Yaɓooda 44
44
Ngahn kop lo Jojep kam sakɨt lo Benjami
1Jojep el bɨradɔkuj lon an: Ut nyasa sakɨt lo deg'n non ad ɗoosɨ kɨgo tɔg to nyat lo dekɨɗen, na i la nar lo dekɨɗen ta sakɨt loa. 2I la kop lom, kop larjã lom, ta sakɨt lo ngondunt, nat kɨ nar nyako loa, bɨradɔkuj ɗa tit'n hã Jojep elɨn.
3Lon lo ar ye, nyan deg'n non ad awɨn kɨ korrog lod. 4Lon teen gid ɓet kɨtɨga, na awɨn sãi al ɓaitɔ la, Jojep el bɨradɔkuj lon an: I ɓai i tuɓa go deg'n non. Na lon i ndɔd'd a ne, eld titbe: Kɨtɔɗi i ban ne maj kɨ majal a? Kɨtɔɗi i ɓoogɨn ne kop larjã lom a? 5Kɨtɔɗi i ɓoogɨn ne kop'n ngeem a ãin nya a? Nya'n i ɗan ten, i nya kɨ majal. 6Bɨradɔkuj ndɔd'd, na eld tag'n non. 7Turɨna anan: Kɨtɔɗi ngeem elɨn ta kɨ titbe dɔjt a? Nya kɨ yerr kad ɓerg loi ɗan nya kɨ titbe. 8Oo nar'n kɨ ngah ta sakɨgt loj kete ye, kɨ telɨn dɔning Kanat kɨ ɗen jadi gog al e? Titbãi j'a kɨ ɓoog nar ke lɔr kam kujt lo ngei a? 9Dekɨɗen ku ɓergt loi'n a i ngah kop roat a ne, kɨ oi kɔ, na jĩ j'a kɨ tel ɓerg lo ngei. 10Bɨradɔkuj turd an: Maj Kɨ ɗan kɨgo tat losɨ De'n m'a m'ngaa kop roat a ne, a i ɓer lom, na ĩn, ta a goto dɔsɨt. 11Tentenbe dekɨɗen usɨ sakɨ lon kɨber, na tee ta. 12Bɨradɔkuj mbagɨr sah ro ngahtɔgdt tɔl taa dɔ ngondunt't, na ngah kop kam sakɨt lo Benjami. 13Kamla tilɨn kubg lod. Dekɨɗen ndah nya dɔ korrot lon, na telɨn kɨ ɓebot gog.
Juda naj dɔ ngonkõn Benjami
14Juda kɨ ngankõn ɗen kuju lo Jojep, na Jojep i nõ ɓaitɔ, son ber nõat. 15Jojep eld an: Ɗi kɨbe i ɗan a? I gerɨn kad de kɨtitɨmbe ndɔ ndil ale? 16Juda tur an: Ɗi j'a kel ngeem a? Ka j'an ɗi a? Ka kɨ j'ɔrr ta dɔjt titbãi a? I Luwah la tee dɔ ɗagootal lo ɓerg loi ye. Oo jĩ ɓerg lo ngeem, jĩ kɨ de'n ngahn kop jiat. 17Jojep el an: I majal kad i ɗa titbe. De'n ngahn kop jiat la a i ɓer lom ye, na ĩn ta, i tel awɨn kɨ ro bɔwsɨt kɨ lapia.
Juda ko kɨta Benjami
18Kamla Juda ngɨse kɨ ro Jojept, ela an: A, ngeem, m'kɔi ad ɓer loi elta kɨ mbi ngemt, kanj ɓa wong dɔat ĩ tit Paraõ be. 19Ĩ ngeem la i ndɨje ɓerg loi an: Ĩn kɨ bɔwsɨ kɨ ngonkõsɨ a? 20Kɨ tur ngeem j'an: Jĩ kɨ bɨga bɔwj kɨ ngonkõj kɨdɨngã kɨdu'n ooja da bɨgant. Ngahtɔg ngon'n non oi, na ĩ kɨ kɨɗanbe la nãi ji kont na bɔwa tara. 21Kamla el ɓerg loi an: I ɗen sia romt kad m'ooa kɨ kɔrkumm. 22Kɨ tur ngeem j'an: Ngon'n non asɨ nya bɔwɨn al, ĩla nyàa a ne, bɔwa a oi 23El ɓerg loi tɔ an: Ĩla ngondun losɨ ɗe sesɨ al a ne, a oon takum'm gog al. 24Lon kɨ tel kɨ ro ɓert loi kɨ bɔwɨm ye, j'ɔrra go tag lo ngeem. 25Bɔwj el an: I telɨn gog, i ndugon nyako sĩ kɨtaj 26Kɨ tur Bɔwj j'an: J'asɨ kaw al. Ĩla ngondun loj i nat sej a ne, j'a j'aw kɨta j'asɨ ko takum de'n non, na kɨ ngondun loj i nat sej tã. 27Ɓer loi kɨ Bɔwj elj an: I gerɨn kad nẽm ooj ngan kɨdɨngã joo be adɨm. 28Kɨkɨɗa goto romt, ad m'an rota i kɨ tɔrr huthut kɨta m'ooa gog al, mbã ɓone. 29Ĩla unɨn ĩn ndɨn tɔ, na nya mad kɨmajal a ɗaa a ne, a adɨn dɔm kɨndà ɗisɨ kɨ kamkil. 30Tajigla ĩla m'tel kɨ ro ɓert loi kɨ bɔwɨm, na ngon i nat sej al, tit'n hã tarɨn ngonɨn ngãi ye, 31lon a oo ngon nat sej al a ne, a oi. Na ɓerg loi a adɨn dɔ ɓer loi kɨnda kɨ bɔwj ɗisɨ kɨ koo kɨ kamkil. 32Kɨtɔ mĩ ɓer loi m'un ta lo ngon kɨdɔmt nõ bɔwɨmt. M'ela m'an: Ĩla m'tel sia kɨ roit al a ne, m'a mĩ kɨ ta dɔmt nõ bɔwɨmt paar. 33Kɨtɔ 'nten la, tajigla m'kɔi kɨ ad ɓer loi nãi gog kad m'tel ɓer lo ngeem m'gan goot ngon, na kɨ ngon aw nat kɨ ngankõn. 34Titbãi m'a m'tel kɨ ro bɔwɨmt ĩla ngon i nat sem al a? M'ɓool kad m'oo majal kɨ a ɗe dɔ bɔwɨmt.
Currently Selected:
Yaɓooda 44: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
