Ejekel 44
44
Mberkɨnda dɔ kujt kɨkij
1Kamla tel aw sem tabit't kɨ tɨga lo lot kɨjaɓat kɨ sumba loɓakàd na i kɨkut. 2Bɨraɓe elɨm an: Tabit'n ɗan i kɨkut, a ten taa al bat. De mad kɨ a andt goto kɨta Bɨraɓe Luwah lo Israel and kɨ tabit'n non. A ɗa kɨtuta be. 3Mbaiɓe taa ne, kɨta takĩa mbaiɓe asɨ ndɨt kad sanya nõ Bɨraɓet. A andt kɨ ɗob bulo kɨ tabit't na a tel kɨ ɗob kɨ kɨɗa'n non ho.
4Kamla aw sem tabit't kojigel nõ kujt kɨjaɓat. M'nɔl na oo kunj Bɨraɓe kɨɗangeɗeng ɗoosɨ kuj kɨjaɓat lo Bɨraɓe na m'so kɨber kɨ takum'm. 5Bɨraɓe elɨm an: Ngon de, oo maj na oo kɨ kumi. I nel mbii oon dɔ nya kɨɗen in m'a m'eli dɔ tat lo kuj kɨjaɓat lo Bɨraɓe kɨ mberkɨndag loa tube. I ga kami maj dɔ ĩgɨtɨn a ngahn ɗob kand kujt kɨjaɓat, kɨ ĩgɨn ɔgɨnd ɗob kand lot kɨjaɓat. 6Na el ngétaaɗɔɔ, ad i ngékɨɓe lo Israel an: Titbe kel Bɨraɓe Luwah, A ngékɨɓe lo Israel, nyaɗasɨ kɨyerr asɨ 7kɨta andɨn kɨ mbahg, kɨ ngéjagajalg kɨngarkamt, kɨ ngéjagajalg kɨdãrot kad yerrɨn kɨ kuj lom kɨjaɓat, lon adɨn nyasa lom kɨ mbool dã kɨ mosɨ ye. Titbe la i gangɨn ne kunkɔ lom kɨ nyaɗasɨ kɨyerr. 8Ĩn kɨdɔsɨ, oon go nyag lom kɨjaɓat al, na i ndan mbahg kad ɗan kɨlaɓer kam lot lom kɨjaɓat gan gotsɨ.
9Titbe kel Bɨraɓe Luwah: Mbah mad kɨ ngejagajal kɨngarkamt kɨ ngejagajal kɨ dãrot, ke ku mbahgt kɨ ndɨn dan Israelagt, a and kam lot lom kɨjaɓat al bat. 10Ta lo Lebiag'n son mut sãi sem kaglot'n Israelag son ne mut, awɨn sãi sem na ndulon go yog lod, a ton nyaba majalg lod. 11A in ngekɨlaɓer kam lot lom kɨjaɓat. A ngomɨn tabit kuj kɨjaɓat na a ɗan kɨlaɓer kam kujt. A jan kɔ kadkarig kɨlahorrt kɨ kadkari madg kɨtɔ deg, a ɗàn nõ degt kad ɗan kɨlaɓer adɨnd. 12Tit'n ɗan kɨlaɓer nõ yogt lod na adɨn ngékɨɓe lo Israel son ne kam majalt, kɨta 'nten la m'ndan yo dɔdt, kel Bɨraɓe Luwah. A ton nyaba majal lod. 13A ndɔt'n kɨromt kad ɗan kɨla janyamosɨ nomt, ke kad ɔdɨn nyag lom kɨjaɓat kam lot lom kɨjaɓat kɨtɔitɔi al na a ton nyaba rosɔl lod kɨyerrkɨɗa lod. 14Na m'a m'ndad kad in ngengom kuj kɨjaɓat kad ɗan kɨlaɓer loa tube kɨ nyag tube'n a ɗan kamt.
