔ ho kàda ho, a oi al,
sah horra a ɓa luilui kɨ dõ,
a i gootɓe ɓal kɨ ɓal,
labe kɨnõt de mad a tɔit al.
11A i londɨ lubog kɨ ndurg,
kɔig kɨ kagãg a hɔn londɨ tit.
Bɨraɓe a la kɨla mbɔj nya dɔat kɨta tuja,
kɨ kag mbɔj nya kɨta tuja kɔ.
12Kɨbog loa a ndan de ngart,
mbaiɓeg loa tube a goton.
13Kõng a ɓan kam kujkõɓegt loa,
hayag kɨ ngarg,
a ɓan kam kuj ngomdɔɓegt loa,
a tel londɨ talg, kɨ lo ɗa bulumg.
14Dãg kɨmut a ndɔdɨn na kɨ bisɨkolog tit,
ndil kɨyerrg
a kon kɨdɔnat.
Lot'n non ndil kɨmajal'n deg kunɨna lilit
a tee ndɔ a hɔlondɨt,
a ngah lotaakò tit.
15Lot'n non li a ngah lotont, a ũ kawɨn,
a tɔ ngang, a kaw ngang kɨront.
Lot'n non tɔ la malg tube a kawɨn na kɨ tit,
kɨɗen kɨ namɨn.
16I sahn kam maktubt lo Bɨraɓe, i dan:
Kɨkɨɗa ku dãgt'n non kɨ a nãi goto,
kɨkɨɗa kɨ a ɓod kɨta namɨn goto,
kɨta ta Bɨraɓe la nda mber ye,
Ndila tɔ la kawd kɨnat ye.
17Ya yuk dɔdt,
jia kegd londɨ kɨ kɨla mbɔj nya.
A tel lo lod mbãkɨnõt,
ɓal kɨ ɓal a ndɨnt.
Currently Selected:
Ejai 34: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
