Ejekel 5
5
Tuj a so dɔ Jerusalemt
1Ĩn, ngon de, un kiyaɗɔɔ kɨkat pepep tit nyinga ngɨse dɔ, un, i ngɨsen dɔi kɨ mbaitai. Kamla un nya mbɔj nya, i keg gaj mɨta. 2Lon a taan ɓebo kɨ Jerusalem, a i la horr gaj kɨdasa dan ɓebot. A i un gaj kɨkõjoo a i tɔld kɨ kiyaɗɔɔ i gugɨn dɔ ɓebo, kamla a i un gaja kɨkõmɨta kad i tɨnda tĩn kam nélt. Mĩ tɔ m'a tuɓa god kɨ kiyaɗɔɔ. 3I ɔi bĩ nõ sĩ, i dɔ ta kubt loi. 4Kam bĩt nõ a i tel ɔi kamt ɓaitɔ kad ũ kam horrt ad oon. Ko kamt nõ horr a tee aw kam ngékɨɓet lo Israel tube.
5Titbe kel Bɨraɓe Luwah 'nten la i Jerusalem in hã m'ndaa ngawdan girrdegt kɨ dɔningg kɨ gugɨn dɔ. 6Taaɗɔ mberkɨndag lom kɨ ɗa majal tɔi ndeg girrdeg tube na ndoor tag lom tɔi dɔningg kɨ gugɨn dɔa lon mbet mberkɨndag lom na tel ron go tagt lom al. 7Kɨtɔ 'nten, titbe kel Bɨraɓe Luwah: I taaɗɔ tɔi girrdeg kɨ gugɨn dɔi kɨta i tel roi go tagt lom al, i tur go mberkɨndag lom al na i ɗa kɨgo nyabelɓegt lo girrdeg kɨ gugɨn dɔi. 8Kɨtɔ 'nten, titbe kel Bɨraɓe Luwah: Oo, mĩ kɨdɔm, m'ndoori na m'a m'gangta dɔit takum girrdegt. 9Kɨtɔ nyaɗa kɨyerr loi tube ye m'a m'ɗa sei nya'n hã m'ɗa nja kɨɗa al ɓaitɔ, kekɨtit sia m'a m'ɗa gog al ta. 10Kɨtɔ 'nten bɔwg a san ne ngand kɨdɨngã kusɨt na ngang kɨdɨngã a san ne bɔw dig. M'a m'gangta dɔsɨt na ndegsɨ kɨnãi, m'a m'tɨnda m'tĩd kam nélt kɨɗen.
11Tit'n mĩ'n kɨ dɔm dõ, kel Bɨraɓe Luwah, rota i yerr kɨ lo lom kɨjaɓat kɨ yog loi tube kɨ nyag kɨyerr loi tube. Mĩ tɔ, m'a m'ɔsɨ m'lai ningt, m'a m'un kumm riw na kumm a oo kumtondo loi al. 12Gaj kɨɗa kusɨt a oin yokoosɨ na ɓo a tɔld dãsɨt. Gaj kɨɗa a so ta kiyaɗɔɔt gug dɔi na m'a m'tɨnda gaj kɨɗa tĩ kam nélt kɨɗen, m'a m'ɔrr kiyaɗɔɔ godt.
13Kɨtɔ 'nten la wong lom a goto'n na kamm a so kɨber dɔ wongt lom kɨtɨngabil kɨdɔdt kad kamm sɔl kad gerɨn mĩ Bɨraɓe, m'elta kɨ jang kɨ kammt lon m'tɔl kon wong lom kɨtɨngabil dɔdt. 14M'a m'teli gootɓet kɨ nyakid kɨro girrdegt kɨ gugɨn dɔi kɨ takum degt tube kɨ ngetoi. 15A i nya kid kɨ rosɔl kɨ nyakɔj kɨ nyakɨya kɨro girrdegt kɨ gugɨn dɔi lon m'tɔl kon tagkɨgang lom dɔit kɨ wong kɨ tɨngabil kɨ ndakɔjg kɨngang. Mĩ Bɨraɓe la m'elta ye.
16Lon m'la kɨ ɗan ɓog lom kɨ tee koi, ngénuj nya ĩgɨn m'a m'lad kad nujsɨn kɨta m'a m'la kɨ ɓoo dɔsɨt kɨdɔtdɔt na m'a m'tuj nyasa losɨ kɔ. 17M'a m'la kɨ bɔg kɨ dang kɨmajal dɔit kad kɨmadg goton kusɨt kɨ yokoosɨ kɨ mosɨ kad tɔin kamit. M'a mad kiyaɗɔɔ so dɔit, mĩ Bɨraɓe la m'elta ye.
Currently Selected:
Ejekel 5: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
