Ejekel 43
43
Kunj Bɨraɓe kɨɗangeɗeng ɗoosɨ kuj
1Goot gog aw sem tabit't, ad i tabit kɨ sumba loɓakàd, 2na oo, kunj Luwah lo Israel kɨɗangeɗeng ɗe ko loɓakàdt. Kah mad ko tit kah man koosɨg na dɔning unj kɨta kunja kɨɗangeɗeng. 3Nyakokamndilt'n m'oo tana kɨ nyakookamndilt'n m'oo kete lon ɗen kɨta nuj ɓebo, tana kɨ nyakookamndilt'n m'oo kad bah Kebart, na m'so kɨber kɨ takum'm.
4Kunj Bɨraɓe kɨɗangeɗeng and kam kujt kɨjaɓat kɨ tabit kɨ ko loɓakàdt. 5Ndil aw sem kam natlot kɨkeme na oo kunj Bɨraɓe kɨɗangeɗeng ɗoosɨ kuj kɨjaɓat. 6Lon de'n non ɗa kadɨmt ɓaitɔ ye, m'oo dɔ ndi mad ɗa elɨm ta ko kam kujt kɨjaɓat, 7elɨm an: Ngon de, nẽbe la i londɨ pong lom, i lo in m'a m'nda danjam tit, i lo in m'a m'ndɨt mbãkɨnõt ku Israelagt. Nẽbe kɨnõt ngékɨɓe lo Israel kɨ ngarg lod a yerrɨn kɨ tɔm kɨkunjɗang kɨta kayakɨɗa lod kɨ nin ngarg lod kɨ dɨngɨr log lod gog al bat. 8Kɨtɔ ndan ɗiglo lod kad ɗiglot lom kɨ kag tabitg lod kad kag tabitgt lom na bɔrr kɨɗabe ɗa mbɨnajt sed. Yerrɨn kɨ tɔm kɨkunjɗang kɨta nyaɗad kɨyerr'n ɗan. Kɨtɔ 'nten la m'nujd'n kɔ kam wongt lom ye. 9Tajigla ad nyan yokɨnda lod kɨ nin ngarg lod kɔ sẽ romt na m'a m'ndɨ ku det mbãkɨnõt.
10Ĩ ngon de, ɔj ngékɨɓe lo Israel kuj'n ɗan kad mbɔjɨn nya ndaja kɨtakad rod sɔld dɔ ɗagootalt lod. 11Ĩla rod sɔld dɔ kɨlaɗadt a ne, ɔjd kuj kɨjaɓat kɨ nyandaja kɨ goɗob ɗaa, lo teea kɨ lo kanda kɨ nyag tube kɨ tit, ɔjd go mbɔja tube kɨ mberkɨndag tube, i ndàng nyag 'nten takumdt kɨtakad ngomɨn kɨ ɗan go mberkɨndag kɨ tag loa tube. 12'Nten la i mberkɨnda lo kuj kɨjaɓat. Tasom mbalbot kɨ lo kɨ gug dɔ kɨtaagbe i lo kɨjaɓat kɨtɔitɔi. 'Nten la i mberkɨnda lo kuj kɨjaɓat ye.
Dɨngɨr kadkari
13'Nten la i goɗob mbɔj dɨngɨr kɨ metɨr ye kɨɗen kudt i metɨr kɨɗa kɨ daji kɨ ɗa dɔt. Kawa kɨber i metɨr kɨɗa, tata i metɨr kɨɗa na ninga taa kɨ gug dɔ kɨ taagbe, tata i daji kɨɗa; 'Nten la to girr dɨngɨrt gug dɔ ye. 14Ko girrat kɨber mbã ningat kɨdasa i metɨr joo na tata i metɨr kɨɗa. Ko ningat kɨdu mbã tee ningat kɨbo i metɨr so na tata i metɨr kɨɗa. 15Ngal dɔ dɨngɨr kɨ dõ i metɨr sɔɔ na gajg sɔɔ ɗan dɔ dɨngɨrt kɨ dõ 16Tata i metɨr kɨlah gɨdaijoo asɨna derɨr. 17Ngal ninga i metɨr kɨlah gidaisɔɔ, tata i metɨr kɨlah gidaisɔɔ, taa kɨ gug dɔ gej i nusɨ metɨr na ngala kɨber i metɨr kɨɗa gug do gej. Ɗiglo kal kɨdɔt i ko loɓakàdt.
18Elɨm an: Ngon de, titbe kel Bɨraɓe Luwah, 'Nten la i ta kɨdɔ dɨngɨrt'n non, ndɔ'n ɗan kad lan kadkari kɨlahorrt, kɨ tud mosɨ dɔt. 19Ad bɔw mang kɨɗa kadkari kutdɔ majal ngejanyamosɨ, ad i Lebiag ngékɨɓe lo Sadok, ĩgɨn ndɔt'n kɨromt kɨta ɗa kɨlaɓer kadɨm, kel Bɨraɓe Luwah. 20A ɔd mosa i tud dɔ gajgt kɨsɔɔ lo dɨngɨr, a i tud dɔ dɔkum ningat kɨsɔɔ kɨ taa kɨ gug dɔ. Titbe la a i arɨn dɨngɨr kɨ utɨn dɔ majal loa ho ye. 21A un bɔw mang kadkari kutdɔ majal, i la horro lot kɨndah kɔtkokɨɗa kam kujt gid lot kɨjaɓat. 22Ndɔ kɨkõjoo a i la bal bĩã kɨkanj nya mad ɗaa kadkari kutdɔ majal kad arɨn ne dɨngɨr tit in hã arɨna ne kete kɨ bɔw mang ye be. 23Lon i tɔlkon kara woi ye, a i la bɔw mang kɨkanj nya mad ɗaa kɨ bal bat kɨkanj nya mad ɗaa kɨkɔt ku ɓut't. 24A i ɗe sed nõ Bɨraɓet na ngéjanyamosɨ a ũn kat dɔdt, a lan kadkari kɨlahorrt adɨn Bɨraɓe. 25Ndo kɨɗen kam ndogt kɨtanãimɨta, a i la bal bĩã kɨɗa kadkari kutdɔ majal, a lan kadkari bɔw mang, kɨ bal bat kɨɗa kɨkanj nya mad ɗad ku ɓut't. 26Kam ndogt kɨtanãimɨta'n non, a i tugon dɨngɨr, arɨna, ndana kɔtkokɨɗa. 27Lon ndɔg'n non tɨgan woi a ne, ndɔ kɨkõjijoo kɨnõt ngéjanyamosɨ a lan kadkarig kɨlahorrt losɨ dɔ dɨngɨrt, kɨ kadkarig losɨ kɨkad kamsɔllom na m'a m'taasɨ kɨromt, kel Bɨraɓe Luwah.
Currently Selected:
Ejekel 43: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
