Yaɓooda 45
45
Jojep ad ngankõa gerɨna
1Kamla dum kad Jojep ire kamɨn ndang nõ degt kɨ ɗan kadɨnt, un ndin kon an: Adɨn deg teen tɨga Na de mad kɨɗang nãi roat al lon Jojep ad ngankõa gerɨna. 2Un ndin kɨ dõ nõn. Ejiptiag oon dɔ. Ngékɨɓe lo Paraõ oon dɔ ho. 3Jojep el ngankõn an: Mĩ Jojep Bɔwm ndɨ kɨ dɔn dõ ɓaitɔ ɔ? Ngankõag asɨn tura ta al kɨta ɗa ndadɨn nõat. 4Jojep el ngankõn an: M'kɔsɨ kɨ i ndɔt'n kɨ romt so. Na ndɔt'n kɨ roat. Eld an: Mĩ ngonkõsɨ Jojep kan i ɗawɨna ad ɗen sia Ejipt't la m'ɗan. 5Na tajigla ot kadɨn kamkil ɗasɨ. Ot kadɨn wong ɗasɨ dɔ rosɨt kɨta ɗawɨn i ɗawmɨn ad ɗen sem nẽ be, kɨta Luwah la lam kete nõsɨt kad m'ajsɨ. 6Tajigla ɓal joo tɔi woi la ɓoo õ kam dɔningt ne, na nãi ɓal mi ɓaitɔ, ɓalg'n de a ndɔɔ ke a ja nyako tit al. 7Luwah lam kete nõsɨt kad m'ngom nyasa kɨtɔsɨ kam dɔningt, kad ajɨn ne, na kad i teen ne ta ɓoot. 8Ĩng hã lamɨn nẽbe al, na Luwah ndam tit bɔw Paraõ be, ndam kɨbo dɔ ɓet loa tube, kɨ ngekõɓe dɔ dɔning Ejipt kɨtaagbe. 9I ɗan Kanag i telɨn kɨ ro bɔwmt, elɨna anan: Titbe kel ngoni Jojep, Luwah ndam kɨbo dɔ dɔning Ejipt't kɨtaagbe. I ɗe romt, ot ndɨ kɔkɨ. 10A i ndɨ kam dɔning Gosent, a ĩn kadɨmt nderbe, ĩ kɨ nganig, kɨ ngakaaig, kɨ batg loi, kɨ mangg loi, kɨ nyag loi tube. 11Labe la m'a m'oo goit ye, kɨta ɓal ɓoo nãi mi ɓaitɔ, na ɓeta i so ndo, ĩ kɨ ngékɨɓe loi kɨ nyag loi tube. 12Oon kɨ kumsɨ, ngonkom Benjami oo kɨ kumɨn ho, i mĩ kɨɓe la m'elsɨ ta kɨ tam ye. 13Ɔrrɨn bɔwm hoi tɔko lom tube kɨ dɔning Ejipt, kɨ nyag tube'n oon. I ɗan kanangbe, i ɗen kɨ bɔwm ne be 14Kamla so kɔ ngonkõn Benjamit kɨ nõ. Na Benjami nõ kɨ kɔat ho. 15Ɗà lapia ngankõn tube kuid kɨ ront nõ kɨdɔdt. Goot gog ngankõa elɨn ta sia.
Ngar Paraõ ndɨje Jakob kad ɗe nda ɓe kam dɔning Ejipt't
16Kaahd tĩ kɨ kam kujt lo Paraõ, deg anan: Ngankõ Jojep ɗen. Nya'n non nel Paraõ kɨ ɓerg loa. 17Paraõ el Jojep an: El ngankõig kad ɗan nya 'nten, kad ndan nya dɔ nyakulgt lod na ɓai awɨn kɨ dõt dɔning Kanat. 18Kɨ unɨn bɔwd kɨ ngékɨɓe lod, na ɗen romt. M'a m'ad'd nyag kɨmaj kɨ dɔningt Ejipt't. 19I ndad mber kad ɗan nya 'nten: Ɔin pusɨg kɨ kam dɔning Ejipt't kɨta ngansɨg kɨdu kɨ nẽsɨg, ɔrrɨn bɔwsɨ, i ɗen sia. 20Ot kad ta õ kamsɨ dɔ nyagt'n a tĩ nyan kɨta nyag kɨmajmaj kɨ dɔning Ejipt't kɨtaagbe ĩn losɨ. 21Ngan Israel ɗan titbe. Jojep ad'd pusɨg kɨgo mberkɨndat lo Paraõ, na ad'd nyasa kɨta ɗob. 22Ad dekɨɗen kudt kubg kɨ la rot. Ad Benjami sikel nar ɓumɨta kɨ kub kɨ la rot mi. 23Titbe la lan kɨ ro bɔwɨnt ho: Korrog kɨlah ton nyag kɨmajmaj kɨ dɔning Ejipt't, na kõ korrog kɨlah ton nyako kɨ nyasa kɨ bɨna kɨsa ɗob mbat kɨta bɔwɨn. 24Kamla Jojep dan ngankõn kɨ ɗobo ad awɨn, na eld an: Ot kɔlɨn na dɔ ɗobt.
25Ɓain dɔning Ejipt teen dɔning Kanat ro bɔwd Jakobt. 26Elɨna anan: Jojep i kɨ dɔn dõ ɓaitɔ, i ngekõɓe dɔ dɔning Ejipt't kɨtaagbe. Na Jakob ndɨ njirir kɨta oo ta lod kɨ tĩnt al. 27Ɔrrɨna hoitag tube'n Jojep eld. Lon oo pusɨg'n Jojep lan kad unɨn na ne ye, kamla kam bɔwd Jakob nela. 28Israel el an: Asɨ ta, ngonɨm Jojep ndɨ kɨ dɔn dõ ɓaitɔ. M'a m'aw kɨ m'ooa kete kamtã ka m'oi.
Currently Selected:
Yaɓooda 45: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
