Yaɓooda 47
47
1Jojep aw ro Paraõt, ela an: Bɔwm kɨ ngankom kɨ nyakulg lod kɨbo kɨ kɨdu kɨ nyag lod tube, ɓain dɔning Kanat, ɗen kam dɔning Gosent. 2Jojep ɔi deg mi ku ngankõnt, dad Paraõ. 3Na Paraõ el ngankõag an: Kɨla losɨ i ɗi a? Turɨn Paraõ anan: Ɓerg loi ĩn ngékuldãg, jĩ tit Bɔwjg. 4Elɨn Paraõ anan: I kɨta ndɨ mbah dɔningt 'nten la kɨ ɗen ye, kɨta lo kul batg lo ɓerg loi goto, na ɓoo õ ngãi dɔning Kanat. Kɨtɔ 'nten, kɨ kɔi kɨ i nya ad ɓerg loi ndɨn dɔning Gosent. 5Kamla Paraõ el Jojep an: Bɔwi kɨ ngankõi ɗen roit. 6Dɔning Ejipt kɨtaagbe i loi. Ad i kɔt lo kɨmaj tɔi kad i nda bɔw kɨ ngankõit tit. A asɨ ndɨn kam dɔning Gosent kari. Na ĩla i ger deg kɨ ngégoosɨ kulnya a ne, a i ndad dɔ nyakulgt lom.
7Jojep aw kɨ bɔwɨn Jakob, ada ɗa nõ Paraõt. Jakob njang dɔ Paraõ. 8Paraõ ndɨje Jakob an: Ɓal ndi kɨ dɔi dõ i bãi a? 9Jakob tur Paraõ an: Ɓal ndiam kɨ njam dõ asɨ ɓu kɨdɔmɨta. Ɓal kawɨm kɨ dɔm dõ i tẽbe, na i kɨmajal, asɨna kɨ ɓal kaw kɨ dɔ dõ lo bɔwɨmg kɨ kaglo ndiadt kɨ njad dõ al. 10Jakob njang dɔ Paraõ, kamla nyã na tee. 11Jojep ad bɔwɨn kɨ ngankõn londɨ kɨ kɔsɨ dɔd kam dɔning Ejipt't, kam gaj dɔningt kɨmajtɔi kam dɔning Ramsest, tit'n hã Paraõ ndaan mbera. 12Jojep ngom bɔwɨn kɨ ngankõn kɨ ngékɨɓe lo bɔwɨn tube kɨ nyasa kɨgo kɔr ngandgt. Jojep oo go nyasa kaglo ɓoot.
Goosɨ kɨ terr'n Jojep teen kaglo ɓoot
13Nyasa goto kam dɔningt'n non kɨtaagbe kɨta ɓoo õ ngãi kɨ tɔi. Dɔning Ejipt kɨ dɔning Kana oon nya kɨ'n ɗan al kɨta ɓoo kɨ õ. 14Jojep kaw nar tube'n deg ndugon ne nyako kɨ kam dɔning Ejipt't kɨ kɨ kam dɔning Kanat, na aw kɨ nar'n non kam kujt lo Paraõ. 15Lon nar kɨ dɔning Ejipt't kɨ kɨ dɔning Kanat tɨga ye, Ejiptiag tube awɨn ro Jojept, elɨna anan: Adj nyasa Kɨtɔɗi j'a kɨ j'oin nõit, kɨta nar kɨ goto a? 16Jojep el an: Adɨn nyakulg losɨ, na m'a m'adsɨ nyasa got nyakulgt losɨ, ĩla nar tɨga. 17Kamla ɗen kɨ nyakulg lod kɨ ro Jojept, na Jojep ad'd nyasa ɔrrɨn got sɨndag kɨ ɓut batg kɨ ɓut mangg kɨ korrog. Titbe la ad'dɨn nyasa kam ɓalt'n non ɔrrɨn got nyakug lod tube ye.
