Yaɓooda 48
48
Jakob njang dɔ Epraim kɨ Manase
1Go nyagt'n non, elɨn Jojep anan: Oo mõi ɗa bɔwi. Na Jojep ɔi nganɨn kɨdɨngã kɨjoo, Manase kɨ Epraim aw sed. 2Elɨn Jakob anan: Oo ngoni Jojep ɗe roit. Kamla Israel hɔ ron ba, ndɨ dõ dɔ tɨrat. 3Jakob el Jojep an: Luwah Ngetɔgtube tee hɔi kɨ romt ɓet kɨ Luj kam dɔning Kanat, njang dɔm. 4Elɨm an: Oo m'a mad ooj ngang, m'a mad bɨlan kɨdɔtdɔt, m'a m'teli girrdegt kɨ dang dang koosɨ, na m'a mad dɔning 'nten kohi kɨgoit kad i nyakagɓe loa kɨ mbãkɨnõt. 5Tajigla ngani kɨdɨngã kɨjoo, ĩgɨn oojɨnd andɨn kam dɔning Ejipt't kete nõ teem roit kam dɔning Ejipt't, Epraim kɨ Manase, a ĩn lom tit'n hã Ruben kɨ Simeõ ĩn ne lom ye be ho. 6Na ngang'n oojd godt a ĩn loi. A kunɨnd kɨ tɔ ngankõdg kɨdɨngã la kad taan nyakõnduba lod. 7Lon m'tel ko dɔning Padan-Aram ye, m'ɗa kamkil kɨta Rasel oi kadɨmt dɔ ɗobt kam dɔning Kanat, ɗob kaw Eprata wo sĩ ɓaitɔ, na m'duwa nõbe kad ɗob kaw Epratat, ad i Betlehem.
8Israel oo ngan Jojep kɨdɨngã, el an: Ĩgɨn ɗan ĩn nõg a? 9Jojep tur bɔwɨn an: Ĩn nganɨm kɨdɨngãg'n Luwah adɨm nẽ be. Israel ela an: M'kɔi, ad'd ɗen kɨ romt kad m'njang dɔd. 10Kum Israel ɔi dɨrɨr kɨta i bɨga ad asɨ koo lo al. Jojep ad'd awɨn roat. Israel ɗad lapia njuta, kuid kɨ ront. 11Israel el Jojep an: M'oo m'an m'a m'oo takumi gog al, na oo Luwah nyam ad ngani kaa m'ood. 12Kamla Jojep ɔrrd dɔ goj bɔwɨnt, na ɔsɨ dɔn ber ningt. 13Jojep ɔid tujoo, hɔ Epraim jikõnt sumba jigel Israel, na hɔ Manase jigelɨnt sumba jikõ Israel'n, na aw sed nderbe kɨ roat. 14Israel sɨra jikõn ndah dɔ Epraimt, ĩn i kɨdu, na nda jigelɨn dɔ Manaset. Mbel go jin tit be tɔ njangɨn dɔd tit Manase i ngonderr. 15Kamla njang dɔ Jojep, el an: Luwah'n bɔwɨmg Abraham kɨ Isaak ndian nõat, Luwah kɨ ngengomɨm ndɔ koojɨmt mbã ɓone 16malaika ngekug kɔrrɨm kam majalt tube kɨ njang dɔ ngang'n ɗan, kɨ ad kunɨnd kɨ tɔm, kɨ tɔ bɔwɨmg Abraham kɨ Isaak. Kɨ ad'd bɨlan kɨdɔtdɔt ngãi dɔningt. 17Lon Jojep oo kad bɔwɨn ndah jikõn dɔ Epraimt ye, nela al, ad hɔ ji bɔwɨn dɔ Epraimt, kad kɨ n'telɨn'n ndah dɔ Manaset. 18Jojep el bɔwɨn an: Ã ã i titbe al bɔwɨm, ĩn ɗan la i ngonderr ye, i ndah jikõi dɔat 19Na bɔwa mbet, el an: M'ger, ngonɨm, ĩ kaa a tel girrdeg, ĩ kaa a i kɨbo, na ngongoa a i kɨbo tɔia; koah kaa a tel girrdeg koosɨg kɨ dang dang. 20Njang dɔd ndɔt'n non, an: Kɨtakuli la Israela a njangɨn dɔ, an: Kɨ Luwah teli tit Epraim kɨ Manase. Na ndah Epraim kete nõ Manaset. 21Israel el Jojep an: Oo m'to m'oi, na Luwah a i nat sesɨ, a tel sesɨ kam dɔningt lo bɔwsɨg. 22M'adi gaj dɔning mad tɔi kɨ lo ngankõi, kɨ m'ta ji Amoriagt kɨ kiyaɗɔɔ lom kɨ gã kɨrã lom.
Currently Selected:
Yaɓooda 48: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
