Ejekel 37
37
Kɨngag kɨtut telɨn kumkajir
1Ji Bɨraɓe i dɔmt na unɨm aw sem kɨtakul Ndil Bɨraɓe kam hollot'n ɗoosɨ kɨ kɨngag. 2Ɔrrɨm ad m'gug dɔ kɨngag'n non. Oo, in ngãibe na tutɨn kurum.
3Elɨm an: Ngon de kɨngag 'nten a asɨn telɨn kumkajir gog a? M'tur m'an: Bɨraɓe Luwah, ĩla i ger ye. 4Tel elɨm gog an: I elta kɨtamt dɔ kɨngagt 'nten eld an: Ĩn kɨngag kɨ tutɨn kurum, oon dɔ ta lo Bɨraɓe. 5Titbe la Bɨraɓe Luwah elɨn kɨngag an: Oon m'a m'la ko kumkajir kamsɨt na a i ndin kɨ dɔsɨ dõ. 6M'a m'tɨla ngɨra rosɨt gog, m'a mad dã ɗe dɔsɨt na m'a m'ut dɔsɨ kɨ ndar. M'a m'la kò kamsɨt mad i telɨn kumkajir na a i gerɨn ta kad mĩ Bɨraɓe.
7Titbe m'elta kɨ ta Luwaht tit'n ndamɨn mbera. Lon m'ɗa m'el ta ɓaitɔ ye, m'oo kah kɨngag ɔdɨn rod na oo lan na kɨnat, kɨnga kɨɗen kɨ namɨn. 8M'oo na oo ngɨrag ɗen dɔ kɨngagt, dã ɗe dɔ ngɨrat, ndar ut dɔd na kò goto kamdt.
9Kamla elɨm an: Elta kɨtamt dɔ kòt. Ngon de el kò an: Titbe kel Bɨraɓe Luwah: Ĩ kò, i ɗe ko dɔkum logt kɨsɔɔ, i la kò kam ngékoigt 'nten kad telɨn kumkajir. 10M'elta kɨgo tat'n elɨm na kò and kamdt ad telɨn kumkajir. Ɓain ɗan kɨ njad dõ na in deg koosɨg kɨ ngãi ngãibe.
11Elɨm an: Ngon de, kɨngag'n ɗan in ngékɨɓe lo Israel tube. Oo, ɗa elɨn anan: Kɨngaj tut kurum, kam kɨndahdɔt loj goto, tamj tĩ. 12Kɨtɔ 'nten elta kɨtamt na eld an: Titbe kel Bɨraɓe Luwah; M'a m'tee ta dɔɓadsɨ, m'a m'tee sesɨ kam dɔɓadsɨgt kɨtɨga. Ah deg lom, m'a m'tel sesɨ ɓe kam dɔning Israelt gog. 13A i gerɨn ta kad mĩ Bɨraɓe lon m'tee ta dɔɓadsɨg, m'tee sesɨ kam dɔɓadsɨgt kɨ tɨga, ah deg lom. 14M'a m'la Ndilɨm kamsɨt kad i telɨn kumkajir, m'a m'ndasɨ kam dɔningt losɨ, kamla a i gerɨn ta kad mĩ Bɨraɓe la m'elta na m'ɗa tɔ. Titbe kel Bɨraɓe.
Terrta dɔ kagtɔsɨ kɨjoo
15Ta lo Bɨraɓe'n elɨmt gog ɓaitɔ an:
16I ngon de, un kagtɔsɨ kɨɗa i ndang ta 'nten dɔt: Kɨtɔ Juda kɨ Israelag ĩgɨn ndan rod nat sia. Un kagtɔsɨ kɨmad to na ndàng ta 'nten dɔt: Kɨtɔ Jojep, kagtɔsɨ lo Epraim kɨ ngékɨɓe lo Israel tube'n ndan rod nat sia. 17I ndad nat kad ĩn kagtɔsɨ kɨ kɨɗabe, kad ĩn kɨɗabe jiit. 18Lon deg loi a ndɨjein anan: A i ɔrj girr ta nya 'nten ale? 19A i turd an: Titbe kel Bɨraɓe Luwah: Oon, m'a m'un kagtɔsɨ lo Jojep kɨ to ji Epraimt kɨ ngékɨɓe lo Israel ĩgɨn ndan rod nat sia, m'a m'lad nat kɨ kagtɔsɨ lo Juda kad telɨn kagtɔsɨ kɨ kɨɗabe kad ĩn kɨɗabe jimt. 20Lon kagg'n i ndàng ta dɔt in jiit ta kumdt.
21A eld an: Titbe kel Bɨraɓe Luwah: Oon, m'a m'ɔi Israelag ku girrdegt log'n awɨnt, m'a m'kawd kɨnat ko kam lot kɨɗen, m'a m'tel sed kam dɔningt lod. 22M'a m'teld girrdeg kɨɗabe kam dɔningt dɔ mbalbogt lo Israel. Ngar kɨɗabe la a õɓe dɔdt tube, a in girrdeg joo gog al, a kegɨn kõɓe girr joo al tɔ. 23A yerrɨn rod kɨ yog lod gog al, ke nyaɗad kɨ yerr, ke tɔidɔtag lod. M'a m'ɔrrd kam logt tube kɨ ndɨnt na ɗan majal. M'a m'ard kad ĩn deg lom na m'a mĩ Luwah lod. 24Ɓer lom Dabid a i ngar lod na ĩn tube, ngengomd a i kɨɗabe. A telɨn rod go tat lom, a ngomɨn go mberkɨndag lom na a hɔ ɗan goot. 25A ndɨn dɔningt'n mad ɓer lom Jakob, lo in kasɨg ndɨnt. A ndɨnt mbãkɨnõt, in kɨ ngandg kɨ ngan ngandg na ɓer lom Dabid a i mbaiɓe lod kɨnõt. 26M'a m'un sed kunkɔ kɨ lapia, a i kunkɔ kɨ mbãkɨnõt mbɨnadt kɨ mĩ. M'a m'ndad tit, m'a mad bɨlan, m'a m'nda lo lom kɨjaɓat dandt mbãkɨnõt. 27Lo ndim a i kudt, m'a mĩ Luwah lod na a in deg lom. 28Kamla girrdeg a gerɨn ta kad mĩ Bɨraɓe la m'ɔrr Israel, m'ndaa tadang lon lo lom kɨjaɓat i dandt kɨnõt.
Currently Selected:
Ejekel 37: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
