Ejekel 8
8
Ejekel oo nyag kɨyerr kam Jerusalemt
1Bal kɨbojidet kɨ nah kɨ kɨbojidet kɨ ndo kɨkõmi lo nah'n non. Lon m'ndɨ kam kujt lom na kɨbog kɨ Juda ndin nomt, na ji Bɨraɓe i dɔmt.
2M'nɔl lo na oo, ɓakumtanya kɨtit de be. Ko girat mbã kɨber koa i tit horr be na ko girat mbã kɨ dõ koa ndulo ngãingãi tit ningakasɨ kɨkusɨ be. 3La ɓakumta ji de hɔɔn bisɨdɔm, na Ndil unɨm dõ mbɨna dɔningt kɨ dɔrã a sem kɨgo nyakookamndilt lo Luwah. Jerusalem. Tee sem tabit kandt kokama kɔtko gel, lot'n yojang ɗat, ad sɔkɨ jàng lo Bɨraɓe. 4Na oo kunj Luwah lo Israel kɨɗangeɗeng i nõ tit'n m'oon kete kam ndilt kam dɨlambot.
5Kamla elɨm an: Ngon de, un kumi kɔtkojigel. Titbe m'un kumm kojigel na m'oo yojang ta natlo dɨngɨr kadkari kɨ kojigel. 6Elɨm an: Ngon de, i oo nya'n ndɨ ɗan nya kɨyerr kɨbobe'n Israelag ndɨ ɗan nẽbe kɨtakad m'nya lo lom kɨjaɓat kɨ m'aw sãi a? Na a i oo nya kɨyerr madg kɨbobo ɓaitɔ.
7Kamla aw sem tabit kand natlot. M'nɔl lo na m'oo burrolo i kam ndogbɔrrt. 8Elɨm an: Ngon de i mbut ndogbɔrr. Lon m'mbut bɔrr ye oo, tabit mad i nõ. 9Elɨm an: And na oo nyag kɨyerr kɨ majal ĩgɨn ndɨ ɗan nõ. 10Titbe m'and, m'oo na oo ɓakumta nyag kɨkorkodber kɨ dang dang kɨ dãg kɨ yerr kɨ yog tube lo Israelag ĩn ɗand kad bɔrrt gugɨn dɔ. 11Deg dɔtanãimɨta ku kɨbogt lo Israel ɗan nõdt na kudt nõ Jaajania ngon Sapan. Kɨɗen kudt ho bai mbikam jint, na sahorr mbikam kɨkootmbĩ su luilui.
12Kamla elɨm an: Ngon de, i oo nya'n kɨbog lo Israel ndɨ ɗan gid tilt dekɨɗen ndɨ ɗa kam kujt lon kɨ ɗoosɨ kɨ ɓakumta nyag a? Kɨtɔ elɨn anan: Bɨraɓe oo ji al. Bɨraɓe nya dɔning kɔ. 13Elɨm tɔ an: A i oo nyag kɨyerr kɨbo tɔi ɓaitɔ ingɨn ndɨ ɗan. 14Kamla aw sem tabit kuj lo Bɨraɓe kɨ kojigel, na oo dekɨdẽg ndɨnt nõbe, ndɨ nõn Tamuj. 15Elɨm an: Ngon de i oo nya 'nten a? A i oo nyag kɨyerr kɨbo tɔi ĩgɨn ɗàn ɓaitɔ.
16Aw sem natlot kɨkeme kuju lo Bɨraɓe. Oo tabit kuj lo Bɨraɓe kɨjaɓat mbɨna tabit kɨ dɨngɨr, deg'n tit asɨn dɔjoo gidaimi. Turɨn gid'd adɨn kuj lo Bɨraɓe na takumd sumba loɓakàd, ɔsɨn dɔd ber ningt nõ kàdt ko loɓakàd. 17Kamla elɨm an: Ngon de, i oo nya 'nten a? I nya kɨ tẽbe kɨro ngekɨɓet lo Juda kad ɗan nyag kɨyerr ĩgɨn ndɨ ɗan nẽbe a? Kad ɗoosɨn dɔning kɨ nyaɗa kɨlo ngetɔgt na sokɨn wong lom ɓaitɔ. Oo. Lan do ji kag kõdt. 18Kɨtɔ 'nten m'a m'ɗa kɨ wong kɨtɔlsɔkɨr, kumm a oo kumtondo al, m'a m'ɔj kamkẽ al. Ke a koon kɨ ndid kɨbo kɨ mbimt kaa. M'a m'oo dɔ ta lod al.
Currently Selected:
Ejekel 8: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
