Ejai 3
3
Bɨraɓe a gangta dɔ Judat kɨ ɓebo Jerusalem
1Oon Bɨraɓe,
Bɨraɓe Ngekoosɨg
nya Jerusalem kɨ Juda kɔ,
nyangomro
kɨ nya kɨkad tɔg tɔ,
ad i nyasa tube
kɨ mankãi tube tɔ
2nya gõɗɔɔg kɨ ngéɗɔɔ,
kɨ ngégangta,
kɨ ngékelta kɨ ta Luwaht,
kɨ mboolig kɨ ngahtɔgg,
3kɨ bɨradɔ dɔ degt kɨdɔmi,
kɨ ngégangta,
kɨ ngékad kɔj
kɨ ngegoosɨ ɗa kɨla,
kɨ mbooli ngegoosɨ ger nya.
4M'a mad de kɨdɔdug
kad in ngarg lod,
na ngan kɨɗoig a õnɓe dɔdt.
5Deg a dan kumna ndo,
de mad a da kum kɨmad ndo,
dekɨɗen ɔsɨ ta madɓen.
Ngon kɨdɔdu a kid ngahtɔg,
na de kɨpãbe a kid de
kɨ sumba kɔsɨgon.
6De mad a hɔ ngonkõn
kam kujt lo bɔwɨn,
a ela an:
I ndɨ kɨ kubji, a ĩ kɨbo loj,
un nya kɨtuj 'nten jiit.
7Kam ndɔat'n non kɨmad a ko an:
Mĩ ngeyoot de al,
kɨta nyasa
ke kub goto ɓe lom.
Ot ndam kɨbo dɔ degt.
8Jerusalem tuj, Juda so,
kɨta ta lod
kɨ kɨlaɗad ndoorɨn Bɨraɓe,
na kidɨn maj kooa kɨtɔitɔi.
9Takumd manaj
ndoord in kɨɓeg,
ɔjɨn majal lod kɨtɨga
kɨkanj ya dɔ tit Sodom be.
Beto lod kɨtɔ majal
ndɨ ɗe kɨ nya kɨ to dɔdt.
10Elɨn kad de kɨdenesew,
maj a urra
kɨta a sa kand kɨlaɗan.
11Beto lo de kɨmajal,
kõ a i dɔat
kɨta a ngah kɨgo kɨlaɗant.
12Aa. Deg lom,
nge da kumdeg ndo i ngon kɨdu,
na dekɨdẽg õnɓe dɔdt.
Aa, deg lom,
ngékɔrri ta ɗob lain mut,
kɨta tujɨn ɗob ndiasɨ.
13Bɨraɓe ɔj ron kɨta gangta,
duba kɨta gangta dɔ degt lon.
14Bɨraɓe mbagɨr gangta
dɔ kɨbogt, kɨ mbaiɓeg
lo deg lon, an:
Ĩn la san ndɔɔ nduu ye;
nya lo ngéndog'n ɔin
i kam kujgt losɨ.
15Kɨtɔɗi i ɓan ne
dɔ deg lom kɨ ber a?
I tɔsɨn takum ngéndog
i retɨn njɔtnjɔt a?
Kel Bɨraɓe Luwah Ngekoosɨg.
Bɨraɓe a gangta dɔ ngan kɨdẽgt kɨ Siõ
16Bɨraɓe el an:
Kɨtɔ ngan kɨdẽg
kɨ Siõ ɗan dɔngang,
ndian kɨ ta kɨ ɓa kɨ dõ,
elɨn na ta majal kɨ ɗa
kɨ kum kɨ nda sepsep,
na ndia ndek ndek,
adɨn ningag
kɨ njadt kon kengkeng;
17Bɨraɓe a ad ngorwoi sa dɔ
ngan kɨdẽg kɨ Siõ.
Bɨraɓe a ɔrr nyakutdɔ rod
ad rod sɔld.
18Ndɔt'n non Bɨraɓe
a ɔrr ninga pare kɨ njadt,
kɨ nyahɔ bisɨdɔ,
kɨ nyapare kɨ taana kɨ nah,
19kɨ ningambi,
kɨ ngan ningaji,
kɨ takub dɔɔ dɔ
kɨ kub dulo dɔ
20kɨ kadmul, kɨ ninganja,
kɨ ndardɔɓo,
kɨ ku yib kɨkootmbĩ,
kɨ gaj kɨdɔ rot,
21kɨ ninga kɔsɨdɔnya kɨ jit,
kɨ ninga kɨ la kont,
22kɨ kub kɨmajmaj, kɨ kubji,
kɨ kub kɨ ga kɔt, kɨ ɓɔl kɨ jiit,
23kɨ kutram,
kɨ kub lẽ kɨ sɔl lom lom,
kɨ kub dulo dɔ,
kɨ kub kut takum.
24A i titbe:
Nya kɨ ndum ga goot
yib kɨkootmbĩ,
kɨla kɨkari ga goot
ndar dɔɓo,
dɔ ngɔ ga goot
bisɨdɔ kɨ hɔ nomnom,
kub kɨlagum ga goot
kubji kɨmaj,
kuro dɔ ga goot majkoo.
25Dekɨdɨngãg loi a son
ta kiyaɗɔɔt,
na kɨrãɗɔɔg loi
a son ta ɗɔɔt.
26De kɨbog ngéndɨ tabitgt kɨ Siõ a nõ'n rod, hɔn ndo
a ndɨn ber dɔningt kɨ ro kɨ kil yolel.
Currently Selected:
Ejai 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
