Yaɓooda 39
39
Jojep kam ɓet kɨ Ejipt't
1Awɨn kɨ Jojep dɔning Ejipt, na Potipar kɨ Ejiptia, ngeɗakɨla lo Paraõ, bɨradɔ ngéngom dɔ ngar, ndugoa ji Ismaelagt in awɨn sia nu. 2Bɨraɓe i nat kɨ Jojep ad maj urra, ndɨ kam kujt lo ngeen kɨ Ejiptia. 3Ngea oo kad Bɨraɓe i nat sia, na Bɨraɓe ad maj urra dɔ nyagt tube kɨ jiat'n ɗan kɨla. 4Jojep ngah maj takum ngeent, ɗa kɨlaɓer ada, na Potipar ndaa dɔ kujt lon, ad nya nyag lon tube jiat. 5Kaglot'n Potipar ndaa dɔ kujt lon kɨ dɔ nyagt lon tube ye, Bɨraɓe ad maj urr kuj lo Ejiptia'n non kɨtakul Jojep. Majkurr lo Bɨraɓe i dɔ nyagt loa tube, ke kɨ kam kujt loa, ke kɨ kam ndɔɔt loa. 6Nya nyag lon tube ji Jojept, oo go nya mad al, na nyasa kɨ la tant koon Jojep maj ront kɨ takumɨnt tu.
Jojep mbet to kɨ nẽ Potipar
7Go nyagt 'nten, nẽ ngea urr kumɨn dɔ Jojept, ela an: I to sem. 8Jojep mbet, na el nẽ ngeen an: Oo ngeem tur go nya mad kɨɗa kɨ kam kujt al, na la nyag lon tube jimt. 9Kɨbo tɔim kam kujt'n ɗan goto. Ngeem ɔgɨm dɔ nya mad al, na ĩ koon kɨta ĩ nẽa. Titbãi kɨ m'ɗa majal kɨbo 'nten, na kɨ m'ɗa majal m'ndoorɨn Luwah a? 10Ke neni dekɨdẽ'n non ɗa takelta Jojept kɨndɔgndɔg kaa ne, i kam Jojep kad to sia al ho ke ndɨ kadat al ho. 11Ndɔ mad Jojep and kam kujt kɨ n'ɗa kɨla lon, na ku ngéɗakɨlagt kɨ kam kujt nõ de kɨɗa kaa goto. 12Kamla dekɨdẽ'n non hɔ kub loa, ela an: I to sem Na Jojep nya kub lon kɨ jiat, na tee ãi, 13Lon dekɨdẽ oo kad kub lo Jojep nãi kɨ jint, na Jojep tee kam kujt ãi ye, 14kun deg kɨ kuju lon, eld an: Oon Ngeem ɗe kɨ Hebre mad rojt kad ɓood sej. Ɗe romt kɨ n'to sem, na m'ko kɨ ndim kɨbo. 15Lon m'un ndim kɨ dõ m'kon ye, oo na nya kub lon kadɨmt, na tee ãi kɨtɨga. 16Ngom kub lo Jojep kadɨnt, mbã ngea tel kɨ be. 17Kamla ela ta kɨ kɨɗa'n non an: Hebre kɨ ɓer'n i ɗe sia rojt ye, and gomt kɨ n'ɓood sem. 18Lon m'un ndim kɨ dõ m'kon ye, tĩ nya kub lon kɨ kadɨmt, na tee kam kujt ãi. 19Lon ngea oo dɔ ta lo nẽn'n ela an: Titbe la ɓer loi ɗan sem ye, ɓawong. 20Kamla nge Jojep hɔa, laa dangait, lot'n utɨn de dangaig lo ngar tit. Na Jojep ɗa kam dangait nu.
Jojep to kam dangai
21Bɨraɓe i nat kɨ Jojep, ɔja kamkẽ, na ada ngah maj takum ngengom kuj dangait. 22Ngengom kuj dangai la de dangaig tube kɨ kam dangait ji Jojept, ke nya kɨɗen'n a ɗan nu, ĩ la i ngekoogoa ye, 23Ngengom kuj dangai nda kumɨn dɔ nyat mad kɨ ji Jojept al kɨta Bɨraɓe i nat sia, na nya kɨɗen'n ɗa, Bɨraɓe ad maj urra kamt.
Currently Selected:
Yaɓooda 39: MlL
Highlight
Share
Compare
Copy
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
