Ejai 30
30
Kam kɨndah dɔ Ejipt't i nya kɨkari pãbe
1Beto lo ngan kɨdum, kel Bɨraɓe,
unɨn ndisɨ kɨkanjɨm mĩ,
unɨn kɔsɨ i ɗan ne
na kɨgo ndigt lom al,
kɨtakad i ɗan ne majal dɔ majalt.
2I ndɨ awɨn dɔning Ejipt't
kɨkanj ndɨje ta kɨ tamt,
i sahn loyarosɨ girr tɔg Paraõt,
kɨtakad i yan rosɨ ndil Ejipt't.
3Tɔg Paraõ a tel nya
kɨpãbe rosɨt,
yarosɨ ndil Ejipt't
a tel rosɔl losɨ.
4Kɨtɔ mbaiɓeg kɨ Juda
ndɨn ɓebo Soant woi,
na ngombangkɨlag loa
aw teen ɓebo Hanest.
5In tube a in kɨ rosɔl
kɨta girrdeg'n non,
a asɨ ɗan nya mad kɨtad al.
A dĩnd al ho, a ɗan sed al ho,
na in nya rosɔl kɨta
kid tã koon.
6Takɨgang lo Bɨraɓe dɔ dãgt kɨ Negeb laten:
A ndan dɔning Kamkɔl kɨ dɔning kamkil gangɨn
ad i lon kõ tubo kɨ bɔw tubo, kɨ li kɔka,
kɨ li dɨragõ ngeɓai kɨ bɔgɨn ndɨnt,
kɨ wonga õ tit horr be, ndɨnt.
Ɔin, nyamajg lod dɔ korrogt
na ton nyag lod dɔ lukumgt,
awɨn ne ro girrdegt kɨ asɨn ɗa sed al.
7Kɨtɔ ɗan Ejipt ɗa sed i kari pãbe.
Nya nõ la m'kuna'n m'an i
Rahab ngekɔd ron ye.
8Aw tajigla, i ndang nyag 'nten
dɔ bart joo.
I ndang kam maktubt
kɨtakad i najkɨma kɨ tokɨnõt
kaglot kɨ a ɗe.
9Kɨtɔ in girrdeg ngédum,
in ngan ngéltakɨbal,
ngan ngékoodɔ ta nyandoo
lo Bɨraɓe al.
10Ndɨ elɨn ngékonyakamndilt anan:
Ot kon nyakamndilt.
Elɨn ngékelta kɨ ta Luwaht anan:
ot keljɨn ta kɨro.
Eljɨn ta kɨ to pepe.
Eljɨn ta kɨ nelj tã:
11I nyan ɗob kɨ dene kɔ, i tɔɔn ɗob,
ot keljɨn ta lo Ngekunjɗang
kɨ Nge Israel.
12Kɨtɔ 'nten
Ngekunjɗang kɨ Nge Israel el an:
I ndɨ kidɨn ta 'nten,
na i ndan kamsɨ dɔ nyaɗat kɨ lo ngetɔgt
kɨ kɨgoot al, oond nyandɨna rosɨt tɔ.
13Kɨtɔ 'nten ɗagootal losɨ'n non
a i tit bɔrr kɨ ngal kɨ kaai dene,
so kɨ gon na ɗa kɨ n'tet.
Tentenbe a so.
14Jo bɔrr lo ngeɓajo tɔ kɔsɨ kɔsɨ,
A tɔna kɨkanj kookumtondo,
ad gajo kɨ nãi
kɨ asɨ kunɨn yalhorr mbahilt,
ke kɨta kɔdɨn man kam jot goto.
15Kɨtɔ titbe kel Bɨraɓe Luwah
Ngekunjɗang kɨ Nge Israel:
Kaj losɨ i kam tel kɨromt na a i taan ko.
Kam ndɨ lomt kɨ kulkɨɓa la a i
ngahn tɔgt, na i ndigɨn al.
16Na elɨn anan:
à ã, be al, j'a kɨ j'ãi kɨ sɨndag.
Kɨtɔ ten ãin kɨ ngɔd.
Kamla elɨn tɔ:
Jĩ j'a j'ãi kɨ sɨndag kɨ ngɔd ngãi.
Ngétuɓa gosɨ
a in ngékãi ngɔd ngãi ho.
17Lon de kɨɗabe a ndang nya a ne,
deg dub kusɨt a ãin na.
Lon deg mi a ndangsɨn a ne,
in tube a i tĩn na,
mbã kad ndegsɨ nãi tẽbe,
tit drapo tasom mbalbot,
tit drapo dɔ door lot.
