Ejekel 7
7
Tuj a ɗe dɔ dɔning Israelt
1Ta lo Bɨraɓe'n elɨm an: 2Ĩ ngon de, titbe kel Bɨraɓe Luwah kɨdɔ dɔning Israelt; tɨga dɔboi dɔning ɗe woi kɨ dɔ kumlogt kɨsɔɔ. 3Tajigla dɔboi tee dɔit, m'a m'la wong lom kɨdɔit, m'a m'gangta dɔit kɨgo kɨlaɗait na m'a m'bai kɨta nyag kɨyerr loi tube. 4Kumm a oo kumtondo loi al, m'a m'ɔji kamkẽ al na m'a m'bai asɨ ta kɨlaɗai lon nyag kɨyerr loi ĩn kamit. Kamla a i gerɨn mĩ la mĩ Bɨraɓe ye.
5Titbe kel Bɨraɓe Luwah: Oo, majal ndɨ ɗe kɨdɔ majalt. 6Dɔboi ndɨ ɗe, dɔboi ndɨ ɗe, tɔsɨ ndool dɔit. Oo, ndɨ ɗe. 7Kaglo loi ndɨ ɗe dɔit, in ngendɨ dɔningt. Kaglo ndɨ ɗe, ndɔ i nderbe i ndɔ kamkɔl na ronel goto dɔ mbalbogt. 8Tajigla m'ɗe nderbe kad m'ũ wong lom kɨtɔlsɔkɨr dɔit, m'tɔlkon wong lom dɔit. M'a m'gangta dɔit kɨgo kɨlaɗait na m'a m'bai kɨta nyag kɨyerr loi tube. 9Kumm a oo kumtondo loi al, m'a m'ɔji kamkẽ al, na m'a m'baa asɨ ta kɨlaɗai lon nyag kɨyerr loi i kamit. Kamla a i gerɨn mĩ Bɨraɓe la m'ndasɨ ye.
10Oo ndɔ'n non ndɨ ɗe. Kaglo loi ɗe. Kagtɔsɨ tee hut, dɔngang ɓa hut. 11Nyaɗa kɨlo ngetɔgt tel kagtɔsɨ kad ɗan ne majal. De kɨɗa kudt kɨ nãi goto, ke ku koosɨgt lod, ke ku nyamajgt lod. A hɔn ndo kɨtatɔd al. 12Kaglo ndɨ ɗe, ndɔ i nderbe. Ot kad ngendugo nya ɗa ronel ke nge ndugo kɔ ɗa kamkil kɨta wong i dɔ koosɨgt lod tube. 13Ngeɗaw nya a tel ta nya'n ɗaw kɔ nõ al, ke neni ndɨn kɨ dɔd dõ ɓaitɔ, kɨta ta nyakookamndilt kɨdɔ koosɨgt a mbel al. Kɨtɔ ɗagootal lod kɨkɨɗa kudt kɨ a ɗa tɔg kaj ron goto. 14Kunɨn tow, ɗan rod woi na de kɨ kaw ro goto kɨta wong lom kɨtal sɔkɨr ndu do koosɨgt lod.
De kɨ a tee ta takɨgang lo Luwah goto
15Kiyaɗɔɔ i ko tɨga na yokoosɨ kɨ ɓo in kokama. De'n i kam ndɔɔt a ne, a oi ta kiyaɗɔɔt na de'n ndɨ kam ɓet a ne a oi koi ɓo kɨ yokoosɨg. 16Ingɨn teen ta koit a ndin dɔ mbalbogt tit derrg kam hollogt. In tube a hɔn ndo kɨta majalkɨɗa lod.
17Jid tube a oin yelel,
goj tube a ndan na.
18A dɔɔn ɓood kɨ kub hɔndo,
ɓool a tɔld sɔkɨr, takumd tube a ĩn kɨ rosɔl,
dɔd tube a ngɔ.
19A ũn nar arjã lod kɨdɔ ɗobg
na nar ɔr lod a i nya kɨyerr rodt,
nar arjã lod kɨ nar ɔr lod
a asɨn kajd al
ndɔwongt lo Bɨraɓe.
A asɨn mbool dã
ke ɗoosɨ kamd al
kɨta ingɨn non la gad gigt
ad ɗan majal ye.
20Gan buro kɨ ta nyaparero lod
na ɗan ɓakumta nyag kɨyerr lod.
Kɨtɔ 'nten la mad nya'n non
telɨn kɨyerr rodt.
21M'a mad nyamajg 'nten
ji mbahgt tit nya tetɗɔɔ
kad deg kɨmajal
kɨ dɔningt yerrɨn ne.
22M'a m'tur takumi rodt kɔ
kad yerrɨn ne kɨ lo lom kɨjaɓat,
ngeɗa nya kɨlo ngetɔgt
a andɨn kad berɨn ne.
23I ɗago jinjir
kɨta dɔning ɓakot kɨ mosɨ,
ɓebo ɗoosɨ kɨ nyaɗa
kɨlo nge tɔgt.
24M'a mad girrdeg
kɨ ngeɗamaj al kɨtɔi ɗen
kad tan kujg lod,
m'a mad dɔngang
lo ngetɔg tɨga
na log lod kɨjaɓat
a ĩn kɨyerr.
25Kam kɨ tuj ndɨ ɗe,
a sahn kam kɨsokɨber, na a ngahn al.
26Kamkɔl ndɨ ɗe kɨdɔ kamkɔlt,
hoita kɨmajal ndɨ ɗe
kɨdɔ hoitat kɨmajal.
A ndɨjen nyakookamndilt
kɨro ngekelta kɨta Luwaht,
mberkɨnda a goto
ro ngejanyamosɨt,
kɔjta a goto ro kɨbogt.
27Ngar a hɔ ndo,
ro mbaiɓe a ndad.
Ji deg kɨdɔningt a ndad
kɨta ɓool kɨ bobe.
M'a m'ɗa sed kɨgo kɨlaɗadt,
m'a m'gangta dɔdt
kɨgo takɨgangt lod
na a gerɨn mĩ la mĩ Bɨraɓe ye.
Currently Selected:
Ejekel 7: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