18Lon ɓal'n non tɔi ye, deg awɨn ro Jojept ɓalt kɨkõjoo elɨna anan: J'a kɨ ya dɔ nya mad ngeem al, nar loj tube tɨga, ɓut nyakulg tube ĩn lo ngeem, na nya'n nãi kɨnõ ngemt i dãroj kɨ dɔningg loj koon. 19Kɨtɔɗi j'a kɨ j'oin nõit a? Dɔning loj i nya al? I kanj'j ndugoj nat kɨ dɔningg loj i mbetɨn nyasa na jĩ kɨ dɔningg loj j'a kɨ jĩ ɓerg lo Paraõ. Adj kohnya kɨtakad kɨ ndɨn kɨ dɔj dõ, na kɨ j'oi al, na dɔning loj tel gootɓe al ho. 20Jojep ndugo dɔningg kɨ Ejipt't tube ad Paraõ kɨta Ejiptiag tube ɗaw ndɔɔg lod kɔ, kɨta ɓoo tɔi tɔgd. Titbe dɔning tube tel lo Paraõ. 21Jojep kaw deg kɨnat kam ɓebogt kɨ dɔboi ɗobnin Ejipt't mbã kɨ kɨmadt. 22Dɔning lo ngéjamosɨ kadkarig koon la ndugon al ye, kɨta ngéjamosɨ kadkarig ngahn ndɨ kun mad ko ro Paraõt, na ndɨ ngahn nyaɓetrod'n Paraõ ad'd. Kɨtɔ 'nten la ndugon ne dɔning lod kɔ al ye. 23Jojep el deg an: Ɓone m'ndugosɨ nat kɨ dɔning losɨ mad Paraõ. Oon konya kɨtɔsɨ laten, kad i duwɨn dɔningt, 24Lon kaglo ja nyako asɨ woi a ne, a adɨn Paraõ gaj kɨɗa ku kɨ mit. Na gaj kɨsɔɔ a i konya losɨ kɨta duw ndɔɔt, kɨta nyasasɨ kɨ ngékɨɓe losɨ kɨ ngansɨg kɨdu ho. 25Elɨna anan: Aj roj woi na, ad kɨ ngah maj takum ngeemt, kad jĩ ɓerg lo Paraõ. 26Jojep nda mber kad Paraõ ngah gaj kɨɗa ku kɨmit, na mberkɨnda'n non i dɔning Ejipt't mbã ɓone. Dɔning lo ngéjamosɨ kadkarig koon i dɔning lo Paraõ al.
Tag kɨ dɔboit'n Jakob el kete tã kad oi
27Israel ndɨ dɔning Ejipt't, kam dɔning Gosent, ngahn nyakagɓe lod kamt, oojɨn na, bɨlan kɨdɔtdɔt ngãi kɨ tɔi.
28Jakob ndɨ kɨ dɔn dõ dɔning Ejipt't ɓal kɨlah gidaitanaimɨta, na ndɔg tube'n Jakob ndɨn kɨ dɔn dõ i ɓal ɓu kɨdɔsɔɔ gidaitanaimɨta.
29Lon ndɔ koi Israel ɗe nderbe ye, kun ngonɨn Jojep, ela an: Ĩla m'ngaa maj takumit a ne, m'kɔi kɨ i la jii girr bɨngɨmt, na ɔjɨm kamkẽ kɨ nyaɗakɨro. M'kɔi kɨ i duwɨm Ejipt't al.
30Lon m'a m'to nat kɨ bɔwɨmg a ne, a unɨm kam Ejipt't kɨtɨga, a i duw kam dɔɓadt lo bɔwmgd. Jojep tur an: M'a m'ɗa kɨgo tat loi.
31Jakob el an: I nda yo adɨm. Jojep nda yo ada. Kamla Israel ɔsɨ dɔn ber kɨdɔ tɨrat.
Currently Selected:
Yaɓooda 47: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
