Ejekel 38
38
Gog, girrdeg kojigel
1Ta lo Bɨraɓe'n elɨmt an: 2Ngon de i teltakumi kɨro Gogt kam dɔningt lo Magog, kɨro mbaiɓe kɨ Ros kɨ Mesek kɨ Tubal, i elta kɨtamt kɨdɔat, 3el an: Titbe kel Bɨraɓe Luwah: Oo, m'ndoori in Gog, mbaiɓe kɨ Ros kɨ Mesek kɨ Tubal. 4M'a m'tel sei gog, m'a m'la kui tait, m'a m'tee sei kɨtɨga, in kɨ koosɨ ngéɗɔɔ loi, sɨndag kɨ ngékald, in tube lan nyakatg rodt, in deg koosɨg, awɨn kɨ derg kɨdu kɨ kɨbo, in tube kɨ nyakat jidt. 5Ngéɗɔɔg kɨ Perse kɨ Etiopi kɨ Libi a ĩn nat sed, tube awɨn kɨ der kɨ jɔgɗɔɔ rodt. 6Gomer kɨ ɓut ngéɗɔɔ lon tube, ngékɨɓe lo Togarma kɨ kojigel kɨ ɓut ngéɗɔɔg lon tube, deg koosɨg in nat sei. 7I ɗa roi, i ɗago nyag loi, in kɨ koosɨ deg'n kawɨn na dɔit na in bɨradɔd. 8Go ndogt kɨngãi a ne, a kawsɨ kɨnat. Kam ɓalgt kɨdɔboit a i awɨn kam dɔningt'n tana ta nyakat, kam dɔningt'n deg loa kawɨna ku girrdegt ngãi kɨdɔ mbalbogt lo Israel, ĩgɨn telɨn gootɓeg kaglo ngãibe. Deg'n ɗan ɔrrɨnd dan degt, tajigla ndɨn kɨ lapia londɨdgt. 9A i ɓai, aw tit nélbarwãin be, a ĩ tit kilndii kɨ ut dɔ dɔning, ĩ kɨ ɓut ngéɗɔɔg loi tube kɨ koosɨ deg kɨ in nat sei. 10Titbe kel Bɨraɓe Luwah: Ndɔt'n non tagah madg a ɓain kamit na a i ɔj ta ɗa majal, 11a el an: M'a m'aw ro dɔ dɔningt'n ɓeg loa ĩn kɨkanj ngéngomlo, m'a m'so dɔ degt ngendɨ lom kɨ lapia kam londɨdt, ĩn tube ndin ɓebogt kɨ ndogbɔrr gotot, nyakut taa ke tabita goto. 12M'a m'oi nyatetɗɔɔ, m'a m'tir nya pur, m'a m'nda jim dɔ logt kɨ tujɨn kete na tajigla deg ndɨnt, kɨ dɔ degt ĩgɨn ɔrrɨnd ku girrdegt, ĩgɨn ngahn ɓut nyakulg kɨ nyamajg na ndin ngawdan dɔningt. 13Seba kɨ Dedan kɨ ngeɗagatg kɨ Tarsis kɨ ngan tubog lod tube a elɨn anan: I ɗe kɨta koi nyatetɗɔɔ a? I kaw ɓut ngéɗɔɔ loi kɨ to tir nya pur a? Kad oin nar arjã kɨ nar ɔr, kad oin ɓut nyakulg kɨ nya majg, kad i ngah nyatetɗɔɔ ngãibe. 14Kɨtɔ 'nten ngon de, elta kɨ tamt na el Gog an: Titbe kel Bɨraɓe Luwah; Ndɔt'n non lon deg lom Israel a ndɨn kɨ lapia a ne, a i ger ale? 15Kamla a i ɓai dɔningt loi kɨsãi kojigel, in kɨ deg koosɨg nat sei, in tube alɨn sɨndag, in bahkad koosɨg, in ɓut ngéɗɔɔg kɨ ngetɔg. 16A aw ɗɔɔ dɔ degt lom Israel tit kilndii kɨ ut dɔ dɔning be. Kam ndɔgt kɨdɔboit a ne, m'a m'adi aw ɗɔɔ dɔ dɔningt lom, ĩ Gog, kɨtakad girrdeg germɨn lon m'a m'teen kɨ kunjɨm kɨɗangeɗeng takumdt kɨtakuli. 17Titbe kel Bɨraɓe Luwah: Ĩ hã m'elta dɔit maɗi nu kɨta ɓerg lom ngékelta kɨtamt kam Israelt, ĩgɨn elɨn ta kɨtamt kam ndɔgt ɓal ngãibe kad m'a mad i ɗɔɔ sed ale? 18Ndɔt'n non, Gog a aw ɗɔɔ dɔ dɔning Israelt, kel Bɨraɓe Luwah, wong a il kumm kirir. 19Kɨtɔ jàng kɨ ɗam kɨ wong lom kɨtɨngabil la m'elɨn ta m'an: Rota, ndɔt'n non dɔning Israel a yee yɨkɨtyɨkɨt. 20Kanjg kɨ bahbot kɨ yelg kɨ dõ kɨ dãg kɨ mut kɨ nyag tube kɨ ngékɔrkɔdber kɨ deg tube ngéndɨ dɔningt a ɓoolɨn kɨ rondad. Mbalbog a rian, doorlog a tuson, ndogbɔrrg to a tetɨn ningt tube. 21Dɔ mbalbogt lom tube m'a m'kun nyakat kad ro kɨ Gog, kel Bɨraɓe Luwah. Dekɨɗen arturta nya kat lon kɨdɔ ngonkõt. 22M'a m'gangta dɔat kɨtakul yokoosɨ kɨ mosɨ. M'a mad ndii ed dɔat kɨ ɓut ngéɗɔɔg loa kɨ deg koosɨg ĩgɨn ĩn nat sia. A i ndii kɨ ed kɨ tɔg kɨ kɔsɨndii kɨbobo kɨ horr kɨ supɨr. 23Titbe m'a m'ɔj tɔko lom kɨ kunjɨm kɨɗangeɗeng. M'a mad germɨn nõ girrdegt ngãibe na a gerɨn ta kad mĩ Bɨraɓe.
Currently Selected:
Ejekel 38: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
