Ejekel 36
36
Israel a tel kɨ dɔningt lon gog
1Na ĩ ngon de, i elta kɨta Luwaht dɔ mbalbogt kɨ Israel, el an: Mbalbog kɨ Israel, oon dɔ ta lo Bɨraɓe. 2Titbe kel Bɨraɓe Luwah: Kɨtɔ madngétasɨg elɨn ta dɔsɨt, gon ne anan: Ha ha, doorlog kɨmaɗi tel in nyakagɓe loj. 3Kɨtɔ 'nten i elta kɨ kamt an: Titbe kel Bɨraɓe Luwah kɨ tɔ deg kɨ log tube sahn kɨ n'tujsɨn kɨ n'lasɨn yalɨm tɔ kɨtɔkad i telɨn nya kagɓe lo ndeg girrdeg na elɨn tag kɨ mal kɨ nyataj kɨ ho ho dɔsɨt. 4Kɨtɔ 'nten ĩn mbalbog kɨ Israel, oon dɔ ta lo Bɨraɓe Luwah. Titbe kel Bɨraɓe Luwah dɔ mbalbogt kɨ doorlog kɨ bahg kɨ hollog kɨ gotlog kɨ gotɓeg ĩgɨn telɨn nya kɨtir pur kɨ nya godɔt kɨro ndeg girrdegt kɨ gugɨn dɔd. 5Kɨtɔ 'nten, titbe kel Bɨraɓe Luwah, rota, kam jangt lom kɨtɨngabil m'elta m'ndoorɨn ndeg girrdeg, m'ndoorɨn Edom kɨtaagbe ĩgɨn taan dɔning lom, telɨna nyakagɓet lod kɨ ronel kɨ kid kɨngãi ngarkamdt na kɨtakad tirɨna pur. 6Kɨtɔ 'nten i elta kɨtamt do dɔning Israelt, el mbalbog kɨ doorlog kɨ holman'g kɨ hollog, an: Titbe kel Bɨraɓe Luwah: Oon, m'elta lom kɨ jàng kɨ wong kɨtɔlsɔkɨr kɨta girrdeg lan rosɔl dɔsɨt. 7Kɨtɔ 'nten, titbe kel Bɨraɓe Luwah: M'nda yo m'an: Girrdeg ĩgɨn gugɨn dɔsɨ, ĩn kɨdɔd a ĩn kɨ rosɔl. 8Na ĩn mbalbog kɨ Israel. I ban dɔjisɨg, i teen kɨ kandsɨ kɨta deg lom Israel; nãi nderbe kad telɨn. 9Oon, m'a m'ɗe rosɨt, m'a m'tel kɨrosɨt a ndɔrɨn dɔsɨt, a duwɨn nya kamsɨt. 10M'a mad deg bɨlan dɔsɨt, ad i nge kɨɓe lo Israel kɨtaagbe. A ndɨn kam bebogt, a ɗan go gootɓeg kɨnuj. 11M'a mad deg kɨ dãg bɨlan dɔsɨt, a bɨlan kɨdɔtdɔt, a oojɨna. M'a mad deg ndɨn dɔsɨt tit kɨ ndin ne maɗi, m'a mad maj urrsɨ tɔi majkurr kɨkete, kamla a i gerɨn ta kad mĩ Bɨraɓe. 12Ã, m'a mad deg ndian dɔsɨt, ad i deg lom Israel. A tain, a i nyanduba lod na a i sa ngandg gog al. 13Titbe kel Bɨraɓe Luwah: Kɨtɔ elɨn anan: In dɔning Israel, i sa deg, i to koh girrdeg loi. 14Kɨtɔ 'nten a i sa deg gog al, a i to koh girrdeg loi gog al tɔ, kel Bɨraɓe Luwah. 15M'a m'nya kad oo dɔ ta kɨrosɔl lo girrdeg gog al ta a i to nyataj lo girrdeg al, a i nyagagigt kɨro girrdegt loi gog al, kel Bɨraɓe Luwah.
16Ta lo Bɨraɓe'n elɨmt an:
17Ngon de, lon ngékɨɓe lo Israel ndɨn dɔningt lod ye, yerrɨn sia kɨ takul ɗob nyaɗad kɨ kɨlaɗad; kɨla ɗad kɨnomt i tit'n dekɨdẽ kɨ mosɨ ɗaa be. 18Kamla m'ũ wong lom kɨ tɔlsɔkɨr dɔdt kɨta mosɨ in ũn ko kam dɔningt kɨ yog kɨyerrɨn ne tɔ. 19M'tɨnda m'tĩd ku girrdegt, tĩd kɨgo dɔningg na m'gangta dɔdt kɨ go nyaɗadt kɨ kɨlaɗad. 20Lon ten rogirrdegt lo kɨɗen in awɨnt, yerrɨn kɨ tɔm kɨkunjɗang ad deg elɨn ta dɔdt anan: Deg'n ɗan ĩn deg lo Bɨraɓe na teen ko dɔningt loa. 21Na m'ndig ngomd tɔm kɨkunjɗang in ngékɨɓe lo Israel yerrɨn ne ku girrdegt ĩgɨn awɨn rodt.
