Yaɓooda 49
49
Jakob elta dɔ nyagt kɨ a teen dɔ nganɨnt
1Jakob kun nganɨn kɨdɨngãg, el an:
I kawɨn na kɨnat kad m'elsɨ ta nyag'n
a teen dɔsɨt kam ndɔgt'n kɨ a ɗen.
2Ĩn ngan Jakob,
i kawɨn na kɨnat,
oon dɔ I nelɨn mbisɨ
kɨ ro bɔwsɨ Israelt
3Ruben, ĩn ngonderrɨm
kɨ ĩ tɔgɨm, kand kɨdasa lo ngangɨm,
i tɔi ngankõig tube,
ĩ kɨdasa kam tɔgt kɨ rongangt.
4A i kɨlapuu tit man kɨ leg beal.
A ĩ kɨdasa al kɨta al dɔ tɨra to bɔwit,
kamla i yerr kɨ tɨra tom,
5Simeõ kɨ Lebi in ngankõnag,
na lan kɔd nat kɨta ɗa nya
kɨgo lo ngetɔgt kɨta tɔ koh deg.
6Na m'ndig ndarom nat sed
kam kɔjtaɗat kɨ majal lod al
M'ndig kĩ sed nat kam nganat lod al
Kɨtɔ kam wongt lod tɔlɨn deg. Na
kam dɔngangt lod
gangɨn ne ngɨrabo nja bɔw mangg.
7M'ndɔl wong lod kɨ rokat
kɨ nyaɗa lod kɨ lo ngetɔgt.
M'a m'kegd kam dɔningt lo Jakob Israelt,
m'a m'tɨnda m'tĩd kam dɔning Israelt.
8Juda, ĩla ngankõi a ndubɨn ye,
jii a ɔi kɔ madngétaigt,
ngan bɔwi kɨdɨngã a ɔsɨn dɔd ber nõit.
9Juda i ngon tubo.
I ɓai ta nyat kɨ i hɔa,
ngonɨm. Ɔsɨ goj na,
i to ber tit tubo,
tit kõ tubo.
Nõ a ada ɓai dõ a?
10A taan kag kõɓe ji Judat al,
ke kag ngar ji ngakaat,
mbã ngea, ngekad kam kɨsokɨber ɗe.
Ĩn girrdeg kɨ dang dang a telɨn rod go tat loa.
11Ĩn dɔ korro lon kad nduut,
dɔ ngon kõ korro lon kad dĩndut kɨmajtɔi,
tugo kubg lon kam kasɨnduut,
tugo kubji lon kam man kand nduut.
12Kuma kɨrre kɨ kasɨnduu,
na nganga nda kɨ mba. 13Jabulon a hɔlondɨn kad bahbot.
Toog a ndin ta kumkat loa.
Ɗobnin loa i kad ɓebot kɨ Sidõ
14Isakar i korro kɨngang,
to ber dan kɨnga batgt.
15Oo loto'n non i kɨmaj,
na dɔning i kɨnel La bɔgɨn ton nya kɨ kɔi,
na ɗa kɨlaɓer kɨ lo ngetɔgt.
16Dan a gangta dɔ degt lon,
kɨta i kɨkɨɗa ku girr Israelagt.
17Dan a i li dɔ ɗobt
a i kɔka dɔ ngon ɗobt,
kɨ ngedõ gidnja sɨnda,
kad ngekala so kɨ gidɨn.
18Bɨraɓe m'nda kamm dɔ kajt loi,
19Gad, ɓut ngewaig a utɨna,
Gad tɔ a tuɓa god kɨ wai.
20Ajer, ndɔɔ loa a tee kɨ nyasa kɨmajmaj,
dɔning loa a ad ngarg nyasa kɨmaj ngãi.
21Neptali i tit wal kɨ nya dõ be
Wal kɨ a ooj ngang kɨ rod maj.
22Jojep i dɔj kag kɨ and ngãi,
i dɔj kag kɨ and ngãi kad mant kɨɓa.
Dɔjiag al kɨ dõ dɔ ndɔɔgt.
23Ngékɨrãg turɨna kɨ kɨrãg
ɗana ta kõ, ɔsɨna ta,
24na gã kɨrãg loa ɗà bijir,
kagjia kɨ jia ngang siw
kɨtakul ji Ngetɔg kɨ tɔi lo Jakob
kɨtakul Ngekulbatg kɨ mbal lo Israel,
25kɨtakul Luwah lo bɔwsɨ kɨ Ngeɗasesɨ,
kɨtakul Ngetɔgtube ngenjang dɔi
nat kɨ majkurrg kɨ dɔrãt dõ,
kɨ majkurrg kɨwo kɨɓing kɨ to girr dɔningt ber,
kɨ majkurrg kɨ mba dekɨdẽt kɨ kujngon.
26Njangdɔ kɨ bɔwi njangɨn dɔi
A urrɨn mbuj mbuj kɨ dɔit kɨ tɔi
mbã kɨ tasom mbalbot kɨ ɗa kɨnõt,
A ĩn kɨdɔat, dandɔ Jojept'n
ɔrrɨna ku ngankõat, ndana kɔtko kɨɗa.
27Benjami i bisɨkolo kɨ ngetɔrrdã huthut.
Kɨsĩ a sa dã hɔn balang,
na lokɨsɔle a keg nya kɨ hɔ lo ɗɔɔt.
28Ĩgɨn non tube la ĩn girr Israel kɨkɨlah gidaijoo, ta'n non la i ta'n bɔwd eld, lon njangɨn dɔd. Njang dɔ dekɨɗen kɨ njangdɔ kɨ kɔsɨ dɔa.
Koi Jakob
29Kamla ndad mber an: M'a m'aw ro degt lom. A i duwmɨn nat kɨ bɔwɨmg kam bulombalt kɨ kam ndɔɔt lo Epron kɨ Hetia. 30Kam bulombalt kɨ kam ndɔɔt lo Makpela, kɨ i nõ Mamret, kam dɔning Kanat. Abraham ndugo bulombal'n non ji Epront kɨ Hetia, nat kɨ ndɔɔ, nyakagɓe kad i lo diw ngékoig. 31Nu la duwɨn Abraham tit kɨ nẽa Sara. Nu la duwɨn Isaak kɨ nẽa Rebeka. Na nu la m'duw Lea tit ye. 32Ndɔɔ kɨ bulombal kɨ kamt, ĩn kɨ ndugo ji Hetiagt. 33Lon Jakob ndamber nganɨn tɨga ye, ɔi njan kɨ kam tɨrat, na koah tee, aw ro degt lon.
Currently Selected:
Yaɓooda 49: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
