Yaɓooda 41
41
Jojep ɔrr girr nii lo Paraõ
1Lon ɓal joo asɨ oi ye, Paraõ nii, na oo an n'ɗa ta bah Nilt. 2Oo kõ mangg tanãimɨta kɨmajkoo kɨ ton mbulmbul teen ko kam bah Nilt kɨtɨga, ɗa san mũ kam mbot. 3Na oo kõ mangg tanãimɨta kɨɗang kɨmajkoo al kɨnyamg teen ko kam bah Nilt kɨtɨga godt ɗan ta baht kad kõ manggt kɨ ton mbulmbul. 4Mangg kɨmajkoo al kɨnyamg san mangg kɨmajkoo kɨ kɨ ton mbulmbul tube. Kamla Paraõ ndool. 5Tel ɓi gog, na nii kɨkõ joo, oo dɔ nyakog kɨ and bo gugug kɨ kɨmaj tanãimɨta teen ta kadnyat kɨkɨɗa. 6Goot gog dɔ nyako kɨ mbatg tanãimɨta kɨ nel kɨ ko loɓakàdt tutd teen. 7Dɔ nyakog kɨ mbatɨ kɨ nyamnjã turɨn dɔnyakog kɨ and maj bo gugug kɨtanãimɨta, na Paraõ ndool, oo a i nii.
8Loti taa ne, kam Paraõ daa ta pa; Ad kunɨn mboolig tube kɨ ngéterrg tube kɨ dɔning Ejipt't, eld nii lon, na de mad kɨ asɨ kɔrr girrd ad Paraõ goto. 9Kamla kɨbo lo ngékad nyakãi el Paraõ an: Kamm gah dɔ ɗagootal lom ad m'el ɓone. 10Ndɔ mad Paraõ ɗa wong kɨ ɓerg lon, na lam dangait kam kujt lo bɨradɔ ngéngom dɔ ngar, mĩ kɨ kɨbo lo ngélɔi bɨna, 11na kɨ nii kam ndɔt kɨkɨɗa, dekɨɗen nii lon tadang kɔrrgirra kaa i dang ho. 12Hebre mad kɨbasa, ɓer lo bɨradɔ ngéngom dɔ ngar, i nat sej nu. J'ela niig loj, na ĩ ɔrrj girrd, dekɨɗen kɨgo niit loa. 13Tit'n hã ɔrrjɨn girra, titbe la ɗan nya ye. Telɨn semkɨkam kɨlat lom gog, na kɨ mad lana kɨlakagt.
Jojep ɔrr girr nii lo ngar Paraõ
14Kamla Paraõ la ad kunɨn Jojep, ɔrrɨna kam dangait kanangbe. Ngɨsen dɔa, mbel kubg lon, na aw ro Paraõt. 15Paraõ el Jojep an: M'nii, na de mad kɨ asɨ kɔrr girra goto. Na m'oo anan: Ĩla oo dɔ nii a ne, a asɨ kɔrr girra. 16Jojep tur Paraõ an: I mĩ al, Luwah la a turta kɨmaj ad Paraõ ye.
17Kamla Paraõ el Jojep an: M'niit na m'oo m'ɗa tabah Nilt. 18Na m'oo kõ mangg tanãimɨta kɨmajkoo kɨ ton mbulmbul teen ko kam bah Nilt kɨtɨga, ɗa san mũ kam mbot. 19Na m'oo kõ mangg tanãimɨta kɨɗang kɨnyamg kɨmajkoo al ngãi teen ko kam bah Nilt kɨtɨga godt. M'oo mangg kɨ majɨn al titbe kam dɔning Ejipt't nja kɨɗa al. 20Mangg kɨmajkoo al kɨnyamg san mangg kɨtanãimɨta kɨ ton mbulmbul ka nõ tube. 21Lon sand tube ye, oo tit sand al be, ĩn kɨ nyamd tit kɨkete nõbe. Kamla m'ndool. 22Na m'nii tɔ a ne, m'oo kam niit lom, dɔnyakog kɨ and maj bogugug tanãimɨta teen ta kadnyat kɨkɨɗa. 23Na dɔnyakog kɨmbat tanãimɨta'n nel kɨ ko loɓakàdt tutd, teen godt. 24Dɔnyakog kɨmbat turɨn dɔnyakog kɨmaj kɨtanãimɨta. M'el mboolig, na de mad kɨ kasɨ kɔrrɨm girra goto.