22Kɨtɔ 'nten el ngekɨɓe lo Israel an: Titbe kel Bɨraɓe Luwah; I kɨtatɔsɨ m'ɗan nya 'nten al, ngékɨɓe lo Israel, na i kɨta tɔm kɨkunjɗang kɨ i yerrɨn ne ku girrdegt'n awɨn rodt. 23M'a mad tɔm kɨbo i kɨkunjɗang, i telɨna kɨyerr ku girrdegt na i yerrɨn sia dandt. Girrdeg a gerɨn ta kad mĩ Bɨraɓe, kel Bɨraɓe Luwah, lon m'teen kɨ kunjɨm kɨɗangeɗeng takumdt kɨtakulsɨ. 24M'a m'ɔrrsɨ ku girrdegt, m'a m'kawsɨ ko kam dɔninggt tube, m'a m'tel sesɨ kam dɔningt losɨ gog. 25M'a m'tud man kɨjanjoi dɔsɨt na a ĩn kɨkarnyang. M'a m'arsɨ dɔ yerrgt losɨ kɨ yog losɨ tube. 26M'a m'adsɨ ngarkam kɨ kij na m'a m'ũ ndil kɨkij kamsɨt. M'a m'ɔrr ngarkam kɨmbal ko na m'a m'adsɨ ngarkam kɨ dã. 27M'a m'nda Ndilɨm kamsɨt, m'a m'ɗa sesɨ kad i ndian kɨgo mberkɨndagt lom kad i ngomɨn go na kad i hɔ ɗan go tagt lom. 28A i ndɨn dɔningt'n mad bɔwsɨg, a in deg lom na m'a mĩ Luwah losɨ. 29M'a m'ajsɨ kam yerrgt losɨ tube, m'a m'kun nyako na m'a m'ada bɨla kɨdɔtdɔt. M'a m'la ɓo dɔsɨt al, 30m'a mad kand kagg kɨ nyako kɨ kam ndɔɔt bɨlan kɨdɔtdɔt kɨtakad rosɔl lo ɓoo ɗasɨ ku girrdegt gog al. 31Kamla a i gan kamsɨ dɔ ɗob nya ɗasɨ kɨmajal kɨ kɨlaɗasɨ kɨmajal. Ĩn kɨdɔsɨ a oon rosɨ nya kɨyerrt kɨta ɗagootal losɨ kɨ yerrg los. 32I kɨtatɔsɨ m'ɗan nya 'nten al, kel Bɨraɓe Luwah. I gerɨn maj, sumba kad rosɔl ɗasɨ na takumsɨ i kɨ rosɔl kɨtɔ kɨla ɗasɨ, in ngékɨɓe lo Israel.
33Titbe kel Bɨraɓe Luwah: Ndo in hã m'a m'arsɨ dɔ ɗagootalgt losɨ tube ye, m'a mad deg ndɨn kam ɓebogt na a ɗan go gootɓeg. 34Dɔning kɨtuj, a ndɔrɨn gog, dɔning'n kete i gootɓe takum degt tube kɨ ngetɔi. 35Deg a elɨn anan: Dɔning in maɗi i kɨtuj, tajigla tel tit ndɔɔ Eden be. Ɓebog kɨ tujɨn ad de gotot na telɨn gootɓe ye, tajigla deg ndɨnt na ɗan ndogbɔrr gugɨn dɔ. 36Kamla girrdeg kɨ nãi gugɨn dɔsɨ a gerɨn ta kad mĩ Bɨraɓe la m'ɗa gootɓeg kɨ tuj gog, na m'hɔ nyag gotlogt kɨtuj. Mĩ Bɨraɓe m'elta na m'a m'ɗa.
37Titbe kel Bɨraɓe Luwah: M'a m'nya kad ngékɨɓe lo Israel sahn nya 'nten romt na oo nya in m'a m'ɗa m'ad'd; M'a mad deg lod bɨlan tit'n ɓut nyakulg be. 38Tit ɓut nyakulg kɨtɔ kadkari kɨjakɔ, tit ɓut nyakulg kam Jerusalemt kaglo nahg kɨ gangɨn ndɔd. Titbe tɔ la gootɓeg a ɗoosɨn kɨ ɓut deg ho ye, kamla a gerɨn ta kad mĩ Bɨraɓe.
Currently Selected:
Ejekel 36: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
