Ejekel 33
33
Ejekel ngengomlo
1Ta lo Bɨraɓe'n elɨmt an:
2Ngon de, elta kɨ deg loi, eld an: Lon m'la kɨ nyakat kɨta nuj dɔning mad na deg kɨdɔningt'n non kɔtɨn de mad kudt, ndana ngéngomlo, 3de'n ɗàn, lon oo nyakat ndɨ ɗe dɔ dɔningt a ne, kɨ kun tow tɔsɨn ndool deg. 4Na de'n oo dɔ ndi tow na tur go al ad nyakat tɔla a ne, mosa i dɔat ĩ kɨɓe. 5Oo dɔ ndi tow na tur go al, mosa i dɔat ĩ kɨɓe na ĩla tur go a ne, a aj ron. 6Ĩla ngengomlo oo nyakat ndɨ ɗe na kun tow tɔsɨn ndool deg al ad nyakat tɔl de mad a ne, de'n non a oi kam nyaɗant kɨgoot al, bekaa m'a m'ndɨje mosa ro ngéngomlot.
7Na ĩ ngon de, m'ndai ngengomlo dɔ ngékɨɓet lo Israel. Kɨtɔ 'nten, lon oo dɔ ta kɨtamt, a ug eld ta lom. 8Lon m'el de kɨ ngeɗamajal m'an: Ĩ ngeɗamajal, rota a oi, ĩla elta kɨ kad ngeɗamajal nya ɗob lon kɨmajal kɔ al a ne, ngeɗamajal'n non a oi kam nyaɗant kɨgoot al na m'a m'ndɨje mosa roit, 9na lon ɔj ngeɗamajal kad nya ɗob lon kɨmajal kɔ na ndig al, a oi kam nyaɗant kɨgoot al, na a aj roi.
Ɗob lo Luwah kɨdenesew
10Na ĩ ngon de, el ngékɨɓe lo Israel an: Elɨn titbe anan: Tɔidɔtag loj kɨ majalg loj ĩn dɔjt, i kɨtatɔd la roj ndɨ nyemɨn ye. Titbãi hã j'a kɨ ndɨn kɨ dɔj dõ a? 11Eld an: Dɔ ndimt kɨdɔ dõ, kel Bɨraɓe Luwah, m'ɗa ronel dɔ koit lo nge ɗamajal al na kɨ ngeɗamajal nya ɗob lon kad ndɨ kɨ dɔn dõ. I telɨn, i telɨn, nyan ɗobg losɨ kɨmajal kɔ. Kɨtɔɗi a oin ne a? Ĩn ngékɨɓe lo Israel. 12Na ĩ ngon de, el deg loi an: Nya ɗa kɨdenesew lo de kɨdenesew a aja al lon tɔidɔta. Nyaɗa kɨmajal lo ngeɗamajal a nuja al lon nyàgo majal lon kɔ. Titbe tɔ de kɨdenesew a asɨ ndɨ kɨ dɔn dõ kɨtakul nyaɗan kɨdenesew al lon ɗa majal. 13Lon m'el de kɨdenesew m'an: Rota a i ndɨ kɨ dɔi dõ. Na ɓakul ɗa dene sew lon, ɗagootal a ne, m'a m'ga kamm dɔ nyaɗaat kɨdenesew kɨɗa al na kam nyaɗaat kɨgoot al la a woit ye. 14Lon m'el ngeɗamajal m'an: Rota a i oi, ĩla tel nyàgo majal lon, ɗa nya kɨgoɗobat kɨ kɨdenesew, 15na ĩla ngeɗamajal'n non tel kɨ nya tĩna nya, tel kɨ nya'n ta kɨlo ɓoogt na ho ɗago mberkɨndat kɨ ngekad kumkajir kɨkanj ɗagootal a ne, rota a ndɨ kɨ dɔn dõ, a oi al. 16Majalg tube'n ɗa, m'a m'ga kamm dɔt al. Ɗà nya kɨgoɗobat kɨ kɨdenesew, rota a ndɨ kɨ dɔn dõ.
