Yaɓooda 50
50
1Jojep so kɨ takum bɔwɨnt, nõ kɨdɔat, na hɔ kuya kɨ ront. 2Jojep ndamber dɔktorg ngékɨlaɓerg lon kad kɨ wurɨn nin bɔwɨn kɨ kĩ kɔg nin ndum. Dɔktorg tɔ wurɨn Israel kɨ kĩ. 3Ɗan mbã ndɔ dɔsɔɔ, kɨta titbe la i ndɔ wur nin de kɨ kĩ ye. Ejiptiag nõna ndɔ dɔtanãimɨta.
4Lon ndɔ hɔndo tɔi oi ye, Jojep elta kɨ ngékɨɓe lo Paraõ, an: Ĩla m'ngaa maj takumsɨt a ne, m'kɔsɨ kad elɨn ta kɨ mbi Paraõt anan: 5bɔwɨm adɨm m'nda yo an: Oo m'to m'oi Kam bulot lom'n murr kam dɔning Kanat, nu nõ la a i duwɨmt ye. Tajigla m'kɔi kɨ i nyam ad m'aw m'duw bɔwɨm, na m'a m'tel. 6Paraõ el an: Aw, i duw bɔwi kɨgo yotɨn ad i nda.
7Jojep aw kɨta duw bɔwɨn. Ɓerg lo Paraõ tube, kɨ bɨradɔg kɨ kuju loa, kɨ bɨradɔg tube kɨ dɔning Ejipt, 8kɨ ngékɨɓe lo Jojep, tube kɨ ngankõa kɨ ngékɨɓe lo bɔwa tube awɨn nat sia: Na nyan ngandg kɨdu, kɨ ɓut batg lod kɨ ɓut mangg lod koon kam dɔning Gosent. 9Pusɨg kɨ ngékal sɨndag awɨn nat sia i koosɨg kɨ toɓool. 10Ɗen gar ndah nyakot lo Atad kɨ gid bah Jurdẽt. Nu la gan guud kɨ nõ kɨ kamkil. Jojep ad hɔn ndo bɔwɨn ndɔ tanãimɨta. 11Lon ngendɨ dɔning Kanat oon hɔndo'n non dɔ gar ndah nyakot lo Atad ye, elɨn anan: Oon hɔndo kɨngãi lo Ejiptiag Kɨtɔ 'nten la, kunɨn ne tɔ lon non hɔndo lo Ejiptiag kɨ gid bah Jurdẽt. 12Titbe la ngan Jakob ɗan ne kɨ bɔwd kɨgo tat'n bɔwd ndad mbera. 13Nganag unɨn na awɨn sia dɔning Kanat, duwɨna kam bulombalt kɨ kam ndɔɔt lo Makpela, ĩn Abraham ndugo ji Epront kɨ Hetia, nyakagɓet, kad i lo duw ngékoig, kɨ i nõ Mamret. 14Lon Jojep duw bɔwɨn oi ye, tel kɨ dɔning Ejipt't nat kɨ ngankõn kɨ tubeg'n awɨn sia kad duw bɔwɨn. Jojep sɔl kam ngankõn.
Go koi Jakobt
15Lon ngankõ Jojep oon kad bɔwd oi ye, elɨn anan: Maj a ne, Jojep a ɔsɨd ta, na a tel bad majal tube'n n'ɗan sia. 16Lan kɨla ro Jojept, anan: Bɔwi ndamber kete nõ koint an: 17a elɨn Jojep titbe: I nyàgo tɔidɔtag lo ngankõig kɨ majalg lod kɔ kɨta ɗan sei majal Tajigla kɨ kɔi, i nyàgo tɔidɔta lo ɓerg lo Luwah lo bɔwi kɔ. Lon Jojep oo dɔ tag'n non ye, nõ. 18Kamla ngankõa kɨdɔd aw son kɨnõat, elɨna anan: Oo jĩ ɓerg loi. 19Jojep eld an: Ot ɓoolɨn, mĩ ye m'ga goot Luwah a? 20Ĩng, ɔjɨn ta kamsɨt kad i ɗamɨn majal, na kɔjta lo Luwah ad maj tee kamt, kɨtakad ajɨn deg ngãibe kad ndɨn kɨ dɔd dõ, tit'n hã ĩn ne ɓone. 21Kɨtɔ 'nten, ot ɓoolɨn, m'a m'oo goosɨ kɨ ngansɨ. Titbe la eldɨn ta soolɨn kamd ye.
Koi Jojep
22Jojep ndɨ Ejipt, ĩn kɨ ngékɨɓe lo bɔwɨn: Ɓal ndɨ kɨ dɔ dõ lo Jojep i ɓu kɨkɨlah. 23Jojep oo ngan Epraim mbã kɨ ngaka kɨ ngékõmɨta, ngan Makir ngon Manase tɔ oojɨnd ndand dɔ bing Jojept. 24Jojep el ngankõn an: M'to m'oi, na rota Luwah a ɗe rosɨt, a tee sesɨ kam dɔningt 'nten kɔ, kɨ n'aw sesɨ kɨ dɔningt'n unɨn kɔ'n kɨ yo kɨ nda yo ad Abraham kɨ Isaak kɨ Jakob. 25Kamla Jojep ad ngan Israel ndan yo adɨna, an: Rota, Luwah a ɗe rosɨt, na a unɨn kɨngam nẽ be awɨn ne nu.
26Jojep oi. Ɓala i ɓu kɨkɨlah. Wurɨna kɨ kĩ kɔg nin ndum, lana kes nint kam dɔning Ejipt't.
Currently Selected:
Yaɓooda 50: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
