Yaɓooda 43
43
Ngankõ Jojep nat kɨ Benjami awɨn dɔning Ejipt't kaw kɨkõjoo
1Ɓoo õ kɨdumbit dɔningt'n non. 2Lon san nyako'n ɗen ne Ejipt't tɨgan woi ye, bɔwd eld an: I telɨn gog, i ndugon nyako sĩ kɨtɔj. 3Na Juda tur an: De'n non elj tɔj wakɨsɨ an: Ĩla ngonkõsɨ i nat sesɨ al a ne, a oon takum'm al. 4Ĩla ad ngonkõj aw sej nat a ne, j'a j'aw kɨ ndugo nyasa jadi. 5Na ĩla i ndig kad aw sej al a ne, jĩ, j'a j'aw al ho kɨta de'n non el an: a oon takum'm al, ĩla ngonkõsɨ i nat sesɨ al. 6Israel el an: Kɨtɔɗi i ɗan ne sem majal titbe, ad elɨn de'n non kad ngonkõsɨ kɨmad i nõ a? 7Turɨn anan: De'n non ndɨjej ta ngãi dɔ rojt kɨ dɔ nooj'jgt an: bɔwsɨ ndɨ kɨ dɔn dõ ɓaitɔ a? Ke ngonkõsɨ mad i nõ a? Na kɨ tura kɨgo ta kɨ ndɨjegt loa. J'asɨ ger kad a elj an: I ɗen kɨ ngonkõsɨ so o?
8Juda el bɔwɨn Israel an: I nya ad ngon aw nat sem, na j'a kɨ ɓai j'aw, lon j'a j'aw a ne, j'a kɨ ndɨ kɨ dɔj dõ, jĩ ho ĩ ho kɨ nganjg kɨdu tu, j'a j'oi al. 9Mĩ m'un ta loa kɨdɔmt, ĩla m'tel sia m'ndaa nõit m'adi oo al a ne, a i terra koromt, na taa a i dɔmt nõit. 10Ni kɨ ngoo titbe kad un ndii al a ne, ni j'a kɨ j'aw, na kɨ tel nja joo oi.
11Bɔwd Israel eld an: Ĩla i titbe a ne, i ɗan titbe I kɔtɨn kand nyag kɨmajmaj kɨ dɔningt loj, ɔin kam sakɨgt losɨ adɨn de'n non kadkarit: ad i mbikam kɨkootmbĩ, kɨ nõkag kɨ tej kɨ myrr kɨ kum kand kag pistas kɨ amand. 12Ɔin nar kɨkõjoo dɔ jisɨt kɨketet, na i telɨn kɨ nar kɨ lan ta sakɨgt losɨ ho, maja gerɨn go al. 13Na tajigla unɨn ngonkõsɨ, na i telɨn kɨ ro det'n non gog. 14Kɨ Luwah kɨ Ngetɔgtube ɗa sesɨ, ad i ngahn maj nõ det'n non, ad Benjami kɨ Simeõ kad telɨn sesɨ. Na mĩ, m'a m'ndɨ kanj ngon tit m'ooj ngon al be.
Jojep da ron ad ngankõag gerɨna
15Kamla unɨn kadkari'n non, ɔin nar kɨkõjoo dɔ kɨketet jidt, unɨn Benjami ho, na ɓai awɨn Ejipt't, aw ngahn Jojep ɗan nõat. 16Lon Jojep oo Benjami nat sed ye, el bɨradɔkuj lon an: Ad deg'n non andɨn kam kujt, i tɔl dã mad, i ɗan nyasa, kɨta deg'n non a san nya nat sem kɨkàd kɨ ɗa ngawden ɓet. 17De'n non ɗa tit'n Jojep elɨn, aw sed kam kujt lo Jojep. 18Deg'n non ɓoolɨn kɨta kandɨn andɨn sed kam kujt lo Jojep. Elɨn na anan: I ta lo nar kɨ tel lan kam sakɨt loj ɗejt kɨdasa nõ la, ɗen ne sej nẽbe ye, kɨtakad n'lan ta dɔjt ho, ndan ne kumj ndo ho, na kad n'hɔjne ɓert, na kɨ n'taan korrog loj dɔt. 19Ndɔt'n kɨ ro bɨradɔkujt lo Jojep, elɨna ta ta kujt 20anan: Ngeej, ad kami sokɨber dɔjt ɗej kɨdasa i kɨta ndugo nyasa. 21Lon kɨ tee lot'n kɨ hɔ loɓit ye, kɨ tee ta sakɨg loj a ne, kɨ ngah nar loj'n kɨ ndugon nyasa nõ kam sakɨgt gog, na kɨ tel kɨ nar'n non jijt. 22Kɨ tel kɨ ɗe kɨ nar mad kɨɗang jijt kɨtakad kɨ ndugon nyasa. Kɨ ger de'n tel la nar loj kam sakɨgt loj al.
23Bɨradɔkuj tur an: Adɨn kamsɨ so kɨber Ot ɓoolɨn Luwah losɨ, Luwah lo bɔwsɨ la adsɨ nyamaj kam sakɨgt losɨ ye. Na m'ngaa nar losɨ'n i ndugo ne nyasa kete nõ. Kamla tee kɨ Simeõ ad'd.
24De'n non and sed kam kujt lo Jojep, ad'd man tugon ne njad, ad korrog lod nyasa ho. 25Ɗan go kadkarig lod kɨ n'ngoon ne ɗe Jojep kɨ kàd kɨ ɗa ngawdenɓet kɨta oon kad a san nya ɓe loa. 26Lon Jojep tel kɨ ɓe ye, awɨn roat kam kujt kɨ kadkari jidt, ɔsɨn dɔd ber nõat. 27Jojep ndɨjed ke ton kari kɨ lapia a? Na eld an: Bɔwsɨ to kari i? Bɨga de kan elɨn ta loa ye, ndɨ kɨ dɔn dõ ɓaitɔ ɔ? 28Turɨna anan: Ɓer loi kɨ bɔwj i kari kɨ lapia ho, ndɨ kɨ dɔn dõ ɓaitɔ. Lan dɔd ber nõat ɔsɨn ningt. 29Jojep un kumɨn kɨ dõ oon Benjami, ngon gon kɨ ngonkõn, el an: Ĩn ɗan la i ngondunt losɨ kan elmɨn ta loa yo? El tɔ an: Kɨ Luwah oo kumtondo loi, ngonɨm 30Ta õ kam Jojep, lon oo ngonkõn, ad man nõ gej kumat. Na sah lo mad kɨ'n nõt, tentenbe and kam kujɓint, na nõ tit. 31Lon tugo kumɨn oi ye, tee, na ire kamɨn ngang, el an: I ɗen kɨ nyasa. 32Ndan nyasa lo Jojep tadang, ndan lo ngankõa tadang, na Ejiptiag ĩn a san nya nat sia tɔ, lod i tadang, kɨta Ejiptiag asɨn sa nya nat kɨ Hebreg al, kɨta i nya kɨyerr ro Ejiptiagt. 33Ngankõ Jojep ndɨn ber nõat, kɨgo ɓaldt ɓai dɔ kɨ tɔgt mbã teen dɔ kɨ dut. Oon takum na, kɨɓol. 34Jojep ad unɨn nyasa kɨnõnt ad'd, na gaj lo Benjami tɔi lod nja mi. Ãin nyakãi ho, ɗan ronel nat sia.
Currently Selected:
Yaɓooda 43: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
