Ejekel 3
3
Ejekel elta kɨta Luwaht
1Elɨm an: Ngon de, i sanya kɨ nõit, i sa maktub 'nten na aw elta kɨ Israelag. 2M'tee tam, na adɨm maktub 'nten, m'sa. 3Elɨm an: Ngon de, i ad kami ndan, na i ɗoosɨ kam tii kɨ maktub'n m'adi. M'sa, na nel tamt tit tej be.
4Elɨm an: Ngon de, aw ro Israelagt, eld tag lom, 5kɨta lain kɨro degt kɨ taɓe lod i tadang ke ngang ngãi al, na kɨro Israelagt. 6Kɨro deg koosɨgt kɨ taɓe lod i tadang, ke ngang ngãi al, ĩgɨn a i asɨ ger girr ta lod al. Rota, ĩla m'lai kɨro degt kɨ titbe a ne, a oon dɔ ta loi al e? 7Na Israelag a ndigɨn koo dɔ ta loi al, kɨta ndigɨn ko dɔ ta lom al. Israelag tube dɔd ngang, ngarkamd kongkong. 8Oo, m'a mad takumi ngang ngang kad i ndoorɨn kumngang lod kɨ dɔi ngang ngang kad i ndoorɨn dɔngang lod, 9M'a mad dɔi ngang tit diamã be, ngang toi mbal. Ot ɓoold, ot kad kɨngasa gai takumdt kɨta i girrdeg kɨ ngétaɗɔɔ.
10Elɨm ta dɔt ɓaitɔ an: Ngon de, tag'n m'eli nõ, i taa tag tube kamit na oo dɔ kɨ mbii. 11Aw, aw ro ɓergt, kɨro degt loi na eld an: Titbe kel Bɨraɓe Luwah, ke oon dɔ, ke oon dɔ al.
Ndil aw kɨ Ejekel Babilont
12Kamla Ndil unɨm kɨ dõ lon kunj kɨɗangeɗeng lo Bɨraɓe ɓai kam lot lon na m'oo kah yee dɔning kɨbobe ko gidmt. 13I kah bɔg ngékumkajɨrg kɨ ɔdɨn ta na kɨ kah gang kɨ ko kad'dt, na i tit yee dɔning kɨbobe. 14Ndil unɨm kɨ dõ aw sem, na m'aw kɨ kam kɨ katbang kɨ ndilɨm kɨtɨngabil kɨta ji Bɨraɓe i dɔmt kɨ tɔg. 15M'tee Tel Abib ro ɓergt kɨ ndin kad bah Kebar, loat'n non la m'ndɨt gom mbo dandt ndɔ tanãimɨta.
Ejekel ngengomlo kɨta Israel
16Go ndɔt kɨtanãimɨta ta lo Bɨraɓe ɗe romt kɨ ta 'nten an: 17Ngon de, m'ndai ngengomlo kɨta Israelag. A i oo dɔ ta kɨtamt, na a i ug eld ta lom. 18Lon m'el de kɨ ngeɗamajal m'an: A i oi rota, na i ela al ke ug ela kad nyàgo ɗob lon kɨmajal kad aj ron al a ne, de kɨ ngeɗamajal'n non a oi, na m'a m'ndɨje ta mosa roit. 19Na ĩla el ngeɗamajal na tɔ tan dɔ majalt lon al, ke nyàgo ɗob lon kɨ majal al a ne, a oi kam majalt lon na in taa, aj roi. 20Titbe tɔ, ĩla de kɨdenesew nyàgo ɗob lon kɨdenesew na ɗagootal na m'nda mbal gagig nõat, a oi kɨta i ug ela al, a oi kam majalt lon, M'a m'ga kamm dɔ nyaɗaa kɨdenesew'n ɗan nõ al, na m'a m'ndɨje ta mosa roit. 21Na ĩla i ug el de kɨdenesew kad ɗa majal al a ne, a ndɨ kɨ dɔn dõ rota kɨta i ug ela, na ĩ taa, aj roi.
Ji Bɨraɓe i dɔ Ejekel
22Nõbe la ji Bɨraɓe i dɔmt na elɨm an: I ɓai aw kam dɨlambot, nu la m'a m'eli tat ye. 23M'ɓai m'aw kam dɨlambot na oo, kunj Bɨraɓe kɨ ɗa ngereng ɗat tit'n m'ooa'n kete kad bah Kebart. M'so kɨ takum'm kɨ ber. 24Na Ndil and kammt, unɨm adɨm m'ɗa kɨ njam dõ, kamla elɨm ta, an: Aw, ut ta kuj dɔit. 25Ngon de, oo, a ũn kɨla dɔit, a dɔin ne kɨtakad i asɨ tee kaw kudt al. 26M'a mad ndõi tĩya ngangãit kad i tel mbo kɨtakad i asɨ ndangd al kɨta i girrdeg kɨ ngétaɗɔɔ. 27Na lon m'eli taa ne, m'a m'tee tai kad i eld an: Titbe kel Bɨraɓe Luwah; de'n ndig ko dɔ a ne, kɨ oo dɔ, na de'n ndig ko dɔ al a ne, kɨ oo dɔ al kɨta i girrdeg kɨ ngétaɗɔɔ.
Currently Selected:
Ejekel 3: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
