Ejekel 39
39
Ta kɨdɔ Gogt ɓaitɔ
1I ngon de, elta kɨtamt kɨ do Gogt, el an: Titbe kel Bɨraɓe Luwah: M'ndoori, in Gog mbaiɓe kɨ Ros kɨ Mesek kɨ Tubal. 2M'a m'tel sei gog, m'a m'ɔrri ta ɗob m'a mad i ɓai kojigel lot kɨsãi, m'a m'ɔrri m'ɗe sei dɔ mbalbogt lo Israel. 3M'a m'nda gan kɨrã loi kɨ jigelit na m'a mad kɨnrag tuson jikõit kɔ. 4A i so dɔ mbalbogt lo Israel, ĩn kɨ ɓut ngéɗɔɔ loi tube kɨ deg koosɨg ĩgɨn ĩn nat sei. M'a mad i tel nyasa yelg tube kɨ ngesadã kɨ dãg kɨmut kad sãi mak. 5A i so kam dɨlalot kɨmut kɨta m'elta woi kel Bɨraɓe Luwah. 6M'a m'la horr dɔ Magogt kɨ dɔ ĩgɨtɨn ndɨn lom dɔ doorlogt na a gerɨn ta kad mĩ Bɨraɓe. 7M'a mad gerɨn tɔm kɨ kunjɗang ku degt lom Israel, m'a m'nya kad yerrɨn kɨ tɔm kɨkunjɗang gog al ta, na girrdeg a gerɨn ta kad mĩ Bɨraɓe la mĩ Ngekunjɗang kam Israelt ye. 8Oon, ndɨ ɗe, a ɗa nya tɔ, kel Bɨraɓe Luwah, i ndɔ in m'eltaa kete woi. 9Kamla ngéndɨ ɓebogt kɨ Israel a teen, a ɗan horr, a lan nyakatg horro ad õ derg kɨdu kɨ kɨbo, gãg kɨ kɨrãg, kagg kɨ ningag, a ɗan ne horr asɨ ɓal tanãimɨta. 10A sahn kir kam mut gog al, a gan kag kam kut al ho kɨta kɨ nyakatg'n non la a ɗan ne horr ye. A tujɨn nyag lo deg ĩgɨn tujɨn nyag lod kete, a tirɨn nyag lo deg ĩgɨn tirɨn nyag lod kete to, kel Bɨraɓe Luwah. 11Ndɔt'n non m'a mad Gog lo kɨ to dub nin kam Israelt, ad i hollo lo mbahg ngetoi kɨ ta bahbot ko loɓakàd. Lo dub nin'n non a ut ɗob lo deg ngetoi. Nu la a duwɨn Gogt nat kɨ deg koosɨg loa tube na a kunɨn to hollo'n non Hollo lo koosɨg lo Gog, 12Ngékɨɓe lo Israel a duwɨn nind nah tanãimɨta kɨtakad arɨn ne dɔning. 13Deg tube ngendɨ dɔningt'n non a duwɨn nind, a i nya tɔko lod dɔ ndɔt in m'a m'ngaa kɔsɨgon, kel Bɨraɓe Luwah. 14A kɔtɨn deg kad lan go dɔning kɨkanj nya ta kad duwɨn ndeg ning kɨnãi ĩgɨn ton dɔningt kad arɨn ne lo. Go nahgt kɨtanãimɨta'n non la a sahn god ye. 15Lon lan go dɔning na kɨkɨɗa kudt oo kɨnga de ye, a ndah nya kɔj loat'n non mbã kad ngeduw nin ɗe duwɨn kam Hollot lo koosɨg lo Gog. 16Ɓebo mad i nõ in kunɨna Hamona, ad i koosɨg. Titbe la a arɨn ne dɔning'n non ye. 17In ngon de, titbe kel Bɨraɓe Luwah: El yelg kɨ dang dang kɨɗen kɨ dãg kɨmut tube an: I kawɨn'na, i ɗen, i kawɨn'na kɨnat ko lot kɨɗen kɨtɔ kadkari kɨjakɔ'n m'ndɨ m'ɗa kɨtɔsɨ, kɨtɔ kadkari kɨjakɔ kɨbobe dɔ mbalbogt kɨ Israel. A san dã ho, a ãin mosɨ ho. 18A san dan kɨrãɗɔɔg, a ãin mosɨ mbaiɓeg kɨ dɔningt, bal batg, ngan batg, bal bĩãg, kɨ bɔw mangg kɨ Basan kɨ rod bo mbulmbul. 19A i san mboold dã ndanɨn, a ãin m'ɔsɨd mbã kad ɗasɨ, i kadkari kɨjakɔ in m'ɗa kɨ tosɨ. 20Ta tabɨlt lom a i san dã sɨndag kɨ ngékald, dã gõɗɔɔg kɨ ngéɗɔɔg tube, kel Bɨraɓe Luwah. 21M'a m'nda kɔsɨgon lom ku girrdegt, na girrdeg tube a oon takɨgang lom in m'a m'gang kɨ jim kɨkɔi in m'nda do det. 22Ngékɨɓe lo Israel a gerɨn ta kad mĩ Bɨraɓe Luwah lod nẽbe kɨnõt 23na girrdeg a gerɨn i kɨta ɗagootal lo ngekɨɓe lo Israel la awɨn ne ɓert, kɨ ta ndokum lod kɨromt la m'ɓɔdɨn takum'm na m'lad ji madngétadgt kɨtakad ĩn tube son ta kiyaɗɔɔt. 24M'ɗa sed titbe kɨtɔ yerr lod kɨ tɔidɔtag lod ad m'ya takum'm.
Israelag a ndɨn dɔningt lod
25Kɨtɔ 'nten, titbe kel Bɨraɓe Luwah: Tajigla m'a m'tel kɨ deg lo Jakob ɓe ɓert gog, m'a m'oo kumtondo lo ngékɨɓe lo Israel, na jang a ɗam kɨ ta tɔm kɨkunjɗang. 26Kamla kamd a oi dɔ rosɔlt lod kɨ nyaɗad kɨ gootal tube ĩn ɗan ndoormɨm lon ndin lom kam dɔningt lod na de mad kɨ ngendad ɓoolt goto. 27Lon m'tel sed ku degt na m'kawd kɨnat ko kam dɔninggt lo madngétad kad m'tee kɨ kunjɨm kɨɗangeɗeng kɨtakuld takum girrdegt ngãibe 28a gerɨn ta kad mĩ Bɨraɓe Luwah lod, m'aw sed ɓert kɨro girrdegt kamla m'kawd kam dɔningt lod kanj nya de mad kɨ ɗa gog. 29M'a m'ɓɔ takum'm rodt gog al ta kɨta m'a mad Ndilɨm i kɨdɔ ngékɨɓet lo Israel, kel Bɨraɓe Luwah.
Currently Selected:
Ejekel 39: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
