Yaɓooda 42
42
Ngankõ Jojep awɨn dɔning Ejipt't kɨta ndugo nyako
1Jakob oo kad nyako i Ejipt't, el nganɨn kɨdɨngã an: Kɨtɔɗi i ndɨ oon ne na be a? 2El tɔ an: Oon m'oo hoi nyako i Ejipt't. Awɨn nu I ndugon nyako kɨtɔj kɨtakad kɨ ndɨ kɨ dɔj dõ, na kad j'oi al. 3Ngankõ Jojep kɨlah awɨn kɨta ndugo nyako Ejipt't. 4Na Jakob la Benjami ngonkõ Jojep, nat kɨ ngankõag al kɨta ɓool, na ɓeta nya mad kɨmajal tee dɔat. 5Ngan Israel awɨn nat kɨ deg kɨ ngékaw ndugo nyako kɨta ɓoo õ kam dɔning Kanat.
Ngahna kɨdasa lo Jojep kɨ ngankõn
6Jojep i ngekõɓe dɔningt'n non. Ĩla i ngeɗaw nyako kɨ deg tube kɨ dɔningt'n non ye. Ngankõa ɗen, ɔsɨn dɔd ber nõat takumd kɨ ningt. 7Jojep oo ngankõng gerd, na ɗa ron tit mbah be rodt, eld ta kɨngangngang, an: I ɓain ko ɗah a? Turɨna anan: Kɨ ɓai ko dɔning Kanat kad kɨ ndugo nyasa. 8Jojep ger ngankõn, na ĩn gerɨna al. 9Kam Jojep gah dɔ niigt'n nii dɔdt, eld an: Ĩn ngéndalog. In ɗen kɨta nda m'ãi dɔning kɨ log kɨ asɨ kudt Kanag be la i ɗen ne ye. 10Elɨna anan: Ã ã ngeem, i kɨta ndugo nyasa la ɓerg loi ɗen ne ye. 11Jĩ tube jĩ ngan de kɨkɨɗa, jĩ deg kɨrog, ɓerg loi ĩn ngéndalog al. 12Na eld an: Ã ã, i kɨta nda m'ãi dɔning kɨ log kɨ asɨn kudt Kanag be la i ɗen ne ye. 13Turɨn anan: Jĩ ɓerg loi, jĩ ngankõna kɨlahgidaijoo, bɔwj i kɨɗabe, na kɨ ndɨ kam dɔning Kanat, ngondun loj i nat kɨ bɔwj ɓe nõ ɓone, na kɨkɨɗa kuujt goto. 14Jojep eld an: I tit'n m'elsɨ nõ, ĩn ngéndalog 15Oon m'a m'nasɨ titbe la kɨ m'oo ye; Rota titɨn Paraõ ndɨn kɨ dɔn dõ Rota a i teen labe al, mbã ngondun losɨ ɗe kamtã. 16I lan de mad kɨɗa kusɨt kad ɗe kɨ ngonkõsɨ, na a ĩn dangaig. Mbã kad m'oo ke tag losɨ ĩn tag kɨ rota a. Ĩla i titbe al a ne, rota titɨn Paraõ ndɨn kɨ dɔn dõ, ĩn ngéndalog ɗuba. 17Hɔ lad tube dangait ad ɗan ndɔ mɨta.
