Ejekel 4
4
Ɗɔɔ a gug dɔ Jerusalem
1Ĩn ngon de, un brik kɨɗa i nda nõit, i ja ndija dɔt ɔjɨn dɔ ɓebo, ad i Jerusalem. 2I lan na gugɨn dɔa, i la ndogbɔrr gugɨn dɔa, i ũ ning dɔnat gugɨn dɔa, ad koosɨg hɔn londɨ gugɨn dɔa na i nda gindkag to tabit gugɨn dɔa tɔ. 3Un gaj hand kɨla petil, i ndaa tit bom hand be mbɨnait kɨ ɓebo na i ur kumi kɨdɔt ad lan na gugɨn dɔa na i nda gong gugɨndɔa. Nya 'nten i nyakɔj kɨta Israelag.
4Goot gog i to ber do jigelit na m'a m'nda majal lo ngekɨɓe lo Israel dɔit. Ndɔg in a i ton ber nõ la a i ndog kɨ a i ton majal lod ye, 5kɨta m'gang kor ndog dɔit asɨna kɨ ɓal ɗa majal lod, ad i ndɔ bu mɨta kɨ dɔjikɨɗa. Titbe la a i ton majalg lo ngékɨɓe lo Israel ye. 6Lon i tɨga ndog 'nten woi a ne, i to ber kɨɗang gog do, jikõit, i to majal lo ngékɨɓe lo Juda. M'gang ndo dɔsɔɔ dɔit, ndɔ kɨɗa kɨta ɓal kɨɗen. 7A i ur kumi kɨ jii kari kɨkanj nya kutdɔ kɨdɔ Jerusalemt in deg lan na gugɨn dɔa na a i elta kɨta Luwaht. 8Oo, m'a m'doi kɨ kɨla kɨtɔkad i asɨ tel roi kokõ ke gel al mbã ndɔ lana gug dɔ loi tɨga.
Nyasa a goto Jerusalem
9Ɔi nyako gem kɨ ɔrj kɨ munjo kɨ tein kɨ butɨl, i ũd kam jot kɨɗabe, i ɗan nyasai kɨ asɨ go ndɔgt'n a i ton ber, a i sa kam ndɔgt kɨ ɓu mɨta kɨ dɔjikɨɗa nõ. 10Nyasa kɨ a i sa, kɔia asɨ nar dɔjoo ndɔ kɨɗen, nja kɨɗabe kɨta ndɔ kɨɗen. 11A i ãi man kɨlo mbɔjt, ad i gaj hin kɨɗa ku kɨ kɨbojidet't nja kɨɗabe kɨta ndɔ kɨɗen. 12A i sanya 'nten tit ɔina ɔrj be a i ɗa nõdt do horrt kɨ ɗan kɨ kĩ de. 13Na Bɨraɓe el an: Titbe la deg kɨ Israel a san ne nyasa lod kɨyerr ku girrdegt'n m'a m'tɨnda m'tĩd.
14M'el m'an: Ah Bɨraɓe Luwah, oo m'yerr kɨ rom nja kɨɗa al bat kɨ ngonɨm nu mbã tajigla, m'sa dã kɨkoi nja kɨɗa al bat ke kɨ nya hɔa, dã mad kɨ yerr and kam tamt nja kɨɗa al bat. 15Turɨm an: Oo, m'a mad kĩ mang ga goot kĩ de, na i ɗa nyasai dɔt. 16Elɨm tɔ an: Ngon de, m'a m'gang nyasa ko kam Jerusalemt. A san nya kɨlo mbɔjt kɨ ɓool, a ãin man kɨlo mbɔjt kɨ rondad. 17A nalɨn nyasa kɨ man kãin, a oon takum na kɨ kam kɨ da tapa na rod a nyem kɨtɔ majal lod.
Currently Selected:
Ejekel 4: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