25Jojep el Paraõ an: Nii lo Paraõ i kɨɗabe. Luwah ɔj Paraõ nya'n ɓet n'a n'ɗa. 26Kõ mangg kɨmaj kɨtanãimɨta ĩn ɓal tanãimɨta. Dɔnyakog kɨmaj kɨtanãimɨta ĩn ɓal tanãimɨta tɔ. I nii kɨ kɨɗabe. 27Na kõ mangg kɨnyam kɨmajkoo al ĩgɨn ten godt, ĩn ɓal tanãimɨta. Dɔnyakog kɨmbat'n nel kɨ ko loɓakàdt tutd, ĩn ɓalɓoo tanãimɨta. 28'Nten la i ta'n m'awɨn kɨ m'el Paraõ ye: Luwah ɔj Paraõ ad ger nya'n ɓet n'a n'ɗa. 29Oo ɓal tanãimɨta ndɨ ɗen nõ, na nyag kɨ kamt a ton mbujmbuj ngãi kam dɔning Ejipt't kɨtaagbe. 30Goot gog ɓalɓoo tanãimɨta a ɗen, na kam deg a oi dɔ nyag kɨ ton mbuj tube kam dɔning Ejipt't, ɓoo a õ, a nuj dɔning 'nten. 31Na de a ger nyag kɨ ton mbuj kam dɔningt 'nten al bɨrɨng, kɨta ɓoon a õ a i kɨbo tɔi. 32Kɨtɔ nii'n Paraõ nii na tel nii kɨkõjoo nõ, nya'n non i kɨ nda oi ko ro Luwaht, na Luwah, a ɗa kanangbe kad n'tɔl taa. 33Kɨtɔ 'nten tajigla kɨ Paraõ kɔt de mad kɨ ngekumtɔg kɨ ngeterr, ndaa dɔ dɔning Ejipt't. 34Kɨ Paraõ ɗa titbe: Kɨ nda ngékoogo nyag dɔ dɔningt 'nten kad tirrɨn gaj kɨɗa ku kɨmit kam nyandɔɔgt kɨ dɔning Ejipt't, kam ɓalt kɨtanãimɨta'n nyag a tont mbuj nõ. 35Kɨ ad'd ɔin nyasa tube kam ɓalgt kɨmaj'n ndɨ ɗen. Kɨ mbõn nyako kɨnat girr tɔg Paraõt kam ɓebogt, na kɨ ngomɨn. 36Kɨ ngomɨn nyasa'n non kɨta dɔning 'nten kam ɓalt kɨtanãimɨta'n ɓoo a õn kam dɔning Ejipt't, kɨtakad ɓoo nuj deg kɨ dɔningt al.
Jojep tel ngekoogo nya lo ngar kɨ dɔning Ejipt't
37Tag'n non nelɨn Paraõ kɨ ɓerg loa tube. 38Paraõ el ɓerg lon an: J'asɨ ngah de mad kɨtit ĩn ɗan kɨ Ndil Luwah i kamat e? 39Kamla Paraõ el Jojep an: Tit'n Luwah ad i gerɨn nyag'n non tube, de mad kɨ asɨ kĩ ngekumtɔg ke ngeterr titi be goto. 40I ĩ la m'a m'ndai dɔ ɓet lom, na deg lom tube a telɨn rod go tat loi, kɨ pong kõɓe koon la m'tɔin ye. 41Paraõ el Jojep an: Oo m'ndai dɔ dɔning Ejipt't kɨtaagbe. 42Paraõ ɔrr ninga kase kɔsɨdɔnya jint, la ji Jojept, la kub lẽ kɨmaj roat kɨ kɨla lɔr kɔat. 43Na ada ndɨ kam pusɨ kõɓet lon kɨkõjoo. Deg kon nõat anan: Ɔsɨn gojsɨ ber titbe ndaan dɔ dɔning Ejipt kɨtaagbe ye. 44Paraõ el Jojep an: Mĩ Paraõ, na kɨkanji, de mad a un jin ke njan kɨ dõ al kam dɔning Ejipt't kɨtaagbe. 45Paraõ ndah tɔ Jojep Sapnat-Paneak, na ada taa Asnat ngon Potipera kɨdẽ, ngejanyamosɨkadkari kɨ ɓebot kɨ On, nẽnt. Jojep tee kɨ n'la go dɔning Ejipt. 46Ɓal Jojep i dɔmɨta lon ɗà nõ Paraõt, ngar kɨ Ejipt. Jojep ɓai ro Paraõt, aw lago dɔning Ejipt kɨtaagbe.
47Kam ɓalndent kɨtanãimɨta dɔning tee kɨ nyag kɨ ton mbuj. 48Jojep mbõ nyasa tube kɨ kam ɓalgt kɨtanãimɨta'n non kam dɔning Ejipt't, ngom nyasa'n non kam ɓebogt. Nyasa kɨ tee ko kam ndɔɔgt kɨ gugɨn dɔ ɓebog. Jojep mbõ nda kam ɓebo kɨɗen. 49Jojep ngom nyako tit nang kɨ bahbot be, i ngãi kɨ tɔi, ad nya ta da kɔra kɨta i kɨ dum mbɔj.
50Kete nõ ɓalɓoot Asnat ngon Potipera kɨdẽ, ngejanyamosɨkadkari kɨ ɓebo Ont, ooj ngang joo ad Jojep. 51Jojep ndah tɔ ngonderɨn Manase, kɨta el an: Luwah ad kam oi dɔ nyagt kɨ to kɨ ɗam tube, kɨ kɨ ɓe lo bɔw tube. 52Nda tɔ kɨkõjoo an i: Epraim kɨta el an: Luwah adɨm m'tee kɨ kand kam dɔning kamkɔlt lom.
53Lon ɓalnden kɨtanãimɨta kɨ kam dɔning Ejipt't tɨgan oi ye. 54Ɓalɓoog kɨtanãimɨta mban girr ɗe tit'n hã Jojep elɨn. Ɓoo õ kam dɔninggt tube, na kam dɔning Ejipt't kɨtaagbe la nyasa i tit ye. 55Lon ɓoo õ kam dɔning Ejipt't kɨtaagbe ye, deg kon kɨdɔ Paraõt kɨta nyasa, na Paraõ el Ejiptiag tube an: Awɨn ro Jojept Nya'n a elsɨ a ne, i ɗan 56Ɓoo õ dɔningt'n non kɨtaagbe, na Jojep ɔsɨ ta damg, ɗaw nyako kɨ Ejiptiag kɨta ɓoo õ kɨ tɔi kam dɔning Ejipt't. 57Ngéndɨ dɔningt kɨtaagbe awɨn Ejipt ro Jojept kad ndugon nyako kɨta ɓoo õ kɨ tɔi kam dɔningt kɨtaagbe.
Currently Selected:
Yaɓooda 41: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