15Na ngéjanyamosɨ, ad i Lebiag ngan Sadok, ĩgɨn ɗan kɨlaɓer lom kam lot lom kɨjaɓat, lon Israelag son mut sãin sem ye, ingɨn non la a ndɔt'n kɨromt, ɗan kɨlaɓer admɨn, na a ɗan nomt kad lan kadkari mbool dã kɨ mosɨ admɨn, kel Bɨraɓe Luwah. 16A andɨn kam lot lom kɨjaɓat, a ndɔt'n kɨ ta tabɨlt lom kɨta ɗan kɨlaɓer kadɨm kɨ ngomɨn go mberkɨndag lom. 17Lon a andɨn kɨ tabit natlo kɨkeme ye, a lan kub lẽ rodt. A lan kub bĩ bat rodt al, lon a ɗan ne kɨlaɓer tabit natlogt kɨkeme kɨ kam kujt lom kɨjaɓat. 18A lan jɔg lẽ dɔdt, a lan njala lẽ girrdt, a lan kub kɨnder al na ɓet tuto ɓa rodt. 19Lon a teen kɨ natlot kɨtɨga kad awɨn ro degt, a tɔrrɨn kub ɗa kɨlaɓer lod, nyan kam kujgt kɨjaɓat, a lan kub kɨɗang kɨtakad deg telɨn kɨjaɓat kɨ takul kub lod al. 20A ngɨsen bisdɔd al, a nyan bisdɔd kad ngal al tɔ na a jan bisdɔd. 21Ke kɨkɨɗa ku ngéjanyamosɨgt kaa ne, ot kad ãi kasɨnduu, lon a andɨn kam natlot kɨkeme. 22A taan dekɨdẽ kɨ ngengawkoi, ke dekɨdẽ'n gangɨn na kɨ ngaw al, na a taa ngomand kɨ koh Israel ke nẽ ngejanyamosɨ'n ngawa oi koon. 23A ndoon deg lom kad ɔrrɨn nin nya kɨjaɓat kɨ nya kɨjaɓat al nat na a ɔjɨnd tɔr go nyag kɨyerr kɨ kɨkar nat. 24Lon gakna bai a ne, a in ngegangta kudt kɨgo mberkɨndat lom. A ngomɨn go mberkɨndag lom kɨ tag lom kɨ ndɔ nahg lom tube na a ndan ndɔ taakòg lom kɔtko kɨɗa. 25Ngejanyamosɨ a awɨn nderbe ro nint al na ɓeta telɨn kɨyerr, titbe kaa a telɨn kɨyerr kɨtakul nin bɔw, ke kõ ke ngon kɨdɨngã ke kɨdẽ, ke ngonkõ, ke kõnan kɨ ta ngaw al ɓaitɔ na ta goto dɔt. 26Goot'n ar ron ye, a adɨna ndɔ tanãimɨta, kamla a i kɨkar. 27Ndɔ'n a and kam lot kɨjaɓat kam natlot kɨkeme kɨta ɗa kɨlaɓer kam lot kɨjaɓat a ne, a la kadkari kutdɔ majal lon kel Bɨraɓe Luwah.
28Ta kɨdɔ nyandubat lod taa mĩ la mĩ nyanduba lod ye. Ot kadɨnd nyakagɓe kam Israelt, mĩ la mĩ nyakagɓe lod. 29A san kadkari nduj kɨ dã kadkari kutdɔ majal kɨ kadkari tɔidɔta, nya kɨɗen kɨ ndan tadang kɨta Bɨraɓe kam Israelt a i lod. 30Kand kɨdasa lo kandnyag kɨ kadkari kɨɗen, lo kadkarig losɨ tube, a in kɨta ngéjanyamosɨ. A adɨn ngejanyamosɨ gaj kɨdasa ku ndujt losɨ kɨtakad majkurr i dɔ kujt losɨ. 31Ngéjanyamosɨ a san nya kɨkoi ke nya kɨtɔr huthut al, ke yel, ke dã.
Currently Selected:
Ejekel 44: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
