Ejai 2
2
Bɨraɓe a õɓe dɔ dɔningt kɨtaagbe kɨ lapia
1Ta'n Ejai ngon Amots oo dɔ Judat kɨ Jerusalem laten:
2Kaglo mad a ɗe nõ,
kam ndɔgt kɨdɔboit
mbalbo'n kuj lo Bɨraɓe ɗa dɔt,
a ngal tɔi tasom mbalbog tube,
a tɔi doorlog.
Girrdeg kɨ dang dang tube
a awɨn kɨroat.
3Koosɨdeg a awɨn,
a elɨn anan: I ɗen,
ad j'awɨn mbalbot lo Bɨraɓe,
j'awɨn kuju lo Luwah lo Jakob,
kɨtakad ndooj goɗobg lon,
kad kɨ ndia dɔ ɗobgt loa.
Kɨtɔ nyandoo
a tee ko ɓebot kɨ Siõ,
ta lo Bɨraɓe
a tee ko Jerusalemt.
4A gangta ku girrdegt kɨ dang dang,
a i ngekoogo ta
lo girrdeg ngãibe.
A ɔin kiyaɗɔɔg lod,
a hɔn kɔsɨ ndɔɔt,
ningag lod tɔ,
a ɗand ngorongt,
girrdeg madg a ɔin kiyaɗɔɔg
ɗɔɔn ne girrdeg madg al,
nẽbe kɨnõt a ndoon ɗɔɔ al.
Bɨraɓe a gangta dɔ ngédɔngangt
5Ngékɨɓe lo Jakob, i ɗen,
ad kɨ ndian kam kunjt lo Bɨraɓe.
6Kɨtɔ i nya deg loi kɔ,
ad i ɓe lo Jakob,
kɨta ɗoosɨn kɨ mboolig
kɨ ɗen ko loɓakàdt,
in ngéndõteg
tit Pilistiag be,
na lan kɔd nat
kɨ mbahg tɔ.
7Dɔning lod ɗoosɨ
kɨ larjã kɨ lɔr,
nyamajg lod dum tɨda.
Dɔning lod ɗoosɨ kɨ sɨndag,
pusɨg lod tɔ dum tɨda.
8Dɔning lod ɗoosɨ kɨ yog,
ɔsɨn dɔd ber nõ kɨlaɗa jidt,
kɨ nõ nyat kɨ ngan jid ɗa.
9Titbe deg a lan dɔd kɨber,
a sɔlɨn dɔd tɔ.
Ot nyàgo majal lod kɔ.
10I ya roi kam mbalgt,
i yaroi kam buningt,
nõ nyat kɨkootɓool lo Bɨraɓe
kɨ nõ nyẽr majt loa kɨtɔitɔi tɔ.
11De'n ɓa tan kɨ dõ,
Bɨraɓe a la dɔa kɨber,
a sɔl dɔ ngédɔngang tɔ.
Ndɔt'n non Bɨraɓe kɨ kɨɗanbe
la a i kɨ tɔi kɨ dõ ye.
12Kɨtɔ ndɔ lo Bɨraɓe Ngekoosɨg
a ɗe dɔ ngédɔnganggt,
kɨ ngeɓa tad kɨ dõ,
kɨ de kɨɗen kɨ ngetɔi dɔn kɨ dõ,
kad la dɔa kɨber.
13Kɨ dɔ kag sedɨrgt kɨ ngal
kɨ dõ, kɨ dɔning Libãt,
kɨ dɔ kag dilgt kɨ dɔning Basan,
14kɨ dɔ mbalbogt kɨ ngal tube,
kɨ dɔ doorlogt kɨ ngal tube,
15kɨ dɔ kuj ngomdɔɓet kɨ ngal kɨɗen,
kɨ dɔ ndogbɔrrt kɨngang kɨɗen,
16kɨ dɔ too kɨbogt
tube kɨ Tarsis,
kɨ dɔ toogt kɨmajkoo.
17De kɨ ngeɓa tan kɨ dõ,
Bɨraɓe a la dɔa kɨber,
a sɔl dɔ ngedɔngang tɔ.
Ndɔt'n non Bɨraɓe kɨ kɨɗanbe
la a i kɨ tɔi kɨ dõ ye.
18Yog tube a goton.
19Deg a andɨn bulombalgt
kɨ ɓegang kɨ dɔningt
kad kɨ n'ãin na ta wongt
kɨkootɓool lo Bɨraɓe,
kɨ nõ nyẽr majt loa kɨtɔitɔi,
lon a ɓai kad kɨ n'nda
ngéndɨ dɔningt ɓoolt.
20Na yo larjãg kɨ yo lɔrg
in deg ɗand
kɨ n'ɔsɨn dɔd ber nõdt,
ndɔt'n non a tɨland kɔ
adɨn yegg kɨ dowg.
21A andɨn bulombalgt
kɨ mbɨna mbalgt kɨ riya,
kad kɨ n'ãin nõ wongt
kɨkootɓool lo Bɨraɓe,
kɨ kɨ nõ nyẽr majt loa kɨtɔitɔi,
lon a ɓai kad kɨ n'nda
ngéndɨ dɔningt ɓoolt.
22I nyan ta ɓakul de'n
a taakò kɨ kõnɨn,
kɨta ndaa i ɗi a?
Currently Selected:
Ejai 2: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