17Titbe kaa ne, deg loi ndɨ elɨn anan: Ɗob lo Bɨraɓe i goɗobat al na ɗob lod la i goɗobat al ye. 18Ĩla de kɨdenesew tel nyàgo denesew lon ko na ɗa nya kɨgoot al a ne, a oi kɨta nya 'nten. 19Ĩla ngeɗamajal tel nyàgo majal lon na ɗa nya kɨgoɗobat kɨ kɨdenesew, kɨta 'nten a ndɨn kɨ dɔn dõ. 20Be kaa i elɨn anan: Ɗob lo Bɨraɓe i goɗobat al. Ah ngékɨɓe lo Israel, m'a m'gangta dɔsɨt, dekɨɗen kɨgo kɨlaɗaat.
Takɨgang a so dɔ Israelt
21Bal kɨkɨlah gidaijoo lo ɗa ɓert loj kɨ nah kɨkɨlah kɨ ndɔ kɨkõmi lo nah'n non ye, de mad tee Jerusalemt ãi, ɗe romt elɨm an: Taan ɓebo woi. 22Kɨtɔj Bɨraɓe i dɔmt dɔj losɔlt kete lon ngekãi'n non ɗe al ɓaitɔ, Bɨraɓe tee tam. Lon de'n non ɗe romt kɨsĩ tam ɗa tag na m'ndɨ tam mbo al.
23Kamla ta lo Bɨraɓe ɗe romt an:
24Ngon de, ngéndɨ gootɓegt kam dɔning Israelt elɨn anan: Abraham i de kɨɗabe na oon nduba dɔning'n non, ye la jĩn ngãi, rota adɨn ɓe'n non nyandubat loj. 25Kɨtɔ 'nten i eld an: Titbe kel Bɨraɓe Luwah: I san dan kɨ mosa, i urɨn kumsɨ kɨdɔ yogt losɨ, i ũn mosɨ kɔ. Na a i tan dɔning'n non nyandubat a. 26I ban kul nyakat losɨ, i ɗan nya kɨyerr, de kɨɗen kusɨt nuj nẽ madɓen na a i tan dɔning'n non nyandubat a? 27Eld an: Titbe kel Bɨraɓe Luwah: Dɔ ndimt kɨdɔ dõ, ngendɨ gootɓegt a son ta kiyaɗɔɔt, ĩgɨn ndɨn kam mut, m'a mad dãg kɨmut sand na ĩgɨn ndɨn kam loyarot kɨngang kɨ bulombalg, yokoosɨ a tɔld. 28M'a mad dɔning tel gotɓe kɨ lo kɨ de gotot, tɔg dɔngang loa a goto na mbalbog kɨ Israel a telɨn gotlo, de mad a tɔit al. 29Kamla a gerɨn ta kad mĩ Bɨraɓe Luwah lon mad dɔning tel gootɓe kɨ lo kɨ de gotot kɨta nyag kɨyerr tube kɨ ɗan.
30Na ĩ ngon de, deg loi ndɨ elɨn na ta dɔit kad ndogbɔrrgt kɨ tabit kujg, dekɨɗen ndɨ el ngonkõn an: I ɗe oo dɔ ta'n ndɨ tee ko ro Bɨraɓet. 31Na ndɨ ɗen roit tit'n deg a ɗen ne, ndɨn nõit tit deg lom be, ndɨ oon dɔ ta loi na hɔ ɗan goot al kɨta ɔjɨn tar kɨ ndartad na kamd i dɔ nyangahdɔt lod. 32Ĩ taa, ĩ tit ngekɔsɨpa kɨmaj rodt, kɨ ndi pa kɨmaj, ngékug mujik kɨmaj kɨta ndɨ oon dɔ ta loi na hɔ ɗan got al. 33Lon nyag'n non ɗan nya rota a ɗan nya kamla a gerɨn ta kad ngekelta kɨta Luwaht i kudt.
Currently Selected:
Ejekel 33: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
