Ejekel 45
45
Gaj dɔning kɨta Bɨraɓe kɨ ngejanyamosɨ
1Lon a i kegɨn na dɔning'n non kɨgo yukt kɨya kad tel nyanduba a ne, a i gangɨn gaj dɔning adɨn Bɨraɓe kadkari kɨjaɓat. Ngala a metɨr dub dɔjoo gidaimi, tata a i metɨr dub dɔjoo. A i kɨjaɓat go ɗob ninat gug dɔ gej. 2A gangɨn lo kam lot'n ɗan kad i lo kɨjaɓat, ngala a metɨr ɓumi, tata i metɨr ɓumi asɨna derɨr na lo kɨ to kari kɨ tata asɨ metɨr dɔmi a to gug dɔ gej. 3Kam dɔningt kɨjaɓat'n non a i gangɨn lo kɨ ngala asɨ metɨr dub dɔjoo gidaimi, tata asɨ metɨr dub kɨlah na lo kɨjaɓat a i kamt, ad i lo kɨjaɓat kɨ tɔitɔi. 4In ɗan a i gaj dɔning kɨjaɓat. A i kɨta ngéjanyamosɨ, ĩgɨn ɗan kɨlaɓer kam lot kɨjaɓat na ndɔt'n kɨ ro Bɨraɓet kɨta ɗa kɨlaɓer adɨna. A lo ɗa kujg lod kɨ lo kɨgangtadang kɨta lo kɨjaɓat.
5Gaj dɔning mad kɨ ngala asɨ metɨr dub dɔjoo gidaimi, tata asɨ metɨr dub kɨlah a i nyakagɓe lo Lebiag ngeɗakɨlaɓer kam kujt kɨjaɓat kad ɗan kujg lod tit.
6Kad gaj dɔningt kɨjaɓat a gangɨn gaj dɔning kɨta ɓebo, tata a asɨ metɨr dub mi, ngala asɨ metɨr dub dɔjoo gidaimi, a i nyakagɓe kɨta ngékɨɓe lo Israel tube.
7A i gangɨn gaj dɔning kɔtko joo kɨta mbaiɓe kad gaj dɔningt kɨjaɓat kɨ kad gaj dɔningt lo ɓebo ko lokudkàdt kɨ ko loɓakàdt. Ngala asɨna kɨ dɔning lo girr Israel kɨɗa, a mbagɨra ɗob nin ko lokudkàdt mbã ɗob nin ko loɓakàdt. 8A i dɔning loa, nyakagɓe loa kam Israelt. Mbaiɓeg lom a dan kum deg lom ndo gog al, na a adɨn dɔning ngekɨɓe lo Israel kɨ go girrkoojt lod.
9Titbe kel Bɨraɓe Luwah: Asɨ ta, in mbaiɓeg lo Israel. I nyan ta ta nya kɨlo ngetɔgt, kɨ ɗa nya kɨlo ɓoogt, i hɔ ɗan nya kɨgoɗobat kɨ kɨdenesew, i nyan ta tuɓa deg lom kam dɔningt lod, kel Bɨraɓe Luwah.
10Maj kad i ndɨn kɨ nya mbɔjnya kɨdene kɨ kɨlo tɔrr nya kɨdene kɨ ngo kɔjnya kɨdene. 11Nya mbɔjnya kɨtɔ kumnya kɨ asɨna kɨɗabe, nya mbɔjnya kɨ man ad i litɨr. 12Nar kɨɗa a asɨ nar gera dɔjoo. Sikel mi a asɨ nar mi, nar kɨlah a asɨ nar kɨlah na min losɨ kɨɗa a asɨ nar dɔmi.
13Kadkari'n a adɨn laten: Gaj kɨɗa ku kɨ kɨbojidet lo kɨlo kam homer nyako gemt kɨɗen, kɨ gaj kɨɗa ku kɨ kɨbojidet lo kɨlo kam homer nyako ɔrjt kɨɗen. 14Ta kɨdɔ yibt, ad i bat yib kɨɗen, a adɨn gaj kɨɗa ku kɨkɨlaht lo bat kɨɗei kam dɨlalot kɨɗen. Kɔr 'nten asɨ homer'n in asɨ bat kɨlah kɨta bat kɨlah asɨna kɨ homer kɨɗa. 15A adɨn kõ bat kɨɗa ku ɓut batgt kɨ ɓujoo kam lo kulnyagt kɨmaj lo Israel. Ĩgɨn ten la a in kadkari nduj, kɨ kadkari kɨlahorrt, kɨ kadkari kɨkad kamsɔllom, kɨta kutɨn dɔ majal lod, kel Bɨraɓe Luwah. 16Deg tube kɨdɔningt a ɗen kɨ kadkari 'nten kɨta mbaiɓe kam Israelt. 17I ta lo mbaiɓe kɨ ad kadkarig kɨlahorrt kɨ kadkari nduj kɨ kadkari nyakãi kɨta ndɔ nahg kɨ kij nahg kɨ ndɔ taakòg kɨ nahg tube kɨ gang ndɔd kɨta ngékɨɓe lo Israel. A ad kadkarig kɨta majalkɨɗa kɨ kadkari nduj kɨ kadkarig kɨlahorrt kɨ kadkarig kɨkad kamsɔllom kɨta kutɨn dɔ majal lo ngékɨɓe lo Israel.
18Titbe kel Bɨraɓe Luwah: Ndɔ kɨdasa lo nah kɨdasa ye, a un bal mang kɨkanj nya mad ɗaa, a arɨn lo kɨjaɓat. 19Ngejanyamosɨ a un mosɨ kadkari kɨta majalkɨɗa, a tud dɔ kag tabit kujt kɨ dɔkum ningata dɨngɨr kɨ so kɨ kag tabit natlo kɨkeme tɔ. 20A i ɗa titbe tɔ dɔ ndɔt kɨkõtanãimɨta lo nah kɨta dekɨɗen in ɗa majal kɨgo kam ndigt al, ke kɨgo gert al. A ɗan titbe kɨtakad arɨn ne kuj kɨjaɓat.
21Ndɔ kɨkɨlah gidaisɔɔ lo nah kɨdasa ye, a i ɗan ɗa nah Pakɨ na nah a to ndɔ tanãimɨta. A i san bɨna kɨkanj berrkasɨ. 22Ndɔt'n non mbaiɓe a la bal mang kɨɗa kadkari kɨta kut dɔ majal lon kɨ kɨ lo deg kɨdɔningt tube. 23Kam ndɔgt kɨtanãimɨta lo nah'n non a la kadkari kɨlahorrt ad Bɨraɓe, ad i bal mangg tanãimɨta kɨ bal batg tanãimɨta kɨkanj nya mad ɗad ndɔ kɨɗen kam ndogt kɨtanãimɨta. Ndɔ kɨɗen lo ndɔg kɨtanãimɨta'n non a la bal bĩã kɨɗa kadkari kutdɔ majal tɔ. 24A ad kadkari nduj asɨ kɨlo kɨɗa kɨtɔ bɔw mang kɨɗen kɨ epa kɨɗa kɨta bal bat kɨɗen nat kɨ yib asɨ hin kɨɗa kɨtɔ kɨlo kɨɗen.
25Nah kɨkõtanãimɨta kɨ ndo kɨkɨlah gidaimi lo nah'n non kɨ nah kɨ ndɔ tanãimɨta a ad nyag kɨta kadkari kutdɔ majal kɨ kadkari kɨlahorrt kɨ kadkari nduj nat kɨ yib.
Currently Selected:
Ejekel 45: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