Bɨraɓe un kɔn kad n'oo kumtondo lo deg lon
18Na Bɨraɓe ndɨ ngoo kɨ n'oo kumtondo losɨ.
A ɓai kɨta n'ɔjsɨ kamkẽ.
Kɨtɔ Bɨraɓe i Luwah kɨ Ngeɗadenesew.
Ngéronelg la i deg tube'n
ndɨ ndan kamd dɔat ye.
19Ã, deg kɨ Siõ ngéndɨ Jerusalem.
A i nõn gog al. Kɨtɔ a ɔjsɨ kamkẽ
lon, a oo dɔ ndi nõ losɨ.
Lon a oo dɔ a ne, a turi ta.
20Bɨraɓe a adsɨ nyasa lon in kɨ kamkɔl,
a adsɨn man kãi lon danggt ɗasɨ
Ngéndoosɨ nya a yan rod al,
a oon Ngendoosɨ nya kɨ kumsɨ.
21Lon i ndɨ aw ko kõit ke ko gelit,
mbii a oo dɔ ta ko goit an:
'Nten la i ɗob, i ndiant.
22Yo larjãt kɨ ut dɔ yog losɨ,
lɔr kɨ ut dɔ ɓakumta nya kɨ tɔsɨ losɨ,
a i telɨnd kɨyerrt.
A i land kɔ tit nya kɨyerr be.
A elɨnd anan:
Awɨn kodɔɔ ɓirɓit.
23Bɨraɓe a ad ndii ed
dɔ konyat loi'n i dub ningt.
Nyasa kɨ tee dɔningt
a maj ngãi, a to mbuj tɔ.
Ndɔt'n non nyakulg loi
a san nya kam dɨlamut kɨtat.
24Bɔw mangg kɨ korrog'n
a ndɔɔn a san muro kɨ ɗa kɨ kat
kɨ tel kama kɨ pel ke kɨkagbaj.
25Dɔ mbalbot kɨ ngal puwuw kɨɗen,
kɨ dɔ door lot kɨ ngal kɨɗen, ngan bahg
kɨ ngan mang a nũnt,
ndɔt'n a tɔl deg koosɨgt,
lon kuj ngomdɔɓeg a tetɨn kɨber.
26Kunj nah a i tit kunj kàd,
na kunj kàd a i nja tanãimɨta tit kunj kàd
kɨtanãimɨta be, ndɔt'n Bɨraɓe a ndomɨn
dó lo deg lon,
na a yoot dó nda mbukɨmbukɨt'n ndand.
Takɨgang lo Bɨraɓe dɔ Asiriagt
27Oon. Tɔ Bɨraɓe ndɨ ɗe ko sãi.
Wong loa i kɨtɨngabil
tit horr kɨ kõ giling giling.
Taa ɗoosɨ kɨ wong,
ndõa i tit horr kɨ kõ mugɨj be.
28Ko kɨ taat i tit man kɨ õ ngãi
tɔi dɔ lo mbã hɔ ta de dõ,
kad kɨ'n sian girrdeg kɨ dang dang
kɨ nya sia nya kɨ ngenuj nya,
tit jam kɨ la ta girrdegt
kɨ dang dang kad ndomɨn ɗob.
29A ɔsɨn pa ndɔ tit pa ɗa nah kɨjaɓat,
a in, kɨ ronel kamsɨ tit de kɨ
ngekaw go ngekun tow, ndɨ awɨn
dɔ mbalbot lo Bɨraɓe.
Kɨ kɨ dɔ Mbalt lo Israel.
30Na Bɨraɓe a ad'd oon dɔ
ndia kɨkootɓool, a ad'd oon tɔg jia
kɨ nda nya, nat kɨ wong kɨtɨngabil, kɨ
ndõ horr kɨ kõ mugɨj, kɨ ndii kɨ ked,
kɨ nélbarwãi, kɨ kɔsɨndii.
31Asiriag a ndadɨn lon oon ndi Bɨraɓe,
kɨ a ndad kɨ gɔlkɔp.
32Ndɔ'n Bɨraɓe a ɔja kuma
kɨ nde la kɨtaa, a oon kah kɨndehg
kɨ kɔdg go ndat.
Bɨraɓe a ɗɔɔ sia kɨ ji kɨ kun kɨ dõ.
33Maɗi nu horr i kɨ i kɨ ɗa go,
i kɨ ɗago woi kɨta ngar,
lot kɨ tat kɨ kokɨɓing.
I lo horr kɨ ɗa kɨ kir ngãi
Ko kɨ ta Bɨraɓet kɨ õ tit
horr kɨ supɨr be, la horr dɔt.
Currently Selected:
Ejai 30: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