18Go ndɔt kɨkõmɨta Jojep eld an: Mĩ de kɨ ngeɓool Luwah, nyag tube'n m'ndɨjesɨ kad i ɗan ye, ĩla i telɨn rosɨ goot a ne, a i ndɨn kɨ dɔsɨ dõ. 19Ĩla ĩn de kɨrog a ne, i nyan ngonkõsɨ kɨɗa kɨ dangait, na ndegag a aw taan nyako kɨta ɓoo kɨ õ ngékɨɓe losɨ, 20na i ɗen kɨ ngondun losɨ romt. Titbe la m'a m'gerɨn kad tag losɨ'n elɨn i rota, na a oin al, Ngankõag ndigɨn ta, na ɗan titbe. 21Kamla elɨn na kudt anan: Rota takɨgang ndɨ so dɔjt kɨta nya'n kɨ ɗa kɨ ngonkõj nõ, lon ko yon ndɨjejɨn kad j'oo kumtondo lon ye, kɨ mbet kookumtondo loa. Nya 'nten la, kamkɔl ndɨ ɗen dɔjt, ɓone ho ye. 22Ruben turd an: M'elsɨ m'an: Ot ɗan majal kɨ Jojep ale? I mbetɨn koo dɔ ta lom, na tajigla mosa i kɨ ndɨje ko rojt. 23Jojep oo dɔ ta lod, na ngankõa gerɨn al, kɨta ngembelta i mbɨnadt. 24Jojep tɔ ron, na nõ, kamla tel kɨ rodt, el sed ta.
Ngankõ Jojep telɨn kɨ dɔning Kanat gog
Hɔ Simeõ kudt, na dɔa takumdt. 25Jojep ndamber kɨ utɨn nyako sakɨgt lod ad ɗoosɨ, kɨ telɨn kɨ nar lo dekɨɗen kɨ kam sakɨt loa, kɨ adɨnd nyasa kɨta ɗob. Titbe la ɗan sed. 26Ɔin nyako kɨdɔ korrogt lod, tel awɨn gog dɔningt lod. 27Lon kɨkɨɗa kudt tee ta sakɨ lon kɨ n'ad nyasa korro lon lot'n hɔn lo ɓi tit ye, oo nar lon to ta sakɨt. 28El ngankõn an: Telɨn kɨ nar lom, na oon to ta sakɨt lom Kamd gang man, telɨn kumd kɨ ro nat kɨ rondad, na elɨn na anan: Ɗi kɨbe Luwah ɗa sej a?
29Aw teen ro bɔwd Jakobt kam dɔning Kanat, elɨna nyag tube'n tee dɔdt, anan: 30De kɨ ngedɔning'n non elj ta kɨngangngang, na ooj tit ngéndalog be. 31Na j'ela j'an: Jĩ de kɨrog, jĩ ngéndalog al. 32Jĩ ngankõna kɨlah gidaijoo, bɔwj i kɨɗabe, kɨkɨɗa goto, na ngondun i nat kɨ bɔwj ɓone kam dɔning Kanat. 33Kamla de kɨ ngedɔning'n non elj an: Titbe la m'a m'gerɨn kad ĩn deg kɨrog ye; i nyan ngonkõsɨ kɨɗa romt, na ɔin nyako kɨta ɓoo kɨ õ ngékɨɓe losɨ, awɨn lo losɨ 34I ɗen kɨ ngondunt losɨ romt, kamla m'a m'gerɨn kad ĩn ngéndalog al, na ĩn de kɨrog, m'a m'tel kɨ ngonkõsɨ m'adsɨ, a i ngahn ɗob ɗa gat kam dɔningt 'nten.
35Lon mbelɨn nyako kɨ kam sakɨgt lod ye, oon nar kɨ ndom lo dekɨɗen kam sakɨt loa. Ĩn kɨ bɔwd tu oon nar lod kɨ ndom na ɓoolɨn. 36Kamla bɔwd Jakob eld an: I ɗan ad m'nal nganɨmg Jojep goto, Simeõ tel goto tɔ, na tajigla i ndigɨn kun Benjami tɔ. Nyag'n non tube son dɔmt, 37Ruben elta bɔwɨn an: Ĩla m'tel kɨ Benjami kɨ roit al a ne, i tɔl nganɨm kɨdɨngã kɨjoo. I nyàa jimt, m'a m'tel sia gog kɨroit 38Jakob el an: Ngonɨm a aw sesɨ al kɨta ngonkõa oi, na i kɨ kɨɗanbe la nãi ye. Ĩla nya kɨmajal tee dɔat dɔ ɗobt'n i ndɨ awɨnt a ne, a i adɨn bisɨdɔm kɨndà ɗisɨ kam lot kɨ koo kɨ kamkil.
Currently Selected:
Yaɓooda 42: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
