Yaɓooda 40
40
Jojep ɔrr girr niig lo de dangaig
1Go nyagt 'nten, ngekad nyakãi lo ngar kɨ Ejipt kɨ ngelɔi bɨna loa ɗan majal ndoorɨn ne nged ngar kɨ Ejipt. 2Paraõ ɗa wong kɨ ngékɨlag kɨbo lon kɨjoo'n non ad i, kɨbo lo ngékad nyakãi kɨ kɨbo lo ngélɔi bɨna. 3Ad land kam kujt lo bɨradɔ ngengom dɔ ngar, kam dangait, lot'n lan Jojep tit. 4Bɨradɔ ngéngom dɔ ngar nda Jojep dɔdt kad oo god. Ɗan dangait ndɔ asɨ tat.
Jojep ɔrr girr nii kam dangai
5Ngekad nyakãi kɨ ngelɔi bɨna lo ngar kɨ Ejipt'tn land kam dangait, ĩn tujoo nii'n kam ndɔt kɨkɨɗa, dekɨɗen nii loa dang, kɔrrgirra i dang tɔ. 6Jojep and godt kɨsĩ, ood ndɨn kɨ ronel al. 7Ndɨje ngékɨlag kɨbo lo Paraõ ĩgɨn ĩn nat sia kam dangait kam kujt lo ngeen an: Kɨtɔɗi takumsɨ hɔ ndo ɓone a? 8Turɨna anan: Kɨ nii, na ngekɔrrgirra goto. Jojep eld an: Kɔrr girr nyag i ko ro Luwaht ale? Elmɨn niig losɨ ad m'oo.
9Kɨbo lo ngékad nyakãi el Jojep nii lon, an: Kam niit lom m'oo nduu mad i nomt, 10Nduun non dɔjiag ĩn mɨta. M'oo ɓa hut, hutag teen, na andɨn, kandag mbujɨn. 11Kop lo Paraõ i jimt. M'un kand nduun non m'mburo kɨ kam kopt lo Paraõ, na mad kop'n non ji Paraõt. 12Jojep ela an: Girra laten: Dɔjig kɨmita ĩn ndɔg kɨmita. 13Nãi ndɔ mɨta Paraõ a un dɔi kɨ dõ, a tel sei kɨ kam kɨlat loi gog. A ad kop lo Paraõ jiat tit'n i ɗan kete lon i ngekad nyakãi loa nõ. 14Jojep ela an: Ka i ga kami dɔmt lon maj a urri. M'kɔi kɨ ɔjɨm kamkẽ, na el Paraõ ta lom kad ɔrrɨm kam kujt'n ɗan, 15kɨta rota unmɨn dɔningt lo Hebreg kɨgo lo ɓoogt, na nẽbe m'ɗa nya mad kɨkad lamɨn ne kam dangait al ho.
16Lon kɨbo lo ngélɔi bɨna oo kɔrrgirra i kɨmaj ye, el Jojep an: Mĩ kaa, kam niit lom, m'oo keh mɨta ĩn dɔmt kɨ kuɓɨr bɨna kamdt. 17Kam keht kɨdɔt dõ girr nyasag kɨ dang dang kɨ ɗan kam purrt kɨta Paraõ ĩn tit na yelg ɗa san nyag'n non kam keht kɨdɔmt dõ. 18Jojep tur an: Kɔrrgirra laten: Keh kɨmita ĩn ndɔ mɨta. 19Nãi ndɔ mɨta Paraõ a gang dɔi kɔ, a ɓa rumi kagt, ad yelg san dai.
20Ndɔ kɨkõmɨta i ndɔ kooj Paraõ, ad ɗa mburr nam kɨta ɓerg lon tube. Un dɔ kɨbo lo ngékad nyakãi kɨ kɨbo lo ngélɔi bɨna kɨ dõ ku ɓergt lon. 21Tel kɨ kɨbo lo ngékad nyakãi kɨ kam kɨla kad nyakãit loa gog. Kad ad kop ji Paraõt. 22Na ɓa kɨbo lo ngélɔi bɨna kagt tit'n hã Jojep ɔrrdɨn girra. 23Na kɨbo lo ngékad nyakãi ga kamɨn dɔ Jojept al, kama oi dɔa.
Currently Selected:
Yaɓooda 40: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
